2026 ടി-20 ലോകകപ്പ് ചാമ്പ്യന്മാർ ആരായിരിക്കുമെന്ന ആകാംക്ഷയിലാണ് ക്രിക്കറ്റ് ലോകം. നാളെ നടക്കുന്ന കിരീട പോരാട്ടത്തിൽ ഇന്ത്യയും ന്യൂസിലാൻഡുമാണ് നേർക്കുനേർ എത്തുന്നത്. അഹമ്മദാബാദിലെ നരേന്ദ്രമോദി സ്റ്റേഡിയത്തിൽ നടക്കുന്ന ആവേശകരമായ ഫൈനലിൽ തുടർച്ചയായ രണ്ടാം കിരീടം ലക്ഷ്യമിട്ടായിരിക്കും  സൂര്യകുമാർ യാദവും സംഘവും കളത്തിൽ ഇറങ്ങുന്നത്. എന്നാൽ മറുഭാഗത്ത് ചരിത്രത്തിലെ ആദ്യ ടി-20 കിരീടം സ്വന്തമാക്കാമായിരിക്കും മിച്ചൽ സാന്റ്നറും സംഘവും ലക്ഷ്യം വെക്കുക. 

ഇപ്പോൾ ഫൈനൽ മത്സരത്തിന് മുന്നോടിയായി കിരീട പ്രതീക്ഷകളെക്കുറിച്ച് സംസാരിച്ചിരിക്കുകയാണ് കിവീസ് നായകൻ സാന്റ്നർ. ആദ്യ ലോകകപ്പ് നേടാനായി ഇന്ത്യയുടെ ഹൃദയം തകർക്കേണ്ടി വന്നാലും കുഴപ്പമില്ലെന്നാണ് സാന്റ്നർ ഫൈനലിന് മുമ്പുള്ള പത്ര സമ്മേളനത്തിൽ പറഞ്ഞത്. സ്വന്തം മണ്ണിൽ ലോകകപ്പ് നേടുകയെന്നത് ഇന്ത്യക്ക് മുകളിൽ വലിയ സമ്മർദ്ദമുണ്ടാക്കുമെന്നും ന്യൂസിലാൻഡ് നായകൻ വ്യക്തമാക്കി. 

''ഞങ്ങൾ ഫേവറൈറ്റുകൾ  അല്ലെന്ന് എല്ലാവർക്കും അറിയാം. എന്നാൽ അതിൽ ഞങ്ങൾക്ക് ഒരു കുഴപ്പവുമില്ല. ടീം എന്ന നിലയിൽ മികച്ച പ്രകടനം നടത്തിയാൽ കിരീടം ഉയർത്താൻ ഞങ്ങൾക്ക് സാധിക്കും. ആദ്യ കിരീടം നേടുന്നതിന് വേണ്ടി കുറച്ച് ഹൃദയം തകർക്കേണ്ടി വന്നാലും കുഴപ്പമില്ല. ടി-20 ക്രിക്കറ്റിൽ ഒരുപാട് മാറ്റങ്ങൾ ഉണ്ടാകാം. ചിലപ്പോൾ അത് പ്രവചനാതീതവുമാണ്.  ഈ ലോകകപ്പിൽ  നമ്മൾ കണ്ടതാണ് എല്ലാ ടീമുകളും ഒരേ നിലവാരത്തിലുള്ളവരാണെന്നത്. ഓരോ മത്സരത്തിന്റെയും റിസൾട്ട് നിശ്ചയിക്കുന്നത്  നിർണായകമായ ചില ചെറിയ മാറ്റങ്ങളാണ്.

കഴിഞ്ഞ ദിവസം നമ്മൾ കണ്ടതാണ്.  സൗത്ത് ആഫ്രിക്ക ടൂർണമെന്റിൽ മികച്ച ക്രിക്കറ്റ് കളിച്ചു.  എന്നാൽ ഞങ്ങൾക്ക് മുന്നിൽ അവർക്ക് ഒരു ചെറിയ പിഴവ് സംഭവിച്ചു. അവർ പുറത്തായി.  ഞങ്ങളുടെ ശൈലിയിൽ മുന്നോട്ടു പോയാൽ മറ്റൊരു വലിയ ടീമിനെ കൂടി അട്ടിമറിക്കാൻ കഴിയുമെന്ന ആത്മവിശ്വാസം ഞങ്ങൾക്കുണ്ട്. സ്വന്തം നാട്ടിൽ ഈ ലോകകപ്പ് ജയിക്കണമെന്ന് വലിയ സമ്മർദ്ദം ഇന്ത്യയുടെ മുകളിലുണ്ട്. നേരത്തെ പറഞ്ഞത് പോലെ സ്വന്തം മണ്ണിൽ ലോകകപ്പ് ജയിക്കുക എന്നത് വലിയൊരു കാര്യമാണ്. ഇതിനൊപ്പം തന്നെ ഇത് വലിയ സമ്മർദ്ദവും നൽകുന്നുണ്ട്" മിച്ചൽ സാന്റ്നർ പറഞ്ഞു. 

The cricket world is eagerly waiting to see who will be the champions of the 2026 T20 World Cup. India and New Zealand will face off in the title fight tomorrow. Now, ahead of the final match, Kiwis captain Santner has spoken about his hopes for the title. Santner said in the pre-final press conference that it is okay to break India's heart to win the first World Cup. The New Zealand captain also stated that winning the World Cup on home soil will put a lot of pressure on India.