തിരുവനന്തപുരം: കെഎസ്ആർടിസി മാനേജ്‌മെന്റിന്റെ കടുത്ത അച്ചടക്ക നടപടിക്കു വിധേയനായ ജീവനക്കാരന് ഹൈക്കോടതിയിൽ നിന്ന് അനുകൂല വിധി. യൂണിയൻ മാസികയിൽ ലേഖനം എഴുതിയതിന്റെ പേരിൽ ചീഫ് ഓഫീസിലെ എസ്റ്റേറ്റ് വിഭാഗം അസിസ്റ്റന്റ് ശിവകുമാർ എസിനെതിരെ എടുത്ത സ്ഥലംമാറ്റ ഉത്തരവാണ് കോടതി റദ്ദാക്കിയത്.

കോൺഗ്രസ് അനുകൂല സംഘടനയായ കേരള സ്റ്റേറ്റ് ട്രാൻസ്‌പോർട്ട് വർക്കേഴ്‌സ് യൂണിയന്റെ (TDF) മുഖപത്രത്തിൽ ലേഖനം പ്രസിദ്ധീകരിച്ചതാണ് മാനേജ്‌മെന്റിനെ ചൊടിപ്പിച്ചത്. അഭിപ്രായസ്വാതന്ത്ര്യത്തിന്മേലുള്ള കടന്നുകയറ്റമാണ് ഇതെന്ന വാദം ശരിവെച്ചുകൊണ്ടാണ് കോടതിയുടെ സുപ്രധാന ഇടപെടൽ ഉണ്ടായിരിക്കുന്നത്.

ALSO READ: മരണത്തിലും അഞ്ചുപേർക്ക് പുതുജീവനേകി ആലിൻ ഷെറിൻ വിടവാങ്ങി; ഗാർഡ് ഓഫ് ഓണർ നൽകി ആശുപത്രി ജീവനക്കാർ; ആംബുലൻസ് തിരുവനന്തപുരത്തെത്തി

'കെഎസ്ആർടിസി: പ്രതിസന്ധികളിൽ നിന്ന് പ്രത്യാശയിലേക്ക് ഒരു പുനർവിചിന്തനം' എന്ന തലക്കെട്ടിലായിരുന്നു ശിവകുമാർ ലേഖനം തയാറാക്കിയത്. സ്ഥാപനം നേരിടുന്ന ഗുരുതരമായ പ്രതിസന്ധികളെക്കുറിച്ചും മാനേജ്‌മെന്റിന്റെ വീഴ്ചകളെക്കുറിച്ചും ലേഖനത്തിൽ കൃത്യമായി പ്രതിപാദിച്ചിരുന്നു.

കെഎസ്ആർടിസിയിലെ കെടുകാര്യസ്ഥതയും സാമ്പത്തിക തകർച്ചയുമാണ് ലേഖനത്തിലെ പ്രധാന വിമർശന വിഷയങ്ങൾ. കൃത്യസമയത്ത് ശമ്പളവും പെൻഷനും ലഭിക്കാത്തത് ജീവനക്കാരുടെ ജീവിതത്തെ എങ്ങനെ ബാധിക്കുന്നുവെന്ന് ലേഖനം എണ്ണിയെണ്ണി പറഞ്ഞു.

സർക്കാരിന്റെ നയങ്ങളെയും കോർപ്പറേഷന്റെ നിലവിലെ പോക്കിനെയും ലേഖനത്തിലൂടെ അദ്ദേഹം രൂക്ഷമായി വിമർശിച്ചിരുന്നു. കട്ടപ്പുറത്തിരിക്കുന്ന ബസുകളും വർധിച്ചുവരുന്ന കടക്കെണിയും സ്ഥാപനത്തെ തകർക്കുകയാണെന്ന നിരീക്ഷണവും ലേഖനത്തിൽ ജീവനക്കാരൻ പങ്കുവെച്ചിരുന്നു.

യുഡിഎഫിന്റെ വികസന മാതൃകകൾ പിന്തുടരുന്നതിലൂടെ മാത്രമേ കെഎസ്ആർടിസിക്ക് പഴയ പ്രതാപം തിരിച്ചുപിടിക്കാനാകൂ എന്ന രാഷ്ട്രീയപരമായ അഭിപ്രായപ്രകടനവും ലേഖനത്തിലുണ്ടായിരുന്നു. ഇതാണ് സർക്കാരിനെയും മാനേജ്‌മെന്റിനെയും കൂടുതൽ പ്രകോപിപ്പിച്ചത്.

ലേഖനം പുറത്തുവന്നതിന് പിന്നാലെ പ്രതികാര നടപടിയെന്നോണം ശിവകുമാറിനെ തിരുവനന്തപുരത്തുനിന്ന് കാസർകോട്ടേക്ക് സ്ഥലം മാറ്റുകയായിരുന്നു. ദൂരസ്ഥലത്തേക്കുള്ള ഈ മാറ്റം അച്ചടക്ക നടപടിയുടെ ഭാഗമായാണെന്ന് വ്യക്തമായതോടെയാണ് ജീവനക്കാരൻ കോടതിയെ സമീപിച്ചത്.

കോടതി ഉത്തരവ് വന്നിട്ടും സ്ഥലംമാറ്റം റദ്ദാക്കാൻ മാനേജ്‌മെന്റ് തയ്യാറാകാതിരുന്നത് വലിയ പ്രതിഷേധങ്ങൾക്ക് വഴിവെച്ചു. ഇതേത്തുടർന്ന് ടിഡിഎഫ് പ്രവർത്തകർ അഡ്മിനിസ്ട്രേറ്റീവ് വിഭാഗം എക്സിക്യൂട്ടീവ് ഡയറക്ടറെ (ED) ഓഫിസിൽ ഉപരോധിക്കുന്ന സാഹചര്യം വരെയുണ്ടായി.

യൂണിയനുകളുടെ ശക്തമായ പ്രതിഷേധത്തിനും കോടതിയുടെ കർശന നിർദ്ദേശത്തിനും പിന്നാലെ മാനേജ്‌മെന്റ് വഴങ്ങുകയായിരുന്നു. ഒടുവിൽ സ്ഥലംമാറ്റം പിൻവലിച്ചുകൊണ്ട് കെഎസ്ആർടിസി പുതിയ ഉത്തരവിറക്കി ശിവകുമാറിനെ പഴയ തസ്തികയിൽ തന്നെ നിയമിച്ചു.

The Kerala High Court has quashed the transfer of a KSRTC employee who was shifted from Thiruvananthapuram to Kasaragod as a disciplinary measure. The action was taken after he wrote an article in a union magazine criticizing the management's inefficiency and the corporation's financial crisis. Following the court order and intense protests by the TDF union, the KSRTC management has finally revoked the transfer.