കുവൈത്ത് സിറ്റി: പ്രവാസികൾക്കുള്ള ആരോഗ്യ ഇൻഷുറൻസ് ഫീസിൽ വൻ വർധനവ് പ്രഖ്യാപിച്ച് കുവൈത്ത് ആരോഗ്യ മന്ത്രാലയം ഉത്തരവ് പുറത്തിറക്കി. ഡിസംബർ 23 മുതൽ പുതുക്കിയ നിരക്കുകൾ പ്രാബല്യത്തിൽ വരും. വിദേശികൾക്കുള്ള ആരോഗ്യ ഇൻഷുറൻസുമായി ബന്ധപ്പെട്ട 1999 ലെ നിയമം ഭേദഗതി ചെയ്തുകൊണ്ടാണ് പുതിയ തീരുമാനം.

പുതിയ ഉത്തരവ് പ്രകാരം, താമസാനുമതി നൽകുന്നതിനും പുതുക്കുന്നതിനും നിർബന്ധമായിരുന്ന വാർഷിക ഹെൽത്ത് ഇൻഷുറൻസ് ഫീസ് ഭൂരിഭാഗം വിഭാഗങ്ങൾക്കും 50 കുവൈത്ത് ദിനാറിൽ നിന്ന് 100 ദിനാറായി ഉയർത്തി. കഴിഞ്ഞ മാസം പ്രഖ്യാപിച്ച വിസ–റസിഡൻസ് ഫീസ് പരിഷ്കരണങ്ങളുടെ ഭാഗമായാണ് ഈ നടപടി.

ആരോഗ്യ ഇൻഷുറൻസോ സർക്കാർ/സ്വകാര്യ ആരോഗ്യ ഗ്യാരണ്ടിയോ ഇല്ലാതെ താമസാനുമതിയോ പ്രവേശന വിസയോ അനുവദിക്കില്ലെന്ന് മന്ത്രാലയം വ്യക്തമാക്കി.

അതേസമയം, സർക്കാർ–സ്വകാര്യ മേഖല, കുടുംബ വിസ, പഠനം, നിക്ഷേപം, താൽക്കാലിക ജോലി വിസകൾ എന്നിവയ്ക്ക് 5 ദിനാർ ഇൻഷുറൻസ് ഫീസ് ഈടാക്കും. ടൂറിസം, ബിസിനസ്, മെഡിക്കൽ തുടങ്ങിയ വിജിറ്റ് വിസകൾക്ക് സ്വകാര്യ ഇൻഷുറൻസ് നിരക്കുകൾ ബാധകമായിരിക്കും.

ALSO READ: ഗാർഹിക തൊഴിലാളികളുടെ ശമ്പളം ഇനി ബാങ്ക് വഴി മാത്രം; ജനുവരി ഒന്ന് മുതൽ സഊദിയിൽ പുതിയ നിയമം

സർക്കാർ–സ്വകാര്യ മേഖല തൊഴിലാളികൾ, വിദേശ നിക്ഷേപകർ, സ്വയം സ്പോൺസർ ചെയ്യുന്ന പ്രവാസികൾ, വിദേശ വിദ്യാർത്ഥികൾ, കുടുംബ വിസയിലെ ആശ്രിതർ, പുതുതായി താമസാനുമതിക്ക് അപേക്ഷിക്കുന്നവർ എന്നിവർക്കെല്ലാം പ്രതിവർഷം 100 ദിനാർ ഹെൽത്ത് ഗ്യാരണ്ടി ഫീസ് ഈടാക്കും.

കൃഷി തൊഴിലാളികൾ, മത്സ്യത്തൊഴിലാളികൾ, മേച്ചൽ തൊഴിലാളികൾ തുടങ്ങിയ ചില പ്രത്യേക വിഭാഗങ്ങൾക്ക് 10 ദിനാർ മാത്രമാണ് ഫീസ്. ട്രാൻസിറ്റ്, അടിയന്തര വിസകൾക്ക് 5 ദിനാർ ഫീസും നിശ്ചയിച്ചിട്ടുണ്ട്.

കുവൈത്തി പൗരന്മാരെ വിവാഹം ചെയ്ത വിദേശ സ്ത്രീകൾ, കുവൈത്തി പൗരന്മാരുടെ മാതാപിതാക്കളും മക്കളും, വിദേശികളെ വിവാഹം ചെയ്ത കുവൈത്തി സ്ത്രീകളുടെ മക്കൾ, ഒരു കുവൈത്തി കുടുംബത്തിലെ ആദ്യ മൂന്ന് ഗാർഹിക തൊഴിലാളികൾ, ഡിപ്ലോമാറ്റിക് മിഷനുകൾ, വിദേശത്ത് ജനിച്ച കുവൈത്തി നവജാത ശിശുക്കൾ (നാലു മാസം വരെ) എന്നിവരെ ഫീസിൽ നിന്ന് ഒഴിവാക്കിയിട്ടുണ്ട്.

ഡിസംബർ 23 മുതൽ ആരോഗ്യ ഇൻഷുറൻസ് ഇല്ലാതെ കുവൈത്തിൽ താമസവും വിസ നടപടികളും അനുവദനീയമല്ല.

 Kuwait's Ministry of Health has announced a significant increase in health insurance fees for expatriates, effective December 23, 2025. The annual health insurance fee for residency renewals and certain visas has been raised to KD 100, up from KD 50, as part of broader residency and visa reforms.