ഷാർജ: എപ്പോഴും പുഞ്ചിരിക്കുന്ന മുഖത്തോടെ ഏവർക്കും പ്രിയങ്കരിയായിരുന്ന ഐഷ മറിയം (17) ഓർമ്മയായി. ഷാർജ ഇന്ത്യൻ സ്കൂളിലെ പതിനൊന്നാം ക്ലാസ് വിദ്യാർത്ഥിനിയായ ഐഷയെ ബുധനാഴ്ചയാണ് വീട്ടിൽ അബോധാവസ്ഥയിൽ കണ്ടെത്തിയത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മരണകാരണം ഹൃദയാഘാതമാണെന്ന് ഡോക്ടർമാർ സ്ഥിരീകരിച്ചു.

ബുധനാഴ്ച ഉച്ചകഴിഞ്ഞ് കുളിമുറിയിൽ കയറിയ ഐഷയെ ഏറെ നേരമായിട്ടും കാണാതിരുന്നതിനെത്തുടർന്ന് വീട്ടുകാർ വാതിൽ പൊളിച്ചു നോക്കിയപ്പോഴാണ് അബോധാവസ്ഥയിൽ കണ്ടെത്തിയത്. തലേദിവസം രാത്രി ബന്ധുവീട്ടിൽ ആഘോഷങ്ങളിൽ പങ്കുചേർന്ന ശേഷം പുലർച്ചെയാണ് ഐഷ സ്വന്തം വീട്ടിലെത്തി ഉറങ്ങാൻ പോയത്. സ്പോർട്സിലും പഠനത്തിലും ഒരുപോലെ മിടുക്കിയായിരുന്ന കുട്ടിയുടെ പെട്ടെന്നുള്ള മരണം കുടുംബത്തെയും സുഹൃത്തുക്കളെയും ഒരുപോലെ ഞെട്ടിച്ചിരിക്കുകയാണ്.

ALSO READ: 30 വർഷമായി പ്രവാസി, ഒടുവിൽ മങ്കട സ്വദേശിക്ക് ഹൃദയാഘാതം മൂലം മരണം, ഖബറടക്കവും ജിദ്ദയിൽ 

"അവൾ എപ്പോഴും പുഞ്ചിരിക്കുന്നവളും ആരെയും സഹായിക്കാൻ സന്നദ്ധതയുള്ളവളുമായിരുന്നു" ഐഷയുടെ അമ്മാവൻ ഖലീജ് ടൈംസിനോട് പറഞ്ഞു. സ്കൂൾ ഫുട്ബോൾ ടീമിലെ സജീവ അംഗമായിരുന്നു ഐഷ.

ഐഷയുടെ വിയോഗം വിശ്വസിക്കാനാകുന്നില്ലെന്ന് ഷാർജ ഇന്ത്യൻ സ്കൂൾ ഡയറക്ടർ-പ്രിൻസിപ്പൽ ഡോ. പ്രമോദ് മഹാജൻ പറഞ്ഞു. "ഫിസിക്സ്, കെമിസ്ട്രി, മാത്തമാറ്റിക്സ്, ബയോളജി വിഷയങ്ങളിൽ മിടുക്കിയായിരുന്ന വിദ്യാർത്ഥിനിയായിരുന്നു അവൾ. സ്കൂളിലെ എല്ലാ പരിപാടികളിലും സജീവമായി പങ്കെടുത്തിരുന്ന ഐഷ അധ്യാപകർക്കും സഹപാഠികൾക്കും ഒരുപോലെ പ്രിയങ്കരിയായിരുന്നു," അദ്ദേഹം അനുസ്മരിച്ചു.

ആരോഗ്യവതിയും കായികതാരവുമായ ഒരു പെൺകുട്ടിക്ക് ഇത്തരത്തിൽ ഹൃദയാഘാതം സംഭവിച്ചത് സ്കൂൾ അധികൃതരെയും രക്ഷിതാക്കളെയും ഒരുപോലെ ആശങ്കയിലാഴ്ത്തുന്നുണ്ട്. ഏതാനും മാസങ്ങൾക്ക് മുമ്പ് ദുബൈയിൽ 18 വയസ്സുള്ള മറ്റൊരു വിദ്യാർത്ഥിയും സമാനമായ രീതിയിൽ ഹൃദയാഘാതം മൂലം മരണപ്പെട്ടിരുന്നു. കൗമാരക്കാരിലെ ഇത്തരം സംഭവങ്ങൾ ഗൗരവകരമായ ഒരു ഉണർവ് വിളി (Wake-up call) ആണെന്ന് ഡോ. പ്രമോദ് മഹാജൻ ചൂണ്ടിക്കാട്ടി.

കഴിഞ്ഞ 15 വർഷമായി അൽ ഐനിൽ താമസിച്ചിരുന്ന കുടുംബം രണ്ടു വർഷം മുമ്പാണ് ഷാർജ മെയ്‌സലൂണിലേക്ക് മാറിയത്. ഐഷയുടെ മാതാവും രണ്ട് സഹോദരങ്ങളും (11 വയസ്സുള്ള സഹോദരനും 3 വയസ്സുള്ള സഹോദരിയും) കഴിഞ്ഞ ദിവസം ഇന്ത്യയിലേക്ക് തിരിച്ചിരുന്നു. പിതാവും അമ്മാവന്മാരും നിലവിൽ യുഎഇയിലുണ്ട്. നടപടിക്രമങ്ങൾ പൂർത്തിയാക്കി മൃതദേഹം ഉടൻ നാട്ടിലെത്തിക്കുമെന്ന് ബന്ധുക്കൾ അറിയിച്ചു.