ദുബൈ: ദുബൈ ക്രീക്ക് ഹാര്‍ബറിന് സമീപമുള്ള കെട്ടിടത്തിന് മുകളില്‍ ഡ്രോണ്‍ പതിച്ചതിനെ തുടര്‍ന്നുണ്ടായ തീ പൂര്‍ണ്ണമായും അണച്ചതായും കെട്ടിടത്തിലെ താമസക്കാരെല്ലാം സുരക്ഷിതരാണെന്നും അധികൃതര്‍ സ്ഥിരീകരിച്ചതായി ദുബൈ മീഡിയാ ഓഫീസ് അറിയിച്ചു.
കെട്ടിടത്തില്‍ ഡ്രോണ്‍ പതിച്ചതിന് പിന്നാലെയുണ്ടായ ചെറിയ തീപിടിത്തം സിവില്‍ ഡിഫന്‍സ് സംഘം അതിവേഗം ഇടപെട്ട് നിയന്ത്രണവിധേയമാക്കുകയായിരുന്നു. സംഭവത്തില്‍ ആര്‍ക്കും പരിക്കേറ്റിട്ടില്ലെന്ന് ഉദ്യോഗസ്ഥര്‍ വ്യക്തമാക്കി.
അധികൃതര്‍ സ്ഥിതിഗതികള്‍ നിരീക്ഷിച്ചുവരികയാണെന്നും, കൃത്യമായ വിവരങ്ങള്‍ക്കായി ഔദ്യോഗിക കേന്ദ്രങ്ങളെ മാത്രം ആശ്രയിക്കാന്‍ താമസക്കാര്‍ ശ്രദ്ധിക്കണമെന്നും നിര്‍ദേശം നല്‍കിയിട്ടുണ്ട്.
ഇന്നലെ ദുബൈ അന്താരാഷ്ട്ര വിമാനത്താവളത്തിന് (DXB) സമീപം രണ്ട് ഡ്രോണുകള്‍ പതിച്ചിരുന്നു. വിമാനത്താവളത്തിന് സമീപം ഡ്രോണുകള്‍ പതിച്ചതിനെ തുടര്‍ന്ന് ഇന്ത്യക്കാരന്‍ അടക്കം നാല് പേര്‍ക്ക് പരിക്കേറ്റു.

Summary: Authorities have confirmed that the fire has been fully contained and all residents in the building are safe following an incident in which a drone fell on a building near Dubai Creek Harbour, the Dubai Media Office said.