കാസര്‍ഗോഡ്: ഉത്തരേന്ത്യയില്‍ ക്രിസ്ത്യന്‍ പുരോഹിതന്‍മാര്‍ക്ക് ളോഹയിട്ട് പുറത്തിറങ്ങാന്‍ കഴിയാത്ത അവസ്ഥയാണുള്ളതെന്ന് തലശ്ശേരി ആര്‍ച്ച് ബിഷപ്പ് മാര്‍ ജോസഫ് പാംപ്ലാനി. കന്യാസ്ത്രീകള്‍ തിരുവസ്ത്രമണിഞ്ഞ് പുറത്തിറങ്ങിയാല്‍ തിരിച്ചുവരാന്‍ കഴിയുമോ എന്നറിയാത്ത ഗതികേടാണ് ഉള്ളതെന്നും പാംപ്ലാനി പറഞ്ഞു. ഇഷ്ടമുള്ള മതം വിശ്വസിക്കാനും, തെരഞ്ഞെടുക്കാനും, പ്രചരിപ്പിക്കാനും മനുഷ്യര്‍ക്ക് അവകാശമുണ്ടെന്നും അദ്ദേഹം കൂട്ടിച്ചേര്‍ത്തു.

'' മതപരിവര്‍ത്തന നിരോധന നിയമപരിഷ്‌കരണം വിശ്വാസികളെ ശ്വാസം മുട്ടിക്കുകയാണ്. കോണ്‍ഗ്രസ് ഭരിക്കുന്ന കര്‍ണാടകയിലും സമാനമായ അവസ്ഥയാണുള്ളത്. കര്‍ണാടകത്തില്‍ മാത്രമല്ല, ഉത്തരേന്ത്യയിലും ഇതുപോലെ ളോഹയിട്ട് അച്ചന്‍മാര്‍ക്ക് നടക്കാന്‍ അവകാശമില്ല. കന്യാസ്ത്രീകള്‍ക്ക് തിരുവസ്ത്രം ധരിക്കാനോ, കുരിശ് മാലയിട്ട് പുറത്തിറങ്ങിയാല്‍ ജീവനോടെ തിരിച്ചു വരുമെന്ന് ഉറപ്പ് പറയാന്‍ സാധിക്കാത്ത ഗതികേടുള്ള അന്തരീക്ഷമാണ് നിലവിലുള്ളത്'' പാപ്ലാനി പറഞ്ഞു. 

ALSO READ: ഹിജാബ് വിവാദം: സ്കൂൾ നിയമാവലിയിൽ ശിരോവസ്ത്രത്തിന് നിരോധനമില്ലെന്ന് വിദ്യാഭ്യാസ ഉപഡയറക്ടറുടെ റിപ്പോർട്ട് 

കത്തോലിക്ക കോണ്‍ഗ്രസ് സംഘടിപ്പിക്കുന്ന അവകാശ സംരക്ഷണയാത്ര കാസര്‍ഗോഡ് ഉദ്ഘാടനം ചെയ്ത് സംസാരിക്കുകയായിരുന്നു പാംപ്ലാനി. 

അതേസമയം സംസ്ഥാനത്തെ ചില വിഷയങ്ങളില്‍ സര്‍ക്കാര്‍ സ്വീകരിച്ച നടപടി പ്രശംസനീയമാണെന്ന് പാംപ്ലാനി പറഞ്ഞു. അധ്യാപകരുടെ നിയമനവുമായി ബന്ധപ്പെട്ട് സഭയുടെ ആവശ്യം സര്‍ക്കാര്‍ അംഗീകരിച്ചെന്നും വിഷയത്തില്‍ പിണറായി സര്‍ക്കാരിനോട് നന്ദി പറയേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു.