ഇസ്ലാമബാദ്: പാകിസ്താനിലെ വടക്ക് പടിഞ്ഞാറൻ പ്രവിശ്യയായ ഖൈബർ പഖ്തുൻഖ്വയിൽ വിവാഹ ആഘോഷത്തിനിടെ ചാവേർ ആക്രമണം. സ്ഫോടനത്തിൽ ഏഴ് പേർ കൊല്ലപ്പെടുകയും 25 പേർക്ക് പരുക്ക് പറ്റുകയും ചെയ്തു.  ഇതിൽ 10 പേരുടെ നില ഗുരുതരമാണ്. മരിച്ചവരിൽ സമാധാന സമിതി നേതാവ് മഹ്സൂദ് ഉൾപ്പെട്ടിട്ടുണ്ടെന്നാണ് റിപ്പോർട്ട്. വെള്ളിയാഴ്ച രാത്രിയാണ് അപകടം ഉണ്ടായത്.

പ്രവിശ്യയിലെ സമാധാന സമിതി അംഗമായ നൂർ അലം മെഹ്ദൂസിന്റെ വീട്ടിലാണ് ചാവേർ ആക്രമണം ഉണ്ടായത്. വിവാഹ ആഘോഷത്തിന്റെ ഭാഗമായി അതിഥികൾ നൃത്തം ചെയ്യുന്നതിനിടെയായിരുന്നു ചാവേർ പൊട്ടി തെറിച്ചത്. സ്ഫോടനത്തിൽ മുറിയുടെ മേൽക്കൂര പൂർണമായും തകരുകയും ചെയ്തു. സ്ഫോടനത്തെക്കുറിച്ച് അധികൃതർ അന്വേഷണം ആരംഭിച്ചിട്ടുണ്ട്.