കോഴിക്കോട്: കെ.പി.സി.സി പ്രസിഡന്റ് സ്ഥാനത്ത് മാറ്റം നിയമസഭാ തെരഞ്ഞെടുപ്പിന് ശേഷം. അതേസമയം, സണ്ണി ജോസഫ് മത്സരിക്കുമെന്ന് ഉറപ്പായതിനാൽ താൽക്കാലിക ചുമതല മുതിർന്ന നേതാവിന് കൈമാറും. യു.ഡി.എഫിന് ഭരണം ലഭിച്ചാൽ മന്ത്രിസ്ഥാനം നൽകാമെന്ന് സണ്ണി ജോസഫിന് ഹൈക്കമാൻഡിൽ നിന്ന് ഉറപ്പുലഭിച്ചിട്ടുണ്ട്. പുതിയ സർക്കാർ ചുമതലയേൽക്കുന്നതോടെ കെ.പി.സി.സിയുടെ തലപ്പത്തും മാറ്റമുണ്ടാകും. തെരഞ്ഞെടുപ്പ് സമയത്ത് ബെന്നി ബഹ്നാന് പ്രസിഡന്റിന്റെ ചുമതല നൽകാനാണ് നീക്കം. ഷാഫി പറമ്പിൽ, ആന്റോ ആന്റണി, കെ.സി ജോസഫ് എന്നിവരുടെ പേരുകളും താൽക്കാലിക അധ്യക്ഷസ്ഥാനത്തേക്ക് ചർച്ചയിലുണ്ട്. അതേസമയം, ബെന്നി ബഹ്നാന്റെ പേരിനാണ് മുൻഗണന. ആന്റോ ആന്റണിയെ സജീവമായി പരിഗണിച്ചിരുന്നെങ്കിലും അടുത്തകാലത്ത് അദ്ദേഹത്തിനെതിരേ വന്ന തുടർച്ചയായ വിവാദങ്ങളാണ് നേതൃത്വത്തെ മാറ്റി ചിന്തിപ്പിച്ചത്. 

സിറ്റിങ് എം.എൽ.എമാരിൽ വി.ഡി സതീശൻ, രമേശ് ചെന്നിത്തല, സണ്ണി ജോസഫ് എന്നിവർ ഒന്നാംഘട്ട സ്ഥാനാർഥിപട്ടികയിൽ ഉൾപ്പെടുമെന്ന് ഉറപ്പാണ്. ഈ പട്ടിക പുറത്തുവരുന്നതിന് പിന്നാലെ കെ.പി.സി.സിയുടെ താൽക്കാലിക അധ്യക്ഷനെയും പ്രഖ്യാപിക്കും. 

ALSO READ: ബംഗ്ലാദേശിൽ ബി.എൻ.പി സർക്കാർ നാളെ അധികാരമേൽക്കും; 17 വർഷത്തെ പ്രവാസ ജീവിതത്തിന് ശേഷം പ്രധാനമന്ത്രി പദത്തിലേക്ക് താരിഖ് റഹ്‌മാൻ  

തെരഞ്ഞെടുപ്പിന് ശേഷമായിരിക്കും സ്ഥിരം അധ്യക്ഷനെ നിയമിക്കുക. ബെന്നി ബഹ്നാനെ കൂടാതെ മറ്റു പേരുകളും പരിഗണിക്കപ്പെട്ടേക്കാം. മന്ത്രിസ്ഥാനത്ത് നിന്ന് മാറ്റിനിർത്തപ്പെടുന്ന മുതിർന്ന നേതാക്കളെയും പരിഗണിക്കേണ്ടിവരും. മന്ത്രിസഭയിലെ സാമുദായിക പ്രാതിനിധ്യം കൂടി കണക്കിലെടുത്താവും പുതിയ അധ്യക്ഷനെ നിശ്ചയിക്കുക. കോൺഗ്രസിൽ നിന്ന് രണ്ടിൽ കൂടുതൽ ക്രൈസ്തവ വിഭാഗത്തിൽപെട്ട മന്ത്രിമാർ ഉണ്ടായാൽ കെ.പി.സി.സി പ്രസിഡന്റ് സ്ഥാനത്ത് മറ്റു സമുദായങ്ങളിൽപെട്ടവർക്കാകും മുൻഗണന. 

കെ.പി.സി.സി വർക്കിങ് പ്രസിഡന്റുമാരിൽ പി.സി വിഷ്ണുനാഥും എ.പി അനിൽ കുമാറും സിറ്റിങ് എം.എൽ.എമാരായതിനാൽ മത്സരരംഗത്തുണ്ടാകും. കെ.പി.സി.സി മുൻ അധ്യക്ഷൻ മുല്ലപ്പള്ളി രാമചന്ദ്രൻ കോഴിക്കോട് ജില്ലയിൽ നിന്ന് മത്സരിക്കാൻ സാധ്യതയേറി. കൊയിലാണ്ടി, നാദാപുരം സീറ്റുകളിലാണ് അദ്ദേഹത്തിന്റെ പേരുകൾ പരിഗണനയിലുള്ളത്. കണ്ണൂരിൽ മത്സരിക്കാൻ കെ. സുധാകരൻ താൽപര്യം അറിയിച്ചിട്ടുണ്ട്. യു.ഡി.എഫ് കൺവീനർ അടൂർ പ്രകാശും നിയമസഭയിലേക്ക് താൽപര്യം പ്രകടിപ്പിച്ചിരുന്നു. എന്നാൽ, ശബരിമല സ്വർണക്കൊള്ള കേസിലെ പ്രതി ഉണ്ണികൃഷ്ണൻ പോറ്റിയുമായുള്ള ബന്ധം വിവാദമായതിന്റെ പശ്ചാത്തലത്തിൽ അദ്ദേഹം മത്സരരംഗത്തുണ്ടാവില്ല.

change in the kpcc president post will take place after the legislative assembly election. meanwhile, as it is certain that sunny joseph will contest, the temporary charge will be handed over to a senior leader.