കോഴിക്കോട്: സ്വകാര്യ ആശുപത്രികളിലെ നഴ്സുമാരുടെ അനിശ്ചിതകാല സമരം ഇന്നു മുതല്‍. ശമ്പള പരിഷ്‌കരണവുമായി ബന്ധപ്പെട്ട് ഇന്നലെ നടന്ന മധ്യസ്ഥ ചര്‍ച്ച പരാജയപ്പെട്ടിരുന്നു. ഇതോടെയാണ് യുനൈറ്റഡ് നഴ്‌സസ് അസോസിയേഷന്റെ (യു.എന്‍.എ) നേതൃത്വത്തില്‍ വീണ്ടും അനിശ്ചിതകാല സമരം നടത്തുന്നതിലേക്ക് എത്തിയത്. മാനേജ്‌മെന്റുകളുമായി ധാരണയിലെത്താന്‍ സാധിക്കാത്ത 26 ആശുപത്രികളിലാണ് പണിമുടക്ക്.

സമരം കാരണം പൊതുജനങ്ങള്‍ക്ക് പ്രയാസമുണ്ടാകില്ലെന്ന് യുണൈറ്റഡ് നഴ്സസ് അസോസിയയേഷന്‍ സംസ്ഥാന പ്രസിഡന്റ് ജാസ്മിന്‍ഷാ അറിയിച്ചു.  ഭൂരിഭാഗം ആശുപത്രികളും വേതനം സംബന്ധിച്ച് ധാരണയായ പശ്ചാത്തലത്തില്‍ രോഗികള്‍ക്ക് അത്തരം ആശുപത്രികളെ സമീപിക്കാവുന്നതാണെന്നും അദ്ദേഹം കൂട്ടിച്ചേര്‍ത്തു. 

ALSO READ: പള്ളിമതില്‍ ചാടിക്കടന്ന് കല്ലറയ്ക്ക് മുകളിലിരുന്ന് ലഹരി ഉപയോഗവും റീല്‍സ് ചിത്രീകരണവും; നാല് യുവാക്കള്‍ക്കെതിരെ കേസ്

ഹൈക്കോടതി ഇടപെട്ടാണ് മാനേജ്മെന്റും യുഎന്‍എയും തമ്മിലുള്ള ചര്‍ച്ചക്ക് വഴിയൊരുക്കിയത്. ഹൈക്കോടതി നിയോഗിച്ച മുതിര്‍ന്ന അഭിഭാഷകന്റെ മധ്യസ്ഥതയിലായിരുന്നു ചര്‍ച്ച.  ശമ്പളവര്‍ധനവ് ആവശ്യപ്പെട്ടുള്ള നഴ്‌സുമാരുടെ സമരത്തിനെതിരെ കേരള പ്രൈവറ്റ് ഹോസ്പിറ്റല്‍സ് അസോസിയേഷന്‍ നല്‍കിയ ഹരജിയിലാണ് ഹൈക്കോടതി മധ്യസ്ഥ ചര്‍ച്ചയ്ക്ക് നിര്‍ദേശിച്ചത്. 

ഹൈക്കോടതിയിലെ മീഡിയേഷന്‍ സെന്ററില്‍ വെച്ച് കഴിഞ്ഞ ദിവസം നടന്ന ചര്‍ച്ചയിലും തീരുമാനമാകാത്തതിനെ തുടര്‍ന്ന് മധ്യസ്ഥന്‍ കൂടുതല്‍ സമയം തേടിയിരുന്നു. എന്നാല്‍, പ്രധാന ആവശ്യങ്ങളില്‍ മാനേജ്‌മെന്റുകള്‍ വിട്ടുവീഴ്ചയ്ക്ക് തയ്യാറാകാത്തതാണ് ചര്‍ച്ച പരാജയപ്പെടാന്‍ കാരണമായത്.

26 സ്വകാര്യ ആശുപത്രികളിലെ നഴ്‌സുമാര്‍ സമ്പൂര്‍ണ പണിമുടക്കിലേക്ക് നീങ്ങുന്നത് ആരോഗ്യമേഖലയില്‍ വലിയ പ്രതിസന്ധിക്ക് കാരണമായേക്കാം.

nurses have launched an indefinite strike in private hospitals starting today while una president assures that the protest will not cause inconvenience to the public