മസ്‌കത്ത്: രാജ്യത്തെ നിലവിലെ സുരക്ഷാ സാഹചര്യങ്ങള്‍ പരിഗണിച്ച് ഡ്രോണ്‍ ഉള്‍പ്പെടെയുള്ള വ്യോമ പ്രവര്‍ത്തനങ്ങള്‍ക്ക് ഏര്‍പ്പെടുത്തിയിരുന്ന താല്‍ക്കാലിക വിലക്ക് വീണ്ടും നീട്ടിയതായി ഒമാന്‍ സിവില്‍ ഏവിയേഷന്‍ അതോറിറ്റി അറിയിച്ചു. മുന്‍പ് പ്രഖ്യാപിച്ച വിലക്കിന്റെ കാലാവധി അവസാനിക്കാനിരിക്കെയാണ് ഇത് അനിശ്ചിതകാലത്തേക്ക് തുടരുമെന്ന് വ്യക്തമാക്കിയത്.

സര്‍ക്കാര്‍, സ്വകാര്യ, വിനോദ ആവശ്യങ്ങള്‍ എന്നിവയുള്‍പ്പെടെ ഏത് ആവശ്യത്തിനായാലും ഡ്രോണ്‍ ഉപയോഗം ഇപ്പോഴും പൂര്‍ണമായും നിരോധിതമാണെന്ന് അധികൃതര്‍ ആവര്‍ത്തിച്ചു. രാജ്യത്തിന്റെ വ്യോമപരിധിയില്‍ നിയന്ത്രണം ശക്തമാക്കുന്നതിനും പൊതുസുരക്ഷ ഉറപ്പാക്കുന്നതിനുമാണ് ഈ നടപടി തുടരുന്നതെന്ന് അധികൃതര്‍ പറഞ്ഞു.

ഡ്രോണുകള്‍ക്കൊപ്പം മറ്റ് വ്യോമ വിനോദ പ്രവര്‍ത്തനങ്ങളും വിലക്കില്‍ ഉള്‍പ്പെടുത്തിയിട്ടുണ്ട്. പാരാഗ്ലൈഡിംഗ്, പാരാമോട്ടര്‍, എയര്‍ സ്‌പോര്‍ട്‌സ് വിമാനങ്ങള്‍ എന്നിവയ്ക്കും നിലവില്‍ അനുമതിയില്ല. പുതിയ അനുമതികള്‍ നല്‍കുന്നതും താല്‍ക്കാലികമായി നിര്‍ത്തിവച്ചിരിക്കുകയാണ്.

അടുത്തിടെയുണ്ടായ സുരക്ഷാ ആശങ്കകളും പ്രാദേശിക സംഘര്‍ഷ സാധ്യതകളും കണക്കിലെടുത്താണ് നിയന്ത്രണങ്ങള്‍ ശക്തമാക്കിയതെന്നാണ് സൂചന. വ്യോമമാര്‍ഗം ഉപയോഗിച്ചുള്ള അനധികൃത പ്രവര്‍ത്തനങ്ങള്‍ തടയുന്നതിനും നിര്‍ണായക അടിസ്ഥാന സൗകര്യങ്ങളുടെ സുരക്ഷ ഉറപ്പാക്കുന്നതിനുമാണ് മുന്‍കരുതല്‍ നടപടികള്‍ സ്വീകരിച്ചിരിക്കുന്നത്.

ALSO READ: ഒമാനിൽ കനത്ത മഴയും വെള്ളപ്പൊക്കവും: കെട്ടിടം തകർന്ന് അധ്യാപകൻ മരിച്ചു, മരണസംഖ്യ 10 ആയി

ഡ്രോണ്‍ ഉപയോഗം നിയന്ത്രിക്കുന്നതിന് ഒമാനില്‍ കര്‍ശന നിയമങ്ങളും മാര്‍ഗനിര്‍ദേശങ്ങളും നിലവിലുണ്ടെങ്കിലും, നിലവിലെ സാഹചര്യത്തില്‍ അതിലുപരി ജാഗ്രതയാണ് സര്‍ക്കാര്‍ സ്വീകരിക്കുന്നത്. അനുമതിയില്ലാതെ ഡ്രോണ്‍ പറത്തുന്നത് കണ്ടെത്തിയാല്‍ ഉപകരണങ്ങള്‍ പിടിച്ചെടുക്കുന്നതുള്‍പ്പെടെ നിയമനടപടികള്‍ സ്വീകരിക്കുമെന്ന് ബന്ധപ്പെട്ട വകുപ്പുകള്‍ മുന്നറിയിപ്പ് നല്‍കി.

പ്രത്യേകിച്ച് വിമാനത്താവളങ്ങള്‍, സൈനിക മേഖലകള്‍, സര്‍ക്കാര്‍ സ്ഥാപനങ്ങള്‍ എന്നിവയ്ക്കടുത്ത് ഡ്രോണ്‍ ഉപയോഗം വലിയ സുരക്ഷാ ഭീഷണി ഉയര്‍ത്താനിടയുള്ളതിനാല്‍ ഇത്തരം പ്രവര്‍ത്തനങ്ങള്‍ കര്‍ശനമായി നിരീക്ഷിക്കപ്പെടും. നിയമലംഘനങ്ങള്‍ കണ്ടെത്തിയാല്‍ പിഴയും മറ്റു ശിക്ഷകളും ബാധകമാകുമെന്ന് അധികൃതര്‍ അറിയിച്ചു.

ഡ്രോണ്‍ ഉപയോഗിക്കുന്ന വ്യക്തികളും സ്ഥാപനങ്ങളും നിലവിലുള്ള നിര്‍ദേശങ്ങള്‍ കൃത്യമായി പാലിക്കണമെന്നും അനാവശ്യമായ നിയമപ്രശ്‌നങ്ങള്‍ ഒഴിവാക്കണമെന്നും അധികൃതര്‍ അഭ്യര്‍ത്ഥിച്ചു. സുരക്ഷാ വിലയിരുത്തലുകള്‍ തുടര്‍ന്നുകൊണ്ടിരിക്കുകയാണെന്നും സാഹചര്യം മെച്ചപ്പെടുന്നുവെന്ന് വിലയിരുത്തുന്ന പക്ഷം മാത്രമേ വിലക്ക് പിന്‍വലിക്കുകയോ ഇളവുകള്‍ നല്‍കുകയോ ചെയ്യുകയുള്ളുവെന്നും അധികൃതര്‍ കൂട്ടിച്ചേര്‍ത്തു.

Oman has extended its temporary ban on drone operations and other aerial activities indefinitely, citing ongoing security concerns. The Civil Aviation Authority confirmed that all drone use remains strictly prohibited to ensure public safety and protect national airspace.