വെംബ്ലി: 2026 ഇ.എഫ്.എൽ കിരീടം സ്വന്തമാക്കി മാഞ്ചസ്റ്റർ സിറ്റി. വെംബ്ലി സ്റ്റേഡിയത്തിൽ നടന്ന കലാശപ്പോരാട്ടത്തിൽ ആഴ്സണലിനെ എതിരില്ലാത്ത രണ്ട് ഗോളുകൾക്ക് കീഴടക്കിയാണ് പെപ് ഗ്വാർഡിയോളയും സംഘവും ചാമ്പ്യന്മാരായത്. ഈ കിരീടനേട്ടത്തോടെ ഏറ്റവും കൂടുതൽ ഇ.എഫ്.എൽ ട്രോഫികൾ നേടുന്ന മാനേജരായും ഗ്വാർഡിയോള മാറി. അഞ്ചാം തവണയാണ് ഗ്വാർഡിയോളയുടെ കീഴിൽ മാഞ്ചസ്റ്റർ സിറ്റി ഇ.എഫ്.എൽ ചാമ്പ്യന്മായത്. മാഞ്ചസ്റ്റർ സിറ്റിയുടെ ഒമ്പതാം കാരബാവോ കിരീടം കൂടിയാണിത്. 

2018, 2019, 2020, 2021, 2026 എന്നീ വർഷങ്ങളിലാണ് മാഞ്ചസ്റ്റർ സിറ്റി ഗ്വാർഡിയോളയുടെ കീഴിൽ ഈ കിരീടം നേടിയത്. നാല് വീതം ഇ.എഫ്.എൽ കിരീടം ചൂടിയ ബ്രയാൻ ക്ലോഫ്, സർ അലക്സ് ഫെർഗൂസൺ, ഹോസെ മൗറീഞ്ഞോ എന്നിവരെ മറികടന്നാണ് പെപ് ഈ ചരിത്രനേട്ടം സ്വന്തമാക്കിയത്. 

മത്സരത്തിൽ ആദ്യ പകുതിയിൽ ഇരു ടീമുകൾക്കും ഗോളുകൾ നേടാൻ സാധിച്ചിരുന്നില്ല. രണ്ടാം പകുതിയിൽ നിക്കോ ഒറീലി നേടിയ ഇരട്ട ഗോളിന്റെ പിൻബലത്തിലാണ് മാഞ്ചസ്റ്റർ സിറ്റി ചാമ്പ്യന്മാരായത്. മത്സരത്തിൽ 60, 64 എന്നീ മിനിറ്റുകളിലാണ് താരത്തിന്റെ ഗോളുകൾ പിറന്നത്. 

മത്സരത്തിൽ ബോൾ പൊസഷനിലും ഷോട്ടുകളുടെ എണ്ണത്തിലും സിറ്റിയാണ് ആധിപത്യം പുലർത്തിയത്. 63 ശതമാനം ബോൾ പൊസഷൻ സ്വന്തമാക്കിയ മാഞ്ചസ്റ്റർ സിറ്റി 10 ഷോട്ടുകളാണ് ഗണ്ണേഴ്സിന്റെ പോസ്റ്റിലേക്ക് ഉതിർത്തത്. ഇതിൽ ഓൺ ടാർഗറ്റിലേക്ക് എത്തിച്ച രണ്ട് ഷോട്ടുകളും ഗോളായി മാറുകയും ചെയ്തു. മറുഭാഗത്ത് ഏഴ് ഷോട്ടുകളാണ് ആഴ്‌സണൽ സിറ്റിയുടെ പോസ്റ്റിലേക്ക് ഉതിർത്തത്. ഇതിൽ മൂന്ന് ഷോട്ടുകൾ ഓൺ ലക്ഷ്യത്തിലേക്ക് ആയിരുന്നു.