ടി-20 ലോകകപ്പ് വിജയത്തിന് ശേഷമുള്ള ആഘോഷത്തിനിടെ ദേശിയ പതാകയെ അപമാനിച്ചുവെന്ന് ആരോപിച്ച ഇന്ത്യൻ ഓൾ റൗണ്ടർ ഹർദിക് പാണ്ഡ്യക്കെതിരെ പരാതി. അഭിഭാഷകമായ വാജിദ് ഖാനാണ് ശിവാജി നഗർ പൊലിസ് സ്റ്റേഷനിൽ പരാതി നൽകിയത്. ലോകകപ്പ് വിജയത്തിന് ശേഷം ഹർദിക് ദേശീയ പതാക ശരീരത്തിൽ ചുറ്റുകയും മോശമായ രീതിയിൽ പെരുമാറുകയും ചെയ്തുവെന്നാണ് പരാതി. ഹർദികിന്റെ പ്രവർത്തി നിയമലംഘനമാണെന്നും ദേശീയ പതാകയുടെ അന്തസ്സ് കാത്തുസൂക്ഷിക്കേണ്ടത് ഓരോ പൗരന്റെയും കടമയാണെന്നും പരാതിയിൽ പറയുന്നുണ്ട്. 

അഹമ്മദാബാദ് നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ കിവികളെ 96 റൺസിന്‌ വീഴ്ത്തിയാണ് ഇന്ത്യ കിരീടം ചൂടിയത്. മത്സരത്തിൽ ആദ്യം ബാറ്റ് ചെയ്ത ഇന്ത്യ അഞ്ചു വിക്കറ്റ് നഷ്ടത്തിൽ 255 റൺസാണ് നേടിയത്. കൂറ്റൻ വിജയലക്ഷ്യം പിന്തുടർന്ന കിവീസ് ഇന്നിംഗ്സ് 19 ഓവറിൽ 159 റൺസിൽ അവസാനിക്കുകയായിരുന്നു. 

മൂന്നാം ടി-20 കിരീട നേട്ടത്തോടെ ഏറ്റവും കൂടുതൽ ടി-20 ലോകകപ്പുകൾ സ്വന്തമാക്കുന്ന ടീമെന്ന നേട്ടവും ഇന്ത്യ സ്വന്തമാക്കി. ഇതിന് മുമ്പ് 2007ലും 2024ലുമാണ് ഇന്ത്യ ചാമ്പ്യന്മാരായത്. തുടർച്ചയായി രണ്ട് തവണ ടി-20 ലോകകപ്പ് സ്വന്തമാക്കുന്ന ചരിത്രത്തിലെ ആദ്യ ടീമായി മാറാനും ഇന്ത്യക്ക് സാധിച്ചു. ടി-20 ലോകകപ്പ് നേടുന്ന ആദ്യ ആതിഥേയ രാജ്യം കൂടിയാണ് ഇന്ത്യ.  

ഇന്ത്യയുടെ കിരീടനേട്ടത്തോടൊപ്പം തന്റെ ഇനിയുള്ള ലക്ഷ്യം എന്താണെന്ന് സ്റ്റാർ ഓൾ റൗണ്ടർ ഹർദിക് പാണ്ഡ്യ വ്യക്തമാക്കുകയും ചെയ്തിരുന്നു.  ഇന്ത്യക്കൊപ്പം 10 ഐസിസി കിരീടങ്ങൾ കൂടി നേടുകയാണ് തന്റെ ലക്ഷ്യമെന്നാണ് ഹർദിക് പറഞ്ഞത്. ഇനിയും 10 വർഷം കൂടി കളിക്കാൻ തനിക്ക് സാധിക്കുമെന്നും ഹർദിക് പറഞ്ഞു. 

''എനിക്ക് ഇനിയും 10 വർഷം കൂടി ബാക്കിയുണ്ട്. 10 ഐസിസി കിരീടങ്ങൾ കൂടി നേടണം. അതാണ് എന്റെ ലക്ഷ്യം. ഇത് വളരെ വൈകാരികമായ നിമിഷമാണ്. കാരണം ഇന്ത്യയിൽ നിന്നും ലോകകപ്പ് നേടുന്നത് ആളുകൾക്ക് ആവേശം നൽകും. ഞങ്ങൾ നന്നായി പരിശ്രമം നടത്തി. ഇന്നലെ മുതൽ തന്നെ ഞങ്ങൾ ചാമ്പ്യന്മാരാണെന്ന് എനിക്കാരുമായിരുന്നു. തോൽവി എന്നൊരു ചിന്ത പോലും ഉണ്ടായിരുന്നില്ല. ഞാൻ ദൈവത്തിന് നന്ദി പറയുന്നു'' ഹർദിക് പറഞ്ഞു.