പന്തളം: വിദേശത്ത് നഴ്സായ യുവതിയെ വിവാഹവാഗ്ദാനം നൽകി പീഡിപ്പിക്കുകയും ലക്ഷക്കണക്കിന് രൂപ തട്ടിയെടുക്കുകയും ചെയ്ത കേസിൽ സുവിശേഷകൻ പിടിയിലായി. തിരുവനന്തപുരം അഞ്ചുതെങ്ങ് സ്വദേശി സാം ഹാർട്ടറെയാണ് (37) പന്തളം പൊലിസ് സാഹസികമായി പിടികൂടിയത്. തൃശ്ശൂരിലെ ഇരിങ്ങാലക്കുടയിൽ ഒളിവിൽ കഴിയുകയായിരുന്നു ഇയാൾ.

സംഭവം ഇങ്ങനെ

വിദേശത്ത് ജോലി ചെയ്യുന്ന യുവതിയെ വിവാഹം കഴിക്കാമെന്ന് വിശ്വസിപ്പിച്ച് ഇയാൾ ശാരീരികമായി ചൂഷണം ചെയ്യുകയായിരുന്നു. വിശ്വാസം നേടിയെടുത്ത ശേഷം പലപ്പോഴായി യുവതിയുടെ കൈവശം നിന്നും 16 ലക്ഷം രൂപയും ഇയാൾ തട്ടിയെടുത്തു.പ്രതിയായ സാം ഹാർട്ടർക്ക് എതിരെ നേരത്തെയും സാമ്പത്തിക തട്ടിപ്പ് കേസുകളുണ്ട്. പത്തനംതിട്ട, തിരുവല്ല പൊലിസ് സ്റ്റേഷനുകളിൽ ഇയാൾക്കെതിരെ കേസുകൾ നിലവിലുണ്ടെന്ന് പൊലിസ് അറിയിച്ചു.

പന്തളം എസ്.എച്ച്.ഒ ടി.ഡി. പ്രജീഷിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് ഇരിങ്ങാലക്കുടയിൽ നിന്ന് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.എസ്.എച്ച്.ഒ ടി.ഡി പ്രജീഷ്, എസ്.ഐ രാജൻ പി.കെ, എ.എസ്.ഐ ബി. ഷൈൻ, സി.പി.ഒമാരായ അൻവർഷ, രഞ്ജിത്ത്, നിയാസ് എന്നിവരടങ്ങുന്ന സംഘമാണ് പ്രതിയെ വലയിലാക്കിയത്.