ഐപിഎല്ലിന് മുന്നോടിയായി രാജസ്ഥാൻ റോയൽസ് യുവതാരം വൈഭവ് സൂര്യവംശിയെ പ്രശംസിച്ച് മുൻ ഇന്ത്യൻ താരം ആർ അശ്വിൻ. വൈഭവ് ഫോമിലെത്തിയാൽ രാജസ്ഥാൻ റോയൽസിനെ ഒരു ടീമിനും തടയാൻ സാധിക്കില്ലെന്നാണ് അശ്വിൻ പറഞ്ഞത്. തന്റെ യുട്യൂബ് ചാനലിലൂടെ സംസാരിക്കുകയായിരുന്നു അശ്വിൻ. 

''ഈ സീസണിൽ വൈഭവ് സൂര്യവംശി വലിയ ഒരു ഘടകമായാൽ രാജസ്ഥാൻ റോയൽസിനെ ആർക്കും തടയാൻ സാധിക്കില്ല. എന്നാൽ ക്രിക്കറ്റിൽ നിങ്ങൾ ഒരു കാര്യം ഓർക്കേണ്ടതുണ്ട്. ഇത് അവന്റെ രണ്ടാം ഐപിഎൽ സീസൺ ആണ്. അവൻ ഒരു കുട്ടിയാണ്. അനുഭവപരിചയ സമ്പത്തില്ലാത്തവനാണ്. അവനെ അധികം സമ്മർദ്ദത്തിൽ ആക്കരുത്. സമൂഹ മാധ്യമങ്ങളിൽ അവനെക്കുറിച്ച് ചർച്ചകൾ നടക്കുന്നുണ്ടാവും'' ആർ അശ്വിൻ പറഞ്ഞു. 

അതേസമയം 2026 അണ്ടർ 19 ലോകകപ്പിൽ ഇന്ത്യയെ കിരീടത്തിലേക്ക് നയിക്കുന്നതിൽ വൈഭവ് വഹിച്ച പങ്ക് വളരെ വലുതായിരിക്കുന്നു. ഫൈനലിൽ ഇംഗ്ലണ്ടിനെതിരെ സെഞ്ച്വറി നേടിയാണ് വൈഭവ് തിളങ്ങിയത്. മത്സരത്തിൽ വെറും 55 പന്തിൽ നിന്ന് സെഞ്ച്വറി തികച്ച വൈഭവ്, അണ്ടർ-19 ലോകകപ്പ് ചരിത്രത്തിൽ ഒരു ഇന്ത്യൻ താരം നേടുന്ന ഏറ്റവും വേഗതയേറിയ സെഞ്ച്വറിയെന്ന റെക്കോർഡും സ്വന്തമാക്കി. 80 പന്തിൽ 175 റൺസെടുത്ത താരത്തിന്റെ ഇന്നിംഗ്സിൽ 15 ഫോറുകളും 15 സിക്സറുകളും ഉൾപ്പെടുന്നു.

ഫൈനലിലെ ഈ മിന്നും പ്രകടനങ്ങൾക്ക് പിന്നാലെ ഒന്നിലധികം റെക്കോർഡുകളാണ് വൈഭവ് സൂര്യവംശി സ്വന്തമാക്കിയത്. അണ്ടർ 19 ലോകകപ്പിലെ താരത്തിന്റെ ആദ്യ സെഞ്ച്വറി ആയിരുന്നു ഇത്. ആദ്യ സെഞ്ച്വറിയിൽ തന്നെ അണ്ടർ 19 ലോകകപ്പിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായും വൈഭവ് റെക്കോർഡിട്ടു. 14 വയസ്സും 316 ദിവസവും പ്രായമുള്ളപ്പോൾ ആയിരുന്നു താരത്തിന്റെ സെഞ്ച്വറി നേട്ടം.