ന്യൂയോര്‍ക്ക്: ഗസയിലെ ഇസ്രാഈല്‍ വംശഹത്യക്കെതിരെ പ്രതികരിച്ച ഫലസ്തീന്‍ ബിരുദ വിദ്യാര്‍ഥി മൊഹ്‌സിന്‍ മഹ്ദവിയെ നാടുകടത്താനുള്ള ട്രംപ് ഭരണകൂടത്തിന്റെ നീക്കത്തിന് തിരിച്ചടി. മഹ്ദവിയെ തിരിച്ചയക്കാനുള്ള തീരുമാനം തടഞ്ഞ് എമിഗ്രേഷന്‍ വിഭാഗം ജഡ്ജി നീന ഫ്രോസ് ഉത്തരവിറക്കി. യുവാവിനെതിരെ സര്‍ക്കാര്‍ ഹാജരാക്കിയ ഔദ്യോഗികരേഖ ശരിയായി സാക്ഷ്യപ്പെടുത്താത്തതിനെ തുടര്‍ന്നാണ് കോടതി നടപടി. 

കൊളംബിയ സര്‍വകലാശാലയിലെ ബിരുദ വിദ്യാര്‍ഥിയായ മെഹ്ദവി ഫലസ്തീന്‍ അനുകൂല പ്രതിഷേധങ്ങളുടെ മുന്‍നിര പോരാളിയായിരുന്നു. പത്ത് വര്‍ഷത്തിലേറെയായി യുഎസില്‍ നിയമപരമായി സ്ഥിര താമസമാക്കിയ മഹ്ദവി, ഇസ്രാഈല്‍ അധിനിവേശ വെസ്റ്റ് ബാങ്കിലെ അഭയാര്‍ഥി ക്യാമ്പിലാണ് ജനിച്ചത്. കഴിഞ്ഞ ഏപ്രിലില്‍ പൗരത്വ അഭിമുഖത്തിനിടെ യുഎസ് എമിഗ്രേഷന്‍ ഏജന്റുമാര്‍ അദ്ദേഹത്തെ അറസ്റ്റ് ചെയ്തിരുന്നു. പിന്നീട് കോടതി വിട്ടയച്ചു. നിയമവിരുദ്ധമായി തടങ്കലില്‍ വെച്ചെന്ന് ചൂണ്ടിക്കാട്ടി സര്‍ക്കാര്‍ നടപടിക്കെതിരെ മഹ്ദവി ജില്ലാ കോടതിയില്‍ കേസ് നല്‍കുകയും ചെയ്തിരുന്നു. 

ALSO READ: ട്രംപിന്റെ ജനപ്രീതി ഇടിയുന്നു; യുഎസ് ചരിത്രത്തിലെ മോശം ഭരണാധികാരിയെന്ന് ജനവിധി; 2026 മിഡ് ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് ആശങ്ക 

അതേസമയം ഫലസ്തീന്‍ അനുകൂല കാമ്പസ് ആക്ടിവിസ്റ്റുകളെയും ഇസ്രാഈലിനെ വിമര്‍ശിക്കുന്നവരെയും പുറത്താക്കാനുള്ള ട്രംപ് ഭരണകൂടത്തിന്റെ നടപടികള്‍ക്കെതിരായ വിജയമായാണ് കോടതി വിധിയെ കാണുന്നത്. കഴിഞ്ഞ മാസം ഫറ്റ്‌സ് യൂണിവേഴ്‌സിറ്റി ബിരുദ വിദ്യാര്‍ഥിയായ റുമേയ്‌സ ഒസ്ടര്‍ക്കിനെ നാടുകടത്താനുള്ള ശ്രമവും എമിഗ്രേഷന്‍ അധികൃതര്‍ തടഞ്ഞിരുന്നു. വിദേശ നയത്തിലെ താല്‍പര്യങ്ങളെ ദുര്‍ബലപ്പെടുത്തിയാല്‍ അവരെ പുറത്താക്കാമെന്ന സ്റ്റേറ്റ് സെക്രട്ടറി മാര്‍ക്കോ റൂബിയോയുടെ മെമ്മോ ഉദ്ധരിച്ച് ആക്ടിവ്‌സ്റ്റുകള്‍ക്കെതിരെ നടപടിയെടുക്കല്‍ ട്രംപ് ഭരണകൂടം തുടരുകയാണ്.