പത്തനംതിട്ട: ചിറ്റാറില്‍ അഞ്ചു വയസുകാരന്‍ ജയന്റ് വീലില്‍നിന്ന് വീണു മരിച്ച സംഭവത്തില്‍ രണ്ടുപേര്‍ക്കെതിരേ നരഹത്യക്ക് കേസ്. കാര്‍ണിവല്‍ സംഘടിപ്പിച്ച ഗ്രീന്‍ ഇവന്റ്‌സ് എന്ന ഇവന്റ് മാനേജ്‌മെന്റ് കമ്പനിയിലെ ജീവനക്കാര്‍ക്കെതിരേയാണ് കേസെടുത്തത്. ഇവര്‍ ഒളിവിലാണ്.
അതിനിടെ കാര്‍ണിവല്‍ സംഘടിപ്പിച്ചത് പഞ്ചായത്തിന്റെയോ അഗ്നിശമന സേനയുടെയോ അനുമതിയില്ലാതെയാണെന്ന് ചിറ്റാര്‍ പൊലിസ് നടത്തിയ പരിശോധനയില്‍ കണ്ടെത്തി. ഇതോടെ അധികൃതരുടെ ഭാഗത്തു നിന്നുണ്ടായ അനാസ്ഥയില്‍ പ്രതിഷേധം ശക്തമായിട്ടുണ്ട്.വ്യാഴാഴ്ചയാണ് നാടിനെ നടുക്കിയ സംഭവം നടന്നത്. കഴിഞ്ഞ ഞായറാഴ്ച മുതലാണ് കാര്‍ണിവല്‍ തുടങ്ങിയത്. എന്നാല്‍ തങ്ങളുടെ മൂക്കിനുതാഴെ നടന്ന കാര്‍ണിവലിനെപ്പറ്റി പൊലിസ് യാതൊരുവിധ അന്വേഷണവും നടത്തിയിരുന്നില്ല. പരാതി കിട്ടിയില്ലെന്നാണ് ഇതിന് പൊലിസ് നല്‍കുന്ന വിശദീകരണം.
അന്തിമ അനുമതി നല്‍കേണ്ട ചിറ്റാര്‍ ഗ്രാമപഞ്ചായത്ത് അധികൃതര്‍ക്കും ഇക്കാര്യത്തില്‍ വ്യക്തത വരുത്താന്‍ കഴിഞ്ഞിരുന്നില്ല. ഇത്തരമൊരു പരിപാടിക്ക് അനുമതി നല്‍കിയിട്ടില്ലെന്നാണ് പഞ്ചായത്ത് പ്രസിഡന്റ് വ്യക്തമാക്കിയത്. എന്നാല്‍, നികുതിവാങ്ങി അനുമതി നല്‍കാന്‍ തീരുമാനിച്ചിരുന്നതായി ഒരു വിഭാഗം പറയുന്നു.ഇവരുടെ പക്കല്‍നിന്ന് വിനോദ നികുതി ഈടാക്കുക മാത്രമേ പഞ്ചായത്ത് ചെയ്തിട്ടുള്ളൂവെന്ന് ഇവന്റ് മാനേജ്‌മെന്റ് നടത്തിപ്പുകാരെ ചോദ്യം ചെയ്തപ്പോള്‍ പൊലിസിന് വ്യക്തമായി. മറ്റ് അനുമതികള്‍ നല്‍കാതെ വിനോദ നികുതി പിരിച്ചതിന് പഞ്ചായത്ത് അധികൃതര്‍ക്കെതിരേയും നടപടി ഉണ്ടാകുമെന്നാണ് വിവരം. ഫയര്‍ഫോഴ്‌സ് അനുമതിയും ഇവര്‍ക്ക് ലഭിച്ചിട്ടില്ല.
അഗ്നിശമനസേനയിലെ ഒരു ഉന്നത ഉദ്യോഗസ്ഥന്റെ ശുപാര്‍ശക്കത്തു മാത്രമാണ് നടത്തിപ്പുകാര്‍ സമ്പാദിച്ചത്. അനുമതി സംബന്ധിച്ചുള്ള അവ്യക്തത നീക്കാന്‍ അന്വേഷണം നടത്തുമെന്ന് ജില്ലാ പൊലിസ് മേധാവി ഹരിശങ്കര്‍ അറിയിച്ചു. ജയന്റ് വീലടക്കമുള്ള ഉപകരണങ്ങള്‍ സുരക്ഷാ പരിശോധനയ്ക്ക് വിധേയമാക്കിയിരുന്നില്ല. യന്ത്രം ഉറപ്പിച്ച സ്ഥലത്തെക്കുറിച്ചും പരാതികള്‍ ഉയര്‍ന്നിട്ടുണ്ട്. ഇത് അന്വേഷിക്കുമെന്നും പൊലിസ് അറിയിച്ചു. ഞായറാഴ്ചത്തെ ദാരുണ സംഭവത്തെ തുടര്‍ന്ന് ഇത്തരത്തില്‍ സുരക്ഷാ മാനദണ്ഡങ്ങള്‍ പാലിക്കാതെയും അനുമതികള്‍ ഇല്ലാതെയും നടത്തുന്ന കാര്‍ണിവലുകള്‍ നിര്‍ത്തിവയ്പ്പിക്കാനും ജില്ലാ പൊലിസ് മേധാവി നിര്‍ദേശം നല്‍കി.
ചിറ്റാര്‍ കുളത്തിങ്കല്‍ സജി-ബിന്ദു ദമ്പതികളുടെ മകന്‍ അലനാണ് കഴിഞ്ഞ ദിവസമുണ്ടായ അപകടത്തില്‍ മരിച്ചത്. 30 അടി മുകളില്‍ നിന്നാണ് അലന്‍ വീണത്. സഹോദരി പ്രിയങ്ക(15)യ്ക്കും ഗുരുതര പരുക്കേറ്റിരുന്നു. മാതാപിതാക്കളുടെ മുന്നിലേക്കാണ് ഇവര്‍ തെറിച്ചുവീണത്. അലന്റെ മൃതദേഹം പത്തനംതിട്ടയിലെ സ്വകാര്യ ആശുപത്രിയില്‍ സൂക്ഷിച്ചിരിക്കുകയാണ്.