തിരുവനന്തപുരം: യാത്രക്കാരുടെ വര്‍ഷങ്ങള്‍ നീണ്ട കാത്തിരിപ്പിനു പര്യവസാനം. തിരുവനന്തപുരത്ത് നിന്നും പാലക്കാട് വഴി മധുര വരെ സര്‍വിസ് നടത്തിയിരുന്ന അമൃത എക്‌സ്പ്രസ് രമേശ്വരത്തേക്ക് നീട്ടി. ഇന്ന് രാത്രി 8.30ന് തിരുവനന്തപുരത്ത് നിന്നും പുറപ്പെടുന്ന ട്രെയിന്‍ രാമേശ്വരം വരെ സര്‍വിസ് നടത്തും. നാളെ ഉച്ചയ്ക്ക് 12.45നാണ് ട്രെയിൻ രാമേശ്വരത്തെത്തുക. 

മടക്ക ട്രെയിന്‍ നാളെ ഉച്ചയ്ക്ക് 1.30 ന് രാമേശ്വരത്ത് നിന്ന് പുറപ്പെട്ട് മറ്റന്നാൾ പുലർച്ചെ 4.55 ന് തിരുവനന്തപുരത്തെത്തും. ഇതോടൊപ്പം വണ്ടിയുടെ അറ്റകുറ്റപ്പണികള്‍ തിരുവനന്തപുരം ഡിവിഷനില്‍ നിന്നും ചെന്നൈ ഡിവിഷനിലേക്ക് കൈമാറും. ബോട്ട് മെയില്‍ എക്‌സ്പ്രസ് ട്രെയിനുമായി റേക്ക് ഷെയറിങ്ങില്‍ ആണ്  ഇനി മുതല്‍ അമൃത എക്‌സ്പ്രസ് സര്‍വിസ് നടത്തുക.  

പുതിയ പാമ്പന്‍ പാലം തുറന്നതോടെയാണ് ട്രെയിൻ രാമേശ്വരം വരെ നീട്ടാന്‍ റെയില്‍വേ തീരുമാനിച്ചത്. തിരുവനന്തപുരം - മധുര അമൃത എക്‌സ്പ്രസ് രാമേശ്വരത്തേക്കു നീട്ടാന്‍ 2023ല്‍ റെയില്‍വേ ബോര്‍ഡ് അനുമതി നല്‍കിയിരുന്നു. സ്‌പെഷലായി ഓടിച്ച എറണാകുളം - രാമേശ്വരം ട്രെയിൻ നിര്‍ത്തിലാക്കിയതിനു പകരമായി അമൃത എക്‌സ്പ്രസ് രാമേശ്വരം വരെ നീട്ടുമെന്ന പ്രഖ്യാപനമാണു രണ്ട് വര്‍ഷം മുന്‍പ് ഉണ്ടായത്. 

ALSO READ: ട്രെയിൻ ടിക്കറ്റ് ബുക്കിംഗിൽ വൻ മാറ്റവുമായി ഇന്ത്യൻ റെയിൽവേ: കൺഫേം ടിക്കറ്റിന്റെ യാത്രാ തീയതി ഇനി ഫീസില്ലാതെ മാറ്റാം

എന്നാല്‍ പാലം പണി നീണ്ടതോടെ സര്‍വിസും നീണ്ടുപോയി. മുന്‍പു പല തവണ എം.പിമാര്‍ ഇതുമായി ബന്ധപ്പെട്ടു കത്തു നല്‍കിയെങ്കിലും ഒറ്റ റേക്ക് ഉപയോഗിച്ചു രാമേശ്വരം വരെ ഓടിക്കുക സാധ്യമല്ലെന്ന നിലപാടിലായിരുന്നു റെയില്‍വേ. ഒറ്റ റേക്ക് ഉപയോഗിക്കുമ്പോള്‍ കോച്ചുകള്‍ വൃത്തിയാക്കാന്‍ ആവശ്യമായ സമയം രാമേശ്വരത്ത് കിട്ടില്ലെന്ന കാരണം നിരത്തിയാണു ആവശ്യം നിരാകരിച്ചിരുന്നത്. 

ദക്ഷിണ റെയില്‍വേ മുന്‍ ചീഫ് പാസഞ്ചര്‍ ട്രാന്‍സ്‌പോര്‍ട്ടേഷന്‍ മാനേജര്‍ (സി.പി.ടി.എം) ടി.ശിവകുമാറാണ് ഇതിനു പോംവഴി കണ്ടുപിടിച്ചത്. ചെന്നൈ - രാമേശ്വരം ബോട്ട് മെയില്‍ എക്‌സ്പ്രസിന്റെ റേക്കുമായി ബന്ധിപ്പിച്ച് അമൃത രാമേശ്വരത്തേക്കു നീട്ടാന്‍ സാധിക്കുമെന്നു കാണിച്ച് അദ്ദേഹം 2022ല്‍ കത്തു നല്‍കി. രാമേശ്വരത്ത് ഉച്ചയ്ക്ക് എത്തുന്ന അമൃത എക്‌സ്പ്രസിന്റെ കോച്ചുകള്‍ വൈകീട്ട് രാമേശ്വരം - ചെന്നൈ സര്‍വിസിന് ഉപയോഗിക്കുകയും ചെന്നൈയില്‍ നിന്നു രാവിലെ രാമേശ്വരത്ത് എത്തുന്ന ട്രെയിന്റെ കോച്ചുകള്‍ ഉച്ചയ്ക്ക് അമൃത എക്‌സ്പ്രസായി തിരുവനന്തപുരത്തേക്ക് വിടാമെന്ന ആശയം ബോര്‍ഡ് അംഗീകരിച്ചിരുന്നെങ്കിലും ഇപ്പോഴാണ് ഉത്തരവിറങ്ങിയത്.  

ചെന്നൈ-‐രാമേശ്വരം ബോട്ട് മെയില്‍ എക്‌സ്പ്രസുമായി ലിങ്ക് ചെയ്യുന്നതിനു മുന്നോടിയായി നേരത്തെ അമൃതയില്‍ കോച്ചുകള്‍ കൂട്ടിയിരുന്നു. രാമേശ്വരത്ത് എട്ടു ട്രെയിനുകളുടെ സർവിസിനും അറ്റകുറ്റപ്പണിക്കും സൗകര്യമുള്ള പിറ്റ് ലൈനും സിഗ്നൽ സംവിധാനവും ഉള്ളതിനാൽ സാങ്കേതിക, ഗതാഗത പ്രശ്നങ്ങളുണ്ടാകില്ലെന്നത് നേട്ടമാണ്.