മൈസൂരു: പതിവായി വീട്ടിൽ ദുർമന്ത്രവാദം നടത്തുന്നതിനെ ചോദ്യംചെയ്‌ത ഭാര്യയെ ഭർത്താവ് തലയ്ക്കടിച്ച് കൊലപ്പെടുത്തിയ ശേഷം മൃതദേഹം കുഴൽക്കിണറിൽ താഴ്ത്തി കോൺക്രീറ്റിട്ട് മൂടി. സംഭവത്തിൽ യുവതിയുടെ ഭർത്താവ്, അച്ഛൻ, അമ്മ എന്നിവരെ പൊലിസ് അറസ്റ്റ് ചെയ്തു.

അന്ധവിശ്വാസം തലയ്ക്ക് പിടിച്ച ചിക്കമംഗളൂരു കടൂർ സ്വദേശിയായ വിജയ് ആണ് ഭാര്യ ഭാരതിയെ (28) കൊലപ്പെടുത്തിയത്. ഉപയോഗശൂന്യമായ വലിയ കുഴൽക്കിണറിൽ ഭാരതിയുടെ മൃതദേഹം കയറുകെട്ടി താഴ്ത്തിയ ശേഷം കോൺക്രീറ്റ് ചെയ്ത് മൂടുകയായിരുന്നു. വിജയ് പതിവായി വീട്ടിൽ ദുർമന്ത്രവാദം അടക്കമുള്ള ആചാരങ്ങൾ ചെയ്‌തിരുന്നു. ഇത് ഭാരതി ചോദ്യംചെയ്‌തതാണ് കൊലപാതകത്തിലേക്ക് നയിച്ചത്.

ഒന്നരമാസം മുമ്പ് ഭാര്യയെ കാണാനില്ലെന്ന് കാണിച്ച് വിജയ് പൊലിസ് സ്റ്റേഷനിൽ പരാതി നൽകിയിരുന്നു. തുടർന്ന് പൊലിസ് നടത്തിയ അന്വേഷണത്തിലാണ് ഇയാൾ ഭാര്യയെ കൊലപ്പെടുത്തിയതാണെന്ന് വ്യക്തമായത്. വിശദമായ ചോദ്യംചെയ്യലിൽ പ്രതി കുറ്റം സമ്മതിക്കുകയും മൃതദേഹം മറവുചെയ്ത സ്ഥലം പൊലിസിന് കാണിച്ചുകൊടുക്കുകയും ചെയ്തു.

പൊലിസ് നടത്തിയ പരിശോധനയിൽ വീടിനടുത്തുള്ള കൃഷിസ്ഥലത്തോട് ചേർന്നുള്ള കുഴൽക്കിണറിൽനിന്ന് മൃതദേഹം കണ്ടെടുത്തു. ഭാരതിയുടെ ആത്മാവ് പുറത്തുവരുമെന്നും അങ്ങനെ സംഭവിച്ചാൽ താൻ പിടിക്കപ്പെടുമെന്നും വിജയ് വിശ്വസിച്ചിരുന്നു. ഇത് തടയാനായി ഇയാൾ വീട്ടിൽ ദുർമന്ത്രവാദവും മൃഗബലിയും നടത്തിയിരുന്നതായും പൊലിസ് പറഞ്ഞു.കൊലപാതക വിവരം മറച്ചുവെക്കാനും തെളിവുകൾ നശിപ്പിക്കാനും കൂട്ടുനിന്നതിനാണ് വിജയുടെ അച്ഛനെയും അമ്മയെയും കേസിൽ അറസ്റ്റ് ചെയ്തിരിക്കുന്നത്.