കോഴിക്കോട്: തൊട്ടിൽപ്പാലം നാമ്പിലാട് ആളൊഴിഞ്ഞ പറമ്പിൽ യുവതിയെയും യുവാവിനെയും തൂങ്ങിമരിച്ച നിലയിൽ കണ്ടെത്തി. പേരാമ്പ്ര കുയിമ്പിൽ സ്വദേശിനി തട്ടാൻകണ്ടി ശരണ്യ (30), കുറ്റ്യാടി കള്ളാട് സ്വദേശി പഞ്ചാര പറമ്പത്ത് അജേഷ് (34) എന്നിവരെയാണ് മരിച്ച നിലയിൽ കണ്ടെത്തിയത്.

ഒരേ കൊമ്പിൽ തൂങ്ങിയ നിലയിൽ

നാമ്പിലാട് ഭാഗത്തെ ആളൊഴിഞ്ഞ പറമ്പിലെ കശുമാവ് മരത്തിന്റെ ഒരേ കൊമ്പിലാണ് ഇരുവരെയും തൂങ്ങിയ നിലയിൽ കണ്ടെത്തിയത്. ഇന്ന് ഉച്ചയോടെയാണ് നാട്ടുകാർ മൃതദേഹങ്ങൾ കണ്ടത്. തുടർന്ന് തൊട്ടിൽപ്പാലം പൊലിസിനെ വിവരമറിയിക്കുകയായിരുന്നു.

കാണാതായതിനെ തുടർന്ന് തിരച്ചിൽ

രണ്ട് മക്കളുടെ അമ്മയായ ശരണ്യയെ ഇന്ന് രാവിലെ മുതൽ വീട്ടിൽ നിന്നും കാണാതായിരുന്നു. ബന്ധുവീടുകളിലും മറ്റും തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് വീട്ടുകാർ പേരാമ്പ്ര പൊലിസ് സ്റ്റേഷനിൽ പരാതി നൽകുകയും പൊലിസ് അന്വേഷണം ആരംഭിക്കുകയും ചെയ്ത ഘട്ടത്തിലാണ് മരണവാർത്ത പുറത്തുവരുന്നത്. മരിച്ച അജേഷ് അവിവാഹിതനാണ്.

പൊലിസ് അന്വേഷണം

സംഭവസ്ഥലത്തെത്തിയ പൊലിസ് ഇൻക്വസ്റ്റ് നടപടികൾ പൂർത്തിയാക്കി. ഇരുവരുടെയും മരണത്തിലേക്ക് നയിച്ച കാരണങ്ങൾ വ്യക്തമല്ല. ആത്മഹത്യയാണെന്നാണ് പ്രാഥമിക നിഗമനമെങ്കിലും കൂടുതൽ വിവരങ്ങൾക്കായി പൊലിസ് ശാസ്ത്രീയ പരിശോധനകൾ നടത്തിവരികയാണ്. മൃതദേഹങ്ങൾ പോസ്റ്റ്‌മോർട്ടത്തിനായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.