അടിമാലി: കേരള കോണ്‍ഗ്രസ് എം രാജാക്കാട് മണ്ഡലം പ്രസിഡന്റും മുന്‍ ഗ്രാമ പഞ്ചായത്ത് അംഗവുമായിരുന്ന ഷാജി (58)യുടെ മൃതദേഹം കത്തിക്കരിഞ്ഞ നിലയില്‍ കണ്ടെത്തി. വീടിന്റെ സമീപത്തുള്ള മോട്ടോര്‍ പുരയില്‍ നിന്നാണ് മൃതദേഹം ലഭിച്ചത്. ആത്മഹത്യ ചെയ്തതാകാമെന്ന സംശയത്തിലാണ് പൊലിസ്. 

പുലര്‍ച്ചെ സ്ഥിരമായി പറമ്പിലേക്ക് പോകുന്നയാളായിരുന്നു ഷാജി. തിരിച്ച് വീട്ടിലെത്താത്തതിനെ തുടര്‍ന്ന് ബന്ധുക്കള്‍ നടത്തിയ അന്വേഷണത്തിലാണ് മൃതദേഹം കണ്ടെത്തിയത്. പുരയിടത്തില്‍ നിന്ന് തീ പടരുന്നത് കണ്ട അതിഥി തൊഴിലാളിയായ സ്ത്രീ ഷാജിയുടെ മകനെ വിവരമറിയിക്കുകയും, അയല്‍വാസികളെ കൂട്ടി നടത്തിയ തിരച്ചിലില്‍ മൃതദേഹം കണ്ടെത്തുകയുമായിരുന്നു. രാജാക്കാട് സ്റ്റേഷനില്‍ വിവരമറിയിച്ചതിനെ തുടര്‍ന്ന് പൊലിസെത്തി നാട്ടുകാരുടെ സഹായത്തോടെ വെള്ളം കോരിയൊഴിച്ചാണ് തീ കെടുത്തിയത്. എസ്എച്ച്ഒ പി ശ്രീകുമാരന്‍ നായരുടെ നേതൃത്വത്തിലുള്ള സംഘം ഇന്‍ക്വസ്റ്റ് നടപടികള്‍ പൂര്‍ത്തിയാക്കി. മൃതദേഹം ഇടുക്കി മെഡിക്കല്‍ കോളജിലേക്ക് മാറ്റി. 

ALSO READ: ''ഭരണമാറ്റം ഉടന്‍ സംഭവിക്കും, അത് പക്ഷെ ഇറാനിലാവില്ല, അമേരിക്കയിൽ''; ട്രംപിനെ ട്രോളി സഹോദര പുത്രി  

കൂടുതല്‍ അന്വേഷണത്തിന് ശേഷം മാത്രമേ മരണകാരണം വ്യക്തമാവുകയുള്ളൂ എന്ന് പൊലിസ് അറിയിച്ചു. വാക്കസിറ്റിയില്‍ റേഷന്‍ കട നടത്തിവരുന്ന ഷാജി, കേരള ബാങ്ക് അടക്കമുള്ള ചില ബാങ്കുകളില്‍ വായ്പ കുടിശിക ഉണ്ടായിരുന്നതയാണ് വിവരം. വായ്പ അടച്ചു തീര്‍ക്കാനുള്ള ക്രമീകരണങ്ങള്‍ ഷാജി ചെയതിരുന്നുവെന്നാണ് ബന്ധുക്കള്‍ പറയുന്നതത്.