മുംബൈ: ദാരിദ്ര്യത്തോടും സാമൂഹിക വിലക്കുകളോടും പൊരുതി വിജയഗാഥ രചിച്ചിരിക്കുകയാണ് മഹാരാഷ്ട്രയിലെ യവത്മാല്‍ ജില്ലയില്‍ നിന്നുള്ള അദീബ അനം. കടുത്ത വരള്‍ച്ചയും കര്‍ഷക ആത്മഹത്യകളും വാര്‍ത്തകളില്‍ നിറയാറുള്ള വിദര്‍ഭ മേഖലയില്‍ നിന്ന്, ഈ വര്‍ഷത്തെ യു.പി.എസ്.സി പരീക്ഷയില്‍ 142ാം റാങ്ക് നേടിയാണ് അദീബ ചരിത്രം കുറിച്ചത്. മഹാരാഷ്ട്രയില്‍ നിന്ന് ഈ നേട്ടം കൈവരിക്കുന്ന ആദ്യ മുസ്ലിം വനിതയാണ് ഈ ഇരുപത്തിയഞ്ചുകാരി.

പ്രതിബന്ധങ്ങളെ തോല്‍പ്പിച്ച നിശ്ചയദാര്‍ഢ്യം

പത്താം ക്ലാസ്സില്‍ പഠനം നിര്‍ത്തേണ്ടി വന്ന ഒരു ഓട്ടോറിക്ഷാ ഡ്രൈവറുടെ മകള്‍ക്ക് ഐ.എ.എസ് എന്ന സ്വപ്‌നം അസാധ്യമായിരുന്നിരിക്കാം. എന്നാല്‍ അഷ്ഫാഖ് അഹമ്മദ് എന്ന പിതാവ് തന്റെ മകളുടെ സ്വപ്‌നങ്ങള്‍ക്ക് തടസ്സമായില്ല. സമൂഹത്തില്‍ നിന്നുള്ള സമ്മര്‍ദ്ദങ്ങളെ അവഗണിച്ച് അദ്ദേഹം അദീബയെ പഠിക്കാന്‍ പ്രോത്സാഹിപ്പിച്ചു.
പത്താം ക്ലാസ്സില്‍ 98 ശതമാനവും പന്ത്രണ്ടാം ക്ലാസ്സില്‍ 97 ശതമാനവും മാര്‍ക്കോടെ വിജയിച്ച അദീബ, പിന്നീട് പുണെയില്‍ നിന്നാണ് ഗണിതശാസ്ത്രത്തില്‍ ബിരുദം നേടിയത്. തന്റെ പന്ത്രണ്ടാം ക്ലാസ് മുതല്‍ സിവില്‍ സര്‍വീസ് ലക്ഷ്യമാക്കി കഠിനാധ്വാനം ചെയ്തിരുന്നതായി അദീബ പറയുന്നു.

 

 

തോല്‍വികളില്‍ തളരാതെ

വിജയത്തിലേക്കുള്ള വഴി അദീബയ്ക്ക് അത്ര എളുപ്പമായിരുന്നില്ല. ആദ്യ രണ്ട് ശ്രമങ്ങളും പരാജയപ്പെട്ടപ്പോള്‍ മനസ്സ് തളരാതെ മൂന്നാം ശ്രമത്തില്‍ ഇന്റര്‍വ്യൂ വരെ എത്തിയെങ്കിലും അന്തിമ പട്ടികയില്‍ ഇടംപിടിക്കാനായില്ല. എന്നാല്‍ ഈ പരാജയങ്ങളെ വെല്ലുവിളിയായി ഏറ്റെടുത്ത അദീബ നാലാം ശ്രമത്തില്‍ ലക്ഷ്യം കണ്ടു.

ലക്ഷ്യം സാമൂഹിക സേവനം

പാവപ്പെട്ടവര്‍ക്കും പെണ്‍കുട്ടികള്‍ക്കും വേണ്ടി പ്രവര്‍ത്തിക്കാനാണ് താന്‍ ആഗ്രഹിക്കുന്നതെന്ന് അദീബ വ്യക്തമാക്കുന്നു. വിദ്യാഭ്യാസം, ആരോഗ്യം എന്നീ മേഖലകളില്‍ വലിയ മാറ്റങ്ങള്‍ കൊണ്ടുവരാനാണ് ഈ യുവ ഐ.എ.എസ് ഓഫീസറുടെ തീരുമാനം. പരാജയങ്ങളില്‍ തളരാതെ തെറ്റുകള്‍ തിരുത്തി മുന്നേറാനാണ് സിവില്‍ സര്‍വീസ് മോഹിക്കുന്നവരോട് അദീബയ്ക്ക് പറയാനുള്ളത്.

 

 

അദീബയുടെ വാക്കുകള്‍:

പൊതുവേ സമൂഹത്തില്‍ പെണ്‍കുട്ടികളുടെ ഉന്നത വിദ്യാഭ്യാസത്തിന് പല തടസ്സങ്ങളും ഉണ്ടാകാറുണ്ട്. എന്നാല്‍ എന്റെ മാതാപിതാക്കള്‍ എനിക്ക് ഉറച്ച പിന്തുണ നല്‍കി. സമൂഹത്തിന്റെയും ദരിദ്ര്യ ചുറ്റുപാടിന്റെയും സമ്മര്‍ദ്ദം എന്നെ ബാധിക്കാചതെ പിതാവ് കാത്തുസൂക്ഷിച്ചു. സാമ്പത്തിക ബുദ്ധിമുട്ടുകള്‍ക്കിടയിലും മക്കളുടെ വിദ്യാഭ്യാസത്തിന് അദ്ദേഹം ഒരു കുറവും വരുത്തിയില്ല.

പ്രൊഫൈല്‍ ഒറ്റ നോട്ടത്തില്‍

* പേര്: അദീബ അനം 
* കുടുംബം: ഒരു ഓട്ടോറിക്ഷാ തൊഴിലാളിയായ അഷ്ഫാഖ് അഹമ്മദിന്റെ മകളാണ് അദീബ. കടുത്ത സാമ്പത്തിക പരിമിതികള്‍ക്കിടയിലും തന്റെ നാലാമത്തെ പരിശ്രമത്തിലാണ് അവര്‍ ഈ വിജയം നേടിയത്.
* റാങ്ക്: 2024ലെ യു.പി.എസ്.സി സിവില്‍ സര്‍വീസ് പരീക്ഷയില്‍ 142ാം റാങ്ക് അദീബ അനം കരസ്ഥമാക്കി.
* നേട്ടം: മഹാരാഷ്ട്രയിലെ യവത്മാല്‍  ജില്ലയില്‍ നിന്നുള്ള അദീബ, സംസ്ഥാനത്തുനിന്ന് ഈ പദവിയിലെത്തുന്ന ആദ്യ മുസ്ലിം വനിത എന്ന ചരിത്രനേട്ടമാണ് സ്വന്തമാക്കിയത്.
* വിദ്യാഭ്യാസം: ഉര്‍ദു മീഡിയം സ്‌കൂളിലായിരുന്നു പ്രാഥമിക വിദ്യാഭ്യാസം. തുടര്‍ന്ന് പുണെയിലെ ഇനാംദാര്‍ സീനിയര്‍ കോളേജില്‍ നിന്ന് മാത്തമാറ്റിക്‌സില്‍ ബിരുദം നേടി.

ALSO READ: ഇതാണ് മോട്ടിവേഷന്‍: സഊദിയിലെ ലക്ഷങ്ങളുടെ ജോലി ഉപേക്ഷിച്ചു, രണ്ട് മക്കളുടെ ഉമ്മ, നാല് ശസ്ത്രക്രിയകള്‍; പ്രതിസന്ധികളെ തോല്‍പ്പിച്ച് ബുഷ്‌റ ബാനു ഇപ്പോള്‍ ഐ.പി.എസ് ഓഫിസര്‍

Summary: In a historic achievement that has inspired thousands, Adiba Anam, the daughter of an auto-rickshaw driver from the drought-prone Yavatmal district, has become the first Muslim woman from Maharashtra to join the Indian Administrative Service (IAS). Securing an All India Rank of 142 in the UPSC Civil Services Examination, Adiba proved that financial constraints and social barriers are no match for sheer grit and determination.