ന്യൂഡല്‍ഹി: കശ്മീരില്‍ സംഘര്‍ഷമുണ്ടാക്കാന്‍ ശ്രമിക്കുന്നവര്‍ക്കെതിരെ കര്‍ശനനടപടി സ്വീകരിക്കാന്‍ സുരക്ഷാ സേനയ്ക്ക് ആഭ്യന്തരമന്ത്രി രാജ്‌നാഥ് സിങിന്റെ നിര്‍ദേശം. കശ്മീരില്‍ സംഘര്‍ഷാവസ്ഥ തുടരുന്ന സാഹചര്യത്തില്‍ സ്ഥിതിഗതികള്‍ വിലയിരുത്താന്‍ ചേര്‍ന്ന യോഗത്തിലാണ് ഇക്കാര്യം നിര്‍ദ്ദേശിച്ചത്. ദേശീയ സുരക്ഷാ ഉപദേഷ്ടാവ് അജിത് ഡോവലും യോഗത്തില്‍ പങ്കെടുത്തു.ഇന്നലെ വൈകുന്നേരം രാജ്‌നാഥ് സിങിന്റെ ഔദ്യോഗിക വസതിയിലാണ് യോഗം വിളിച്ചത്.

സംസ്ഥാനത്തെ സംഘര്‍ഷാവസ്ഥ ശമിപ്പിക്കാന്‍ ഇതു മാത്രമാണ് വഴിയെന്നും ഒരാഴ്ചയ്ക്കുള്ളില്‍ ഇക്കാര്യത്തില്‍ കര്‍ശന നടപടി സ്വീകരിക്കണമെന്നും സൈനിക മേധാവികള്‍ക്ക് രാജ്‌നാഥ് സിങ് നിര്‍ദേശം നല്‍കി. സ്‌കൂളുകള്‍ ഉള്‍പ്പെടെ വിദ്യാഭ്യാസ സ്ഥാപനങ്ങള്‍ ഉടന്‍ തുറക്കണമെന്നും ഒരാഴ്ച്ചയ്ക്കുള്ളില്‍ കശ്മീരിലെ ജനജീവിതം സാധാരണരീതിയില്‍ ആക്കണമെന്നും അദ്ദേഹം നിര്‍ദ്ദേശം നല്‍കിയിട്ടുണ്ട്.

ബി.എസ്.എഫ് പ്രവേശന പരീക്ഷയില്‍ ഒന്നാമതെത്തിയ ഉധംപൂര്‍ സ്വദേശി നബീല്‍ അഹമ്മദ് വാനിയുമായും രാജ്‌നാഥ് സിങ് കൂടിക്കാഴ്ച നടത്തി.

ഹിസ്ബുള്‍ കമാന്‍ഡര്‍ ബുര്‍ഹാന്‍ വാനിയുടെ വധത്തെ തുടര്‍ന്ന് കശ്മീരിലുണ്ടായ സംഘര്‍ഷങ്ങളില്‍ ഇതുവരെ 75 പേരാണ് കൊല്ലപ്പെട്ടത്.