കാക്കനാട്: മഹാബലിയുടെ നാട്ടില്‍ ഓണപ്പതാകയ്ക്ക് ഊഷ്മള വരവേല്‍പ്പ് നല്‍കി. തൃക്കാക്കര, തൃപ്പൂണിത്തുറ, കളമശ്ശേരി നഗരസഭകളുടെ നേതൃത്വത്തില്‍ ഇന്നലെ ഓണപ്പതാക ഘോഷയാത്രയും നടത്തി. രാവിലെ 9.30 ഓടെ തൃപ്പൂണിത്തുറ അത്തം നഗറില്‍ നിന്നും നഗരസഭാ ചെയര്‍പേഴ്‌സണ്‍ ചന്ദ്രികാ ദേവിയുടെ നേതൃത്വത്തില്‍ ചിത്രപ്പുഴയില്‍ എത്തിച്ച ഓണപ്പതാക നഗരസഭാ ചെയര്‍പേഴ്‌സണ്‍ കെ.കെ. നീനുവിന്റെ നേതൃത്വത്തില്‍ ഏറ്റുവാങ്ങി. ഇവിടെനിന്ന് പതാക ഘോഷയാത്രയായി കളമശ്ശേരി നഗരസഭാതിര്‍ത്തിയില്‍ നഗരസഭാ ചെയര്‍പേഴ്‌സണ്‍ ജെസി പീറ്ററിനു കൈമാറി. തുടര്‍ന്ന് തൃക്കാക്കര ക്ഷേത്രത്തിലെ പൂജാ കര്‍മങ്ങള്‍ക്കു ശേഷം കാക്കനാട് ജങ്ഷനില്‍ ഓണപ്പതാക ചെയര്‍പേഴ്‌സണ്‍ കെ.കെ. നീനു ഉയര്‍ത്തി.
രാവിലെ 11ന് കാക്കനാട് മുന്‍സിപ്പല്‍ കമ്യൂണിറ്റി ഹാളില്‍ പൂക്കള മത്സരവും നടത്തി. 17ന് വൈകിട്ട് അഞ്ചിന് കുടുംബശ്രീ യൂണിറ്റുകളുടെ കലാപരിപാടികള്‍. 18ന് ആറിന് കളക്ടറേറ്റ് പരേഡ് ഗ്രൗണ്ടില്‍ കണ്ണൂര്‍ ഷെരീഫിന്റെ നേതൃത്വത്തില്‍ ഗാനമേളയും അരങ്ങേറും. 19ന് മഹാബലിയെ യാത്രയാക്കുന്ന ഘോഷയാത്ര വൈകിട്ട് മൂന്നിന് ചെമ്പ്മുക്കില്‍ നിന്നാരംഭിക്കും.
ഗജവീരന്‍മാരുടെ അകമ്പടിയോടെ മാവേലി, ശിങ്കാരിമേളം, പഞ്ചവാദ്യം ബാന്‍ഡ് മേളം, നാസിക് ദൂള്‍, കാവടി, തെയ്യം, കുതിരകളി, പുലികളി, പമ്പാമേളം, തെയ്യം, കഥകളി, മയില്‍, മേളം തുടങ്ങിയവ അണിനിരക്കുന്ന ഘോഷയാത്രയില്‍ രാഷ്ടിയ സാമൂഹിക സാംസ്‌കാരിക പ്രവര്‍ത്തകരും കുടുംബശ്രീ യൂണിറ്റ് അംഗങ്ങളും അംഗന്‍വാടി പ്രവര്‍ത്തകരും വിദ്യാര്‍ത്ഥികളും പൊതുജനങ്ങളും ഒത്തുചേരും. കളക്ടറേറ്റ് പരേഡ് ഗ്രൗണ്ടില്‍ നടക്കുന്ന പൊതുസമ്മേളനം മന്ത്രി കെ.ടി. ജലീല്‍ ഉദ്ഘാടനം ചെയ്യും. തുടര്‍ന്ന് സിനിമാതാരം ഹരിശ്രീ അശോകന്‍ അവതരിപ്പിക്കുന്ന മെഗാഷോ 'കോമഡി ക്വട്ടേഷന്‍' നടക്കും.