ഐപിഎൽ ആരംഭിക്കാൻ ദിവസങ്ങൾ മാത്രം ബാക്കി നിൽക്കെ സൺറൈസേഴ്സ് ഹൈദരാബാദിന് കനത്ത തിരിച്ചടി. ഹൈദരാബാദ് കഴിഞ്ഞ ലേലത്തിൽ ടീമിലെത്തിച്ച ഓസ്ട്രേലിയൻ ഓൾ റൗണ്ടർ ജാക് എഡ്വേർഡ്‌സ് പരുക്കേറ്റ് പുറത്ത്. താരത്തിന് സീസൺ മുഴുവൻ നഷ്ടമാവുമെന്നാണ് റിപ്പോർട്ട്. താര ലേലത്തിൽ ഹൈദരാബാദ് സ്വന്തമാക്കിയ ഏക വിദേശ താരമായിരുന്നു എഡ്വേർഡ്‌സ്. മൂന്ന് കോടിക്കാണ് ഈ 25കാരനെ ഓറഞ്ച് ആർമി സ്വന്തമാക്കിയിരുന്നത്. കാലിനേറ്റ പരുക്കാണ് ഓസീസ് ഓൾ റൗണ്ടർക്ക് തിരിച്ചടിയായത്.

അതേസമയം  ഹൈദരാബാദ് നായകൻ പാറ്റ് കമ്മിൻസിനും ഐപിഎല്ലിലെ ആദ്യ മത്സരങ്ങൾ നഷ്‌ടമാവും. ആഷസ് പരമ്പരക്കിടെ പരുക്കേറ്റ കമ്മിൻസ് പൂർണ ഫിറ്റ്നസ് കൈവരിച്ചിട്ടില്ലാത്തതിനാലാണ് കമ്മിൻസിന് തുടക്കത്തിലെ മത്സരങ്ങൾ നഷ്ടമാവുന്നത്. കമ്മിൻസിൻ്റെ അഭാവത്തിൽ ആദ്യ മത്സരങ്ങളിൽ ഓറഞ്ച് ആർമിയെ ഇഷാൻ കിഷനാണ് നയിക്കുക. സയ്യിദ് മുഷ്‌താഖ് അലി ട്രോഫിയിൽ ജാർഖണ്ഡിനെ കിരീടത്തിലേക്ക് നയിക്കുന്നതിൽ നിർണായകമായ പങ്കുവഹിക്കാൻ ഇഷാൻ കിഷന് സാധിച്ചിരുന്നു.

ഹൈദരാബാദിൻ്റെ ക്യാപ്റ്റൻ സ്ഥാനത്തേക്ക് അഭിഷേക് ശർമയുടെ പേരും വാർത്തകളിൽ നിറഞ്ഞിരുന്നു. എന്നാൽ ആഭ്യന്തര ടൂർണമെൻ്റുകളിലും ഇന്ത്യക്ക് വേണ്ടിയും സമീപകാലങ്ങളിൽ നടത്തിയ മികച്ച പ്രകടനങ്ങൾക്ക് പിന്നാലെയാണ് ഇഷാൻ്റെ പേര് നായക സ്ഥാനത്തേക്ക് പരിഗണിച്ചത്. 

ഐപിഎൽ 19-ാം സീസണ് മാർച്ച് 28നാണ് തുടക്കമാവുന്നത്. ആദ്യ മത്സരത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരുവാണ് സൺറൈസേഴ്‌സ് ഹൈദരാബാദിൻ്റെ എതിരാളികൾ.