ന്യൂഡൽഹി: കഴിഞ്ഞ അഞ്ച് വർഷത്തിനിടെ റോഡിലെ കുഴികളിൽ വീണ് ഉണ്ടാകുന്ന അപകട മരണങ്ങൾ 53 ശതമാനം വർധിച്ചതായി സർക്കാർ പാർലമെന്റിനെ അറിയിച്ചു. 2020 നും 2024 നും ഇടയിൽ രാജ്യത്തുടനീളം 9,438 പേർ ഇത്തരത്തിൽ കൊല്ലപ്പെട്ടത്. ഈ മരണങ്ങളിൽ 54 ശതമാനത്തിലധികവും ഉത്തർപ്രദേശിൽ നിന്നാണെന്നും റോഡ് ഗതാഗത, ദേശീയപാത മന്ത്രി നിതിൻ ഗഡ്കരി രേഖാമൂലം നൽകിയ മറുപടിയിൽ പറയുന്നു.

2021 ൽ മരണനിരക്ക് നേരിയ തോതിൽ കുറഞ്ഞുവെങ്കിലും അതിനുശേഷം ക്രമാനുഗതമായി വർദ്ധിച്ചുവരികയായിരുന്നു. 2024 ൽ മരണസംഖ്യ 2,385 ആയി ഉയർന്നു. 2020-ൽ 1,555 ആയിരുന്ന വാർഷിക മരണസംഖ്യ 2021-ൽ 1,481 ആയി നേരിയ കുറവുണ്ടായെങ്കിലും, അതിനുശേഷം എല്ലാ വർഷവും അത് വർധിച്ചുവരികയാണ്. മരണനിരക്ക് 2022-ൽ 1,856 ഉം 2023-ൽ 2,161 ഉം ആയി ഉയർന്നു, 2024-ൽ 2,385 ആയി ഉയർന്നു.

ALSO READ: വിദ്യാർത്ഥികളെ ടിപ്പറിൽ കുത്തിനിറച്ച് സ്റ്റഡി ടൂർ; ഹെഡ്മാസ്റ്റർക്ക് സസ്‌പെൻഷൻ

2020 നും 2024 നും ഇടയിൽ 5,127 മരണങ്ങൾ റിപ്പോർട്ട് ചെയ്ത ഉത്തർപ്രദേശാണ് സ്ഥിരമായി ഏറ്റവും കൂടുതൽ മരണങ്ങൾ രേഖപ്പെടുത്തിയത്. 2024 ൽ മാത്രം യുപിയിൽ 1,369 റോഡിലെ കുഴിയിൽ വീണുള്ള മരണങ്ങൾ ഉണ്ടായി. രാജ്യത്ത് ഉണ്ടായ ആകെ മരണങ്ങളുടെ പകുതിയിലധികമാണിത്. 2023 ൽ 1,320 ഉം 2022 ൽ 1,030 ഉം ആയിരുന്നു മരണം.

അഞ്ച് വർഷത്തിനിടെ മധ്യപ്രദേശിൽ 969 മരണങ്ങൾ റിപ്പോർട്ട് ചെയ്യപ്പെട്ടു, ഇതിൽ 2024-ൽ 277 മരണങ്ങളും ഉൾപ്പെടുന്നു. ഇതേ കാലയളവിൽ തമിഴ്‌നാട്ടിൽ 612 മരണങ്ങളും പഞ്ചാബിൽ 414 മരണങ്ങളും റിപ്പോർട്ട് ചെയ്തു.

മന്ത്രാലയത്തിന് സമർപ്പിച്ച സംസ്ഥാന പൊലിസ് റിപ്പോർട്ടുകളിൽ നിന്ന് ശേഖരിച്ച ഡാറ്റ പ്രകാരം, ആന്ധ്രാപ്രദേശ്, ബീഹാർ, ഗോവ എന്നിവയുൾപ്പെടെ ചില സംസ്ഥാനങ്ങൾ അഞ്ച് വർഷത്തെ കാലയളവിൽ കുഴികളുമായി ബന്ധപ്പെട്ട അപകടങ്ങളോ മരണങ്ങളോ റിപ്പോർട്ട് ചെയ്തിട്ടില്ല എന്നാണ്.

ALSO READ: ധീരം, ചരിത്രം; മഹാരാഷ്ട്രയിലെ സൗന്ദല ഇനി ജാതി രഹിത ഗ്രാമം, ഭരണഘടനയുടെ ആമുഖം അനുസരിച്ച് ജീവിക്കാൻ തീരുമാനം

ദേശീയതലത്തിൽ, ഈ കാലയളവിൽ കുഴികളുമായി ബന്ധപ്പെട്ട 23,056 അപകടങ്ങൾ റിപ്പോർട്ട് ചെയ്യപ്പെട്ടു. ഇതിന്റെ ഫലമായി 19,956 പേർക്ക് പരിക്കേറ്റു. ഇതിൽ 9,670 എണ്ണം 'ഗുരുതരമായ പരിക്കുകൾ' ആയി തരംതിരിച്ചിട്ടുണ്ട്.

അതേസമയം, ദേശീയപാതകളുടെ വികസനത്തിനും പരിപാലനത്തിനും കേന്ദ്രം ഉത്തരവാദിയാണെങ്കിലും, അവരുടെ അധികാരപരിധിയിലുള്ള റോഡുകളുടെ ഉത്തരവാദിത്തം അതത് സംസ്ഥാന സർക്കാരുകൾക്കാണെന്ന് മന്ത്രി നിതിൻ ഗഡ്കരി പ്രസ്താവിച്ചു.