ന്യൂഡല്‍ഹി: വിവാദമായ വിദേശസംഭാവനാ നിയന്ത്രണനിയമ (എഫ്‌സിആര്‍എ) ഭേദഗതി ബില്‍ ഇന്ന് ലോക്‌സഭയില്‍ അവതരിപ്പിക്കും. ക്രൈസ്തവസഭകള്‍ ഉള്‍പ്പെടെയുള്ള വിവിധ സംഘടനകളുടെ ശക്തമായ പ്രതിഷേധം നിലനില്‍ക്കെയാണ് കേന്ദ്രസര്‍ക്കാര്‍ ബില്ലുമായി മുന്നോട്ട് പോകുന്നത്. കേരളം, അസം തുടങ്ങിയ സംസ്ഥാനങ്ങളില്‍ നിയമസഭാ തെരഞ്ഞെടുപ്പ് ആസന്നമായിരിക്കെ ബില്‍ അവതരിപ്പിക്കുന്നത് രാഷ്ട്രീയ പ്രത്യാഘാതങ്ങള്‍ക്കും ഇടയാക്കിയേക്കും.

രാജ്യസുരക്ഷ ഉറപ്പാക്കുന്നതിനും വിദേശ ഫണ്ടുകളുടെ ദുരുപയോഗം തടയുന്നതിനുമാണ് ഭേദഗതിയെന്ന് കേന്ദ്രം വ്യക്തമാക്കുന്നു. വിദേശ ഫണ്ടിങില്‍ വ്യക്തമായ ക്രമീകരണം കൊണ്ടുവരുക. ബില്‍ ഏതെങ്കിലും പ്രത്യേക മതസംഘടനകളെ ലക്ഷ്യം വച്ചുള്ളതല്ലെന്നും രാജ്യതാത്പര്യത്തിനാണ് മുന്‍ഗണനയെന്നും കേന്ദ്രമന്ത്രി കിരണ്‍ റിജിജു അറിയിച്ചു.

ബില്ലിലെ വ്യവസ്ഥകള്‍ ന്യൂനപക്ഷ വിഭാഗങ്ങള്‍ക്കിടയില്‍ വലിയ ആശങ്കയുണ്ടാക്കുന്നുണ്ടെന്ന് കത്തോലിക്ക മെത്രാന്‍ സമിതി (സിബിസിഐ) ചൂണ്ടിക്കാട്ടി. പുനഃപരിശോധന ആവശ്യപ്പെട്ട് ആഭ്യന്തര മന്ത്രി അമിത് ഷാക്കും പാര്‍ലമെന്റ് അംഗങ്ങള്‍ക്കും സമിതി കത്തയച്ചു.

പുതിയ നിയന്ത്രണങ്ങള്‍ ഭരണഘടനാപരമായ അവകാശങ്ങളുടെ ലംഘനമാണെന്നും ബില്‍ നിയമമായാല്‍ കോടതിയെ സമീപിക്കുമെന്നും സിബിസിഐ മുന്നറിയിപ്പ് നല്‍കി. വിഷയത്തില്‍ ഇടപെടാന്‍ കേരളത്തിലെ എംപിമാരോട് തിരഞ്ഞെടുപ്പ് പ്രചാരണങ്ങള്‍ക്കിടയിലും ഡല്‍ഹിയിലെത്താന്‍ നിര്‍ദേശം നല്‍കിയിട്ടുണ്ട്. സഭകളുടെ പിന്തുണയോടെ സഭയില്‍ ബില്ലിനെ ശക്തമായി പ്രതിരോധിക്കാനാണ് പ്രതിപക്ഷ പാര്‍ട്ടികളുടെ തീരുമാനം.

The Central Government is set to introduce the FCRA Amendment Bill in the Lok Sabha today to regulate foreign funding, facing stiff resistance from the opposition and religious groups who claim it infringes on constitutional rights.