കോഴിക്കോട്: തീവ്രവാദവുമായി ബന്ധപ്പെട്ട വിഷയങ്ങള്‍ കൈകാര്യം ചെയ്യുമ്പോള്‍ മാധ്യമങ്ങള്‍ക്ക് വിവേകം ആവശ്യമാണെന്നും അസത്യമെഴുതിയാല്‍ വലിയ ആപത്തുണ്ടാവുമെന്നും പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി പറഞ്ഞു. ചെറുശ്ശേരി സൈനുദ്ദീന്‍ മുസ്്‌ലിയാരുടെ സ്മരണിക പ്രകാശന ചടങ്ങിനോടനുബന്ധിച്ച് 'ഭീകരതയും മാധ്യമങ്ങളും' സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.

യഥാര്‍ഥ മതത്തേയും തീവ്രവാദത്തേയും വേര്‍തിരിച്ചു അവതരിപ്പിക്കുകയാണ് വേണ്ടത്. രാഷ്ട്രീയ-സാമ്പത്തിക കാരണങ്ങളാല്‍ മതം വഴിതെറ്റിപ്പോകുന്നുണ്ട്. തീവ്രവാദത്തിനെതിരേ നിലപാട് സ്വീകരിച്ചവരെ മാധ്യമങ്ങള്‍ പ്രോത്സാഹിപ്പിക്കണമെന്നും അദ്ദേഹം കൂട്ടിച്ചേര്‍ത്തു.

സെന്‍സേഷണല്‍ വാര്‍ത്തകള്‍ക്കു പിന്നാലെ മാധ്യമങ്ങള്‍ സഞ്ചരിക്കുകയാണെന്നും സാമൂഹിക മാധ്യമങ്ങളെ ഭീകര സംഘടനകള്‍ ഉപയോഗപ്പെടുത്തുന്നുണ്ടെന്നും ഐ.എസ് ഡിജിറ്റല്‍ ഖിലാഫത്താണെന്നും വിഷയമവതരിപ്പിച്ച ഓണമ്പിള്ളി മുഹമ്മദ് ഫൈസി അഭിപ്രായപ്പെട്ടു. മാധ്യമങ്ങള്‍ തെറ്റായ പ്രവണതയും സാംസ്‌കാരിക ശൂന്യതയും പ്രകടിപ്പിക്കുന്നുണ്ട്. മാധ്യമ അധിനിവേശത്തിന്റെ ഇരകള്‍ നമുക്കിടയില്‍ ജീവിക്കുന്നു. ഇതിനെ ചിന്ത കൊണ്ട് പ്രതിരോധിക്കാതെ ആയുധം കൊണ്ട് പ്രതികരിക്കുന്നത് ശരിയല്ലെന്ന് തേജസ് എക്‌സിക്യൂട്ടീവ് എഡിറ്റര്‍ എന്‍.പി ചെക്കുട്ടി പറഞ്ഞു.

ഭീകരതയെ ഒരു മതവുമായി ബന്ധപ്പെടുത്തി പറയേണ്ടതില്ലെന്നും ഭീകരത സംഭവിക്കുന്നത് മനുഷ്യ മനസുകളിലാണെന്നും മാധ്യമങ്ങളില്‍ പ്രതിഫലിക്കുന്നത് സമൂഹത്തിന്റെ ശരിതെറ്റുകളാണെന്നും മലയാള മനോരമ കോ ഓഡിനേറ്റിങ് എഡിറ്റര്‍ പി.ജെ ജോഷ്വ പറഞ്ഞു. യുവാക്കളുടെ തിരോധാനവുമായി ബന്ധപ്പെട്ട് മാധ്യമങ്ങളില്‍ വന്ന ചര്‍ച്ചകള്‍ മുസ്്‌ലിം സ്വത്തത്തെ ചോദ്യം ചെയ്യുന്ന തരത്തിലായിരുന്നുവെന്നും മാധ്യമ മേഖലയില്‍ പ്രഗത്ഭരായവര്‍ ഉയര്‍ന്നുവരണമെന്നും മാധ്യമം ഡെപ്യൂട്ടി എഡിറ്റര്‍ കാസിം ഇരിക്കൂര്‍ അഭിപ്രായപ്പെട്ടു.

പ്രസ് ക്ലബ് പ്രസിഡന്റ് കമാല്‍ വരദൂര്‍, സുപ്രഭാതം എക്‌സിക്യൂട്ടീവ് എഡിറ്റര്‍ എ. സജീവന്‍ സംസാരിച്ചു. സുപ്രഭാതം മാനേജിങ് എഡിറ്റര്‍ നവാസ് പൂനൂര്‍ മോഡറേറ്ററായിരുന്നു.