ടി-20 ലോകകപ്പിൽ കഴിഞ്ഞ ദിവസം നടന്ന ആവേശ പോരാട്ടത്തിൽ പാകിസ്ഥാനെ 61 റൺസിന് പരാജയപ്പെടുത്തി ഇന്ത്യ സൂപ്പർ 8ലേക്ക് മുന്നേറിയിരിക്കുകയാണ്.  കൊളംബോയിലെ ആർ പ്രേമദാസ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഇന്ത്യ 20 ഓവറിൽ ഏഴ് വിക്കറ്റ് നഷ്ടത്തിൽ 175 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ പാകിസ്ഥാൻ 18 ഓവറിൽ 114 റൺസിന് പുറത്തായി. 

ഇന്ത്യക്കായി ഇഷാൻ കിഷാനാണ് മികച്ച പ്രകടനം നടത്തിയത്. 40 പന്തിൽ 77 റൺസാണ് ഇഷാന്റെ ബാറ്റിൽ നിന്നും പിറന്നത്. 10 ഫോറുകളും മൂന്ന് സിക്സുകളും അടങ്ങുന്നതാണ് താരത്തിന്റെ പ്രകടനം. ക്യാപ്റ്റൻ സൂര്യകുമാർ യാദവ് 29 പന്തിൽ 32 റൺസും നേടി. ശിവം ദുബെ 27 റൺസും തിലക് വർമ്മ 25 റൺസും നേടി ഇന്ത്യക്ക് മാന്യമായ ടോട്ടൽ നൽകുന്നതിൽ നിർണായകമായി.

ഇപ്പോൾ മത്സരത്തിലെ ശിവം ദുബെയുടെ പ്രകടനത്തെക്കുറിച്ച് സംസാരിച്ചിരിക്കുകയാണ് മുൻ ഇന്ത്യൻ താരം ഇർഫാൻ പത്താൻ. ദുബെയുടെ പ്രകടനങ്ങൾ അധികമാരും ശ്രദ്ധിക്കപ്പെടാറില്ലെന്നും സമർദ്ദങ്ങളിൽ ഇന്ത്യക്കായി ദുബെ മികച്ച പ്രകടനം നടത്താറുണ്ടെന്നുമാണ് ഇർഫാൻ പത്താൻ പറഞ്ഞത്. 

''നന്നായി കളിച്ച മറ്റൊരു താരം കൂടിയുണ്ട്. പലപ്പോഴും ശ്രദ്ധിക്കപ്പെടാതെ പോവുന്ന താരമാണ് ദുബെ. അവൻ ഏഷ്യ കപ്പ് ഫൈനലിലും 2024 ടി-20 ലോകകപ്പ് ഫൈനലിലും ഇപ്പോൾ പാകിസ്ഥാനെതിരെയും അവസാന സമയങ്ങളിൽ ടീമിന് വേണ്ടി ചെറിയ പ്രകടനം നടത്തി. അവന് ഹിറ്റ് ചെയ്യാനുള്ള കഴിവ് വളരെ വലുതാണ്'' ഇർഫാൻ പത്താൻ തന്റെ യുട്യൂബ് ചാനലിലൂടെ പറഞ്ഞു. 

ഇന്ത്യൻ ബൗളിങ്ങിൽ ജസ്പ്രീത് ബുംറ,  ഹർദിക് പാണ്ഡ്യ,  അക്‌സർ പട്ടേൽ,  വരുൺ ചക്രവർത്തി എന്നിവർ രണ്ട് വീതം വിക്കറ്റുകളും കുൽദീപ് യാദവ്‌, തിലക് വർമ്മ എന്നിവർ ഓരോ വിക്കറ്റും സ്വന്തമാക്കിയപ്പോൾ പാകിസ്ഥാന്റെ ബാറ്റിംഗ് തകരുകയായിരുന്നു.  ഫെബ്രുവരി 18ന് നടക്കുന്ന അടുത്ത മത്സരത്തിൽ നെതർലാൻഡ്സ് ആണ് ഇന്ത്യയുടെ എതിരാളികൾ.

India have advanced to the Super 8s after defeating Pakistan by 61 runs in a thrilling match in the T20 World Cup yesterday. Former Indian player Irfan Pathan has spoken about Shivam Dubey's performance in the match. Irfan Pathan said that Dubey's performances are not noticed by many and that Dubey performs well for India under pressure.