കോഴിക്കോട്: ജയിലുകളിൽ അന്തേവാസികൾക്കിടയിലെ ആത്മഹത്യാ പ്രവണത തടയുന്നതിൽ ജയിൽ ജീവനക്കാർക്ക് ഗുരുതര വീഴ്ച. തടവുകാരെ കൗൺസലിങിന് വിധേയമാക്കുന്ന സമയത്ത് ഏതെങ്കിലും രീതിയിൽ മാനസിക വൈകല്യമോ മാനികാസ്വാസ്ഥ്യമോ നേരിടുന്നവരുടെ വിവരങ്ങൾ ജയിൽ സൂപ്രണ്ടിനെ അറിയിക്കുന്നതിലാണ് വീഴ്ച വരുത്തുന്നത്. ജയിൽ ഹെഡ്ക്വാർട്ടേഴ്‌സ് ഡി.ഐ.ജി എം.കെ വിനോദ്കുമാറാണ് ഇത് സംബന്ധിച്ച പ്രത്യേക നിർദേശം സൂപ്രണ്ടുമാർക്ക് നൽകിയത്. ഇത്തരം കാര്യങ്ങളിൽ ആവശ്യമായ നടപടികൾ ബന്ധപ്പെട്ട ഉദ്യോഗസ്ഥർ സ്വീകരിക്കണമെന്ന് എല്ലാ ജയിൽ മേധാവിമാർക്കും ഡി.ഐ.ജി നിർദേശം നൽകി. 

ജയിലുകളിലെത്തുന്ന അന്തേവാസികളിൽ പലരും മാനസികനില തെറ്റിയവരും വിവിധതരം ലഹരി ഉപയോഗിക്കുന്നവർ വിത്‌ഡ്രോവൽ സിൻഡ്രോം പ്രകടിപ്പിക്കുന്നവരുമാണ്. ഇത്തരത്തിലുള്ളവരുൾപ്പെടെ ജയിലിലെത്തുന്നവർക്ക് വെൽഫെയർ ഓഫിസർമാരോ ജയിലിൽ നിയമിച്ചിട്ടുള്ള കൗൺസിലറോ കൗൺസിലിങ് നൽകും. തടവുകാരെ പ്രത്യേകം വിളിച്ചുവരുത്തി സംസാരിക്കുക വഴി അവരുടെ മനോനില സംബന്ധിച്ചും ആത്മഹത്യാ പ്രവണതയെ കുറിച്ചും മാനസിക സംഘർഷങ്ങൾ സംബന്ധിച്ചും  ഇവർക്ക് വ്യക്തമായി മനസിലാക്കാൻ സാധിക്കും. തുടർന്ന് മാനസിക വെല്ലുവിളികൾ നേരിടുന്ന തടവുകാരുണ്ടെങ്കിൽ അവരെ പ്രത്യേകം ബന്തവസിൽ പാർപ്പിച്ച് നിരീക്ഷിക്കുകയാണ് വേണ്ടത്. ഇതുവഴി ആത്മഹത്യാ പ്രവണത തടയാൻ ഒരു പരിധിവരെ ജയിൽ ജീവനക്കാർക്കും സാധിക്കും. 

ALSO READ: നേപ്പാളിലെ ജെൻ സി പ്രക്ഷോഭത്തിനിടെ മുങ്ങിയത് 13,000 ജയിൽപുള്ളികൾ; പകുതിയോളം പേരും ഇപ്പോഴും കാണാമറയത്ത്, 540 ഇന്ത്യൻ കുറ്റവാളികളും ഒളിവിൽ

എന്നാൽ പലപ്പോഴും ഇത്തരം കാര്യങ്ങൾ ജയിലുകളിൽ കൃത്യമായി പാലിക്കുന്നില്ല. അതിനാൽ മാനസിക സംഘർഷമുള്ളവരെ പ്രത്യേകം നിരീക്ഷിക്കാൻ ജയിലുകളിൽ സാധിക്കാത്ത അവസ്ഥയാണ്. സ്ഥിരം കുറ്റവാളികളായ മറ്റു തടവുകാർക്കൊപ്പം ഇവരെ താമസിപ്പിക്കുകയാണ് ചെയ്തു വരുന്നത്. ഇത് പലപ്പോഴും  ആത്മഹത്യയിലേക്ക് നയിക്കും. ഈ സാഹചര്യത്തിലാണ് കൗൺസലിങ് വിവരങ്ങൾ സൂപ്രണ്ടിനെ അറിയിക്കണമെന്ന് ഡി.ഐ.ജി നിർദേശിച്ചത്. 

കഴിഞ്ഞ മാസവും ജയിലിൽ വിചാരണ തടവുകാരൻ ആത്മഹത്യ ചെയ്തിരുന്നു. പീരുമേട് സബ്ജയിലിൽ പോക്‌സോ കേസിൽ വിചാരണ നേരിടുന്ന കുമളി സ്വദേശിയാണ് മരിച്ചത്. കൊതുകുതിരി, സാനിറ്റൈസർ നിർമാണത്തിനുപയോഗിക്കുന്ന ആൽക്കഹോൾ എന്നിവ ഉപയോഗിച്ച് വരെ മുൻകാലങ്ങളിൽ തടവുകാർ ആത്മഹത്യാ ശ്രമം നടത്തിയിരുന്നു. ഇത്തരം സാധനങ്ങൾ തടവുകാരുടെ കൈവശം എത്തുന്നത് തടയാൻ നിർദേശം നൽകുകയും ചെയ്തിരുന്നു.