മനാമ: ബഹ്‌റൈനിലെ ടെലികോം രംഗത്തെ പ്രധാന സ്ഥാപനമായ സെയ്ന്‍ ബഹ്‌റൈന്‍ 2025 സാമ്പത്തിക വര്‍ഷത്തിലെ ഫലങ്ങള്‍ പ്രഖ്യാപിച്ചു. വരുമാനത്തിലും ലാഭത്തിലും മുന്നേറ്റം കൈവരിച്ചതായി കമ്പനി അറിയിച്ചു.

കഴിഞ്ഞ വര്‍ഷം കമ്പനിയുടെ ആകെ വരുമാനം 82.41 മില്യണ്‍ ദിനാറായി ഉയര്‍ന്നു. മുന്‍വര്‍ഷത്തേക്കാള്‍ ഏകദേശം 6.7 ശതമാനം വര്‍ധനയാണ് രേഖപ്പെടുത്തിയിരിക്കുന്നത്. ശുദ്ധലാഭം 5.99 മില്യണ്‍ ദിനാറായി. കടുത്ത വിപണി മത്സരവും ചെലവുഭാരം നിലനിന്ന സാഹചര്യത്തിലും സ്ഥിരതയാര്‍ന്ന പ്രകടനം തുടരാനായെന്നാണ് അധികൃതര്‍ വ്യക്തമാക്കിയത്.

നാലാം പാദത്തില്‍ 21.66 മില്യണ്‍ ദിനാര്‍ വരുമാനം നേടാനായി. ഈ കാലയളവില്‍ വരുമാനം ഉയര്‍ന്നെങ്കിലും ശുദ്ധലാഭം 1.81 മില്യണ്‍ ദിനാറായി കുറഞ്ഞു. പ്രവര്‍ത്തന ചെലവുകളും വിപണി സാഹചര്യങ്ങളും ലാഭത്തില്‍ ചെറിയ കുറവിന് കാരണമായതായി കമ്പനി സൂചിപ്പിച്ചു.

ഓഹരിയുടമകള്‍ക്ക് ഓരോ ഓഹരിക്കും 9 ഫില്‍സ് വീതം ലാഭവിഹിതം നല്‍കാന്‍ ഡയറക്ടര്‍ ബോര്‍ഡ് ശുപാര്‍ശ ചെയ്തിട്ടുണ്ട്. കമ്പനിയുടെ സാമ്പത്തിക സ്ഥിരതയും ഭാവി വളര്‍ച്ചാപദ്ധതികളും പരിഗണിച്ചാണ് ഈ തീരുമാനം.

പരമ്പരാഗത ടെലികോം സേവനങ്ങളില്‍ നിന്നും ഡിജിറ്റല്‍ സേവനങ്ങളിലേക്കും ഐ.ടി. പരിഹാരങ്ങളിലേക്കും വിപുലീകരണം നടത്തുന്നതില്‍ കമ്പനി ശ്രദ്ധ കേന്ദ്രീകരിച്ചിരിക്കുകയാണ്. 'ബീഡേ' മൈക്രോഫിനാന്‍സ് പ്ലാറ്റ്‌ഫോം, 'സെയ്ന്‍ ഇന്‍ഷൂര്‍' ഇന്‍ഷുറന്‍സ് സേവനം തുടങ്ങിയ പുതിയ സംരംഭങ്ങളും ഇതിന്റെ ഭാഗമാണ്.

ALSO READ: ബഹ്‌റൈന്‍-സൗദി ബന്ധം ശക്തമാക്കാന്‍ കിരീടാവകാശികളുടെ കൂടിക്കാഴ്ച

കമ്പനിയിലെ ജീവനക്കാരില്‍ 93 ശതമാനത്തിലധികം പേര്‍ ബഹ്‌റൈന്‍ സ്വദേശികളാണെന്നും ദേശീയ തൊഴില്‍വത്കരണത്തില്‍ മുന്‍പന്തിയിലാണെന്നും അധികൃതര്‍ പറഞ്ഞു. ആകെ ആസ്തി 147.79 മില്യണ്‍ ദിനാറായി ഉയര്‍ന്നതും സാമ്പത്തിക നിലയുടെ ശക്തിയെ സൂചിപ്പിക്കുന്നതായി വിലയിരുത്തപ്പെടുന്നു.

സാങ്കേതിക നവീകരണങ്ങള്‍ക്കും ഡിജിറ്റല്‍ മേഖലകളിലുമുള്ള നിക്ഷേപം വര്‍ധിപ്പിച്ച് ഭാവിയിലും വളര്‍ച്ചയുടെ പാത തുടരാനാണ് കമ്പനി ലക്ഷ്യമിടുന്നത്.

Zain Bahrain has announced its 2025 financial results, reporting revenue growth to BD 82.41 million and a net profit of BD 5.99 million. The company also recommended a 9 fils dividend per share while continuing its digital expansion strategy.