തിരുവനന്തപുരം:  സംസ്ഥാനത്ത് ഇത്തവണ കാലവര്‍ഷം ജൂണ്‍ ആദ്യവാരം തന്നെ എത്തിയേക്കുമെന്ന് കേന്ദ്ര കാലാവസ്ഥ വകുപ്പ്. തെക്കുപടിഞ്ഞാറന്‍ മണ്‍സൂണ്‍ ജൂണില്‍ കേരള തീരത്ത് എത്തുമെന്നാണ് പ്രതീക്ഷിക്കുന്നത്. ദക്ഷിണേന്ത്യയില്‍ ഇപ്പോള്‍ ലഭിക്കുന്ന വേനല്‍മഴയും ഇടിമിന്നലും മണ്‍സൂണ്‍ കൃത്യസമയത്തുണ്ടാകുമെന്നതിന്റെ സൂചനയായി കാലാവസ്ഥ നിരീക്ഷകര്‍ കണക്കാക്കുന്നു. 

ആസ്‌ട്രേലിയയില്‍ മഴക്കാലം കൃത്യമായി അവസാനിച്ച്, വേനല്‍ക്കാലം ആരംഭിച്ചിട്ടുണ്ട്. ഇത് ഇന്ത്യന്‍ ഉപഭൂഖണ്ഡത്തിന് അനുകൂലമാണ്. ആസ്‌ട്രേലിയയിലെ വരണ്ട കാലാവസ്ഥ ഇന്ത്യന്‍ ഉപഭൂഖണ്ഡത്തിലേക്കുള്ള മഴക്കാറ്റുകളുടെ പ്രവാഹത്തിന് വഴിയൊരുക്കും. അടുത്ത ഏഴ് ദിവസത്തേക്ക് കേരളം, തമിഴ്‌നാട്, പുതുച്ചേരി എന്നിവിടങ്ങളില്‍ വേനല്‍ മഴ തുടരും. 

ALSO READ: മൃതദേഹങ്ങളിൽ നിന്ന് വസ്ത്രങ്ങൾ മോഷ്ടിച്ച് 'പുത്തൻ' എന്ന പേരിൽ വിൽപന; ഇൻഡോറിൽ വൻ മാഫിയ സംഘം പിടിയിൽ 

ബംഗാൾ ഉൾക്കടലിൽ ഈ സീസണിലെ ആദ്യ ന്യൂനമർദ്ദം രൂപപ്പെടാൻ സാധ്യതയുള്ളതിനാലും കേരള തീരത്തിന് മുകളിലായി ചക്രവാതച്ചുഴി നിലനിൽക്കുന്നതിനാലും വരും ദിവസങ്ങളിൽ എല്ലാ ജില്ലകളിലും ഇടിമിന്നലോടു കൂടിയ മഴ ലഭിക്കും.

ന്യൂനമർദ്ദവും ചക്രവാതച്ചുഴിയും

മന്നാർ ഉൾക്കടലിനും ശ്രീലങ്കയ്ക്കും മുകളിലായി നിലനിൽക്കുന്ന ചക്രവാതച്ചുഴിയുടെ സ്വാധീനത്താൽ മെയ് 11-ഓടെ തെക്കുപടിഞ്ഞാറൻ ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടേക്കും. ഇതിന് പുറമെ, തെക്കുപടിഞ്ഞാറൻ അറബിക്കടലിനും ലക്ഷദ്വീപിനും കേരള തീരത്തിനും മുകളിലായി മറ്റൊരു ചക്രവാതച്ചുഴിയും നിലനിൽക്കുന്നുണ്ട്. ഇവയുടെ സംയുക്ത സ്വാധീനമാണ് കേരളത്തിൽ മഴ സജീവമാക്കുന്നത്.

ശക്തമായ കാറ്റും ഇടിമിന്നലും

മെയ് 13 വരെ കേരളത്തിൽ ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുണ്ട്. അടുത്ത അഞ്ച് ദിവസങ്ങളിൽ കേരളത്തിലും മാഹിയിലും ഇടിമിന്നലോടു കൂടിയ മഴയ്ക്കും മണിക്കൂറിൽ 30 മുതൽ 50 കിലോമീറ്റർ വരെ വേഗതയിൽ വീശിയേക്കാവുന്ന കാറ്റിനും സാധ്യതയുണ്ടെന്ന് അധികൃതർ അറിയിച്ചു.

യെല്ലോ അലർട്ട് (Yellow Alert) പ്രഖ്യാപിച്ച ജില്ലകൾ:

വിവിധ ദിവസങ്ങളിൽ ശക്തമായ മഴ കണക്കിലെടുത്ത് താഴെ പറയുന്ന ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ അലർട്ട് പ്രഖ്യാപിച്ചിട്ടുണ്ട്:

• മെയ് 09: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, കോഴിക്കോട്.
• മെയ് 10: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം.
• മെയ് 11: കൊല്ലം, പത്തനംതിട്ട, ആലപ്പുഴ.
• മെയ് 12: എറണാകുളം, തൃശൂർ, മലപ്പുറം, കോഴിക്കോട്.
• മെയ് 13: എറണാകുളം, തൃശൂർ, മലപ്പുറം, കോഴിക്കോട്, വയനാട്, കണ്ണൂർ.

According to the India Meteorological Department, the southwest monsoon is likely to arrive in the state during the first week of June this year.