ന്യൂഡല്‍ഹി: കൈക്കൂലി ആരോപണ വിധേയനായ എന്‍ഫോഴ്സ്മെന്റ് ഡയറക്ടറേറ്റ് ( ED ) ഡെപ്യൂട്ടി ഡയറക്ടര്‍ പി രാധാകൃഷ്ണനെ സര്‍വീസില്‍ നിന്ന് നീക്കി. അഞ്ചുവര്‍ഷം സേവന കാലാവധി ബാക്കി നില്‍ക്കെയാണ് രാധാകൃഷ്ണന്‍ പുറത്താകുന്നത്. നയതന്ത്ര സ്വര്‍ണക്കടത്ത് അടക്കം അന്വേഷിച്ചിരുന്നത് പി രാധാകൃഷ്ണന്റെ നേതൃത്വത്തിലായിരുന്നു.

കേന്ദ്ര ധനകാര്യ മന്ത്രാലയമാണ് ഇതുസംബന്ധിച്ച ഉത്തരവ് പുറത്തിറക്കിയത്. കൈക്കൂലി അടക്കം നിരവധി ആക്ഷേപങ്ങളില്‍ രാധാകൃഷ്ണനെതിരെ അന്വേഷണം നടന്നിരുന്നു. സ്വര്‍ണക്കള്ളക്കടത്ത് അന്വേഷണത്തിന്റെ വിവരങ്ങളടക്കം ചോര്‍ത്തി നല്‍കിയെന്നും സി.പി.എം നേതാക്കളുമായി രാധാകൃഷ്ണന്‍ രഹസ്യ ചര്‍ച്ച നടത്തിയതായും ആരോപണമുയര്‍ന്നിരുന്നു. തുടര്‍ന്ന് ചെന്നൈയിലേക്ക് സ്ഥലം മാറ്റം ലഭിച്ച രാധാകൃഷ്ണന്‍ ഒന്നര വര്‍ഷം മുന്‍പാണ് കൊച്ചി യൂണിറ്റില്‍ തിരിച്ചെത്തിയത്. വീണ്ടും ആക്ഷേപങ്ങളുണ്ടായതിനെ തുടര്‍ന്ന് ശ്രീനഗറിലേക്കും സ്ഥലം മാറ്റിയിരുന്നു. സ്ഥലംമാറ്റം റദ്ദാക്കണമെന്നും ആവശ്യപ്പെട്ട് ട്രിബ്യൂണിലിനെ സമീപിച്ചിരുന്നെങ്കിലും ട്രിബ്യൂണല്‍ ഇതു തള്ളിയിരുന്നു.

ധനകാര്യ വകുപ്പിന്റെ ആഭ്യന്തര അന്വേഷണത്തില്‍ ഇദ്ദേഹത്തിനെതിരായ നിരവധി ആക്ഷേപങ്ങളില്‍ പലതും ശരിയെന്ന് കണ്ടെത്തുകയും ചെയ്തിരുന്നു. തുടര്‍ന്ന് സര്‍വീസില്‍ നിന്ന് പിരിഞ്ഞുപോകാന്‍ രാധാകൃഷ്ണനോട് ധനകാര്യ മന്ത്രാലയം ആവശ്യപ്പെടുകയായിരുന്നു. 

പി രാധാകൃഷ്ണനെ ജമ്മു കശ്മിരിലെ ശ്രീനഗറിലേക്ക് സ്ഥലംമാറ്റിക്കൊണ്ടുള്ള നടപടി വന്ന് നാളുകള്‍ക്ക് ശേഷമാണ് ഇപ്പോള്‍ അദ്ദേഹത്തെ പുറത്താക്കിക്കൊണ്ടുള്ള നടപടി വന്നിരിക്കുന്നത്.