തൊടുപുഴ: പരാതിക്കാരിയായ അധ്യാപികയോടു മോശമായി പെരുമാറിയ എസ്.ഐ സുബ്രഹ്മണ്യത്തെ ജില്ലാ പൊലിസ് മേധാവി എ.വി ജോര്‍ജ് സസ്‌പെന്‍ഡ് ചെയ്തു. ശാന്തന്‍പാറ പൊലിസ് കേസെടുത്തതിനുശേഷമാണ് സസ്‌പെന്‍ഡ് ചെയ്തത്.
ഇദ്ദേഹം ഇപ്പോള്‍ കരിമണ്ണൂര്‍ പൊലിസ് സ്‌റ്റേഷനിലെ പ്രിന്‍സിപ്പല്‍ എസ്.ഐയാണ്. ഇദ്ദേഹം ശാന്തന്‍പാറ എസ.്‌ഐയായിരിക്കുമ്പോഴാണ് അധ്യാപികയുടെ പരാതി അന്വേഷിക്കാന്‍ മൂന്നാര്‍ എ.എസ്.പി ആവശ്യപ്പെടുന്നത്. ഫെയ്‌സ് ബുക്കിലൂടെ പരിചയപ്പെട്ട വിദേശി ഒന്നേകാല്‍ലക്ഷം രൂപ തട്ടിയെടുത്തുവെന്ന പരാതിയുമായിട്ടാണ് അധ്യാപിക എ.എസ്.പിയെ സമീപിച്ചത്.
സ്‌പെഷല്‍ സ്‌കൂള്‍ തുടങ്ങാനെന്ന പേരിലാണു ഫെയ്‌സ് ബുക്ക് വഴി പരിചയപ്പെട്ട വിദേശിയായ മിഷേല്‍ അധ്യാപികയില്‍നിന്നും പണം തട്ടിയെടുത്തത്. മിഷേലിന്റെ അക്കൗണ്ടിലേക്ക് അധ്യാപിക പണം നിക്ഷേപിക്കുകയായിരുന്നു. ശാന്തന്‍പാറ എസ്.ഐയായിരുന്ന സുബ്രഹ്മണ്യത്തെ കേസ് ഏല്‍പിക്കുകയും ചെയ്തു. എന്നാല്‍ കേസ് അന്വേഷണത്തിന്റെ ഭാഗമായി വന്ന എസ്.ഐ സ്ഥിരംശല്യമായി മാറുകയായിരുന്നു. എസ്.ഐയുടെ താമസസ്ഥലത്തേക്കു വരാന്‍ ആവശ്യപ്പെടുകയും വാട്ട്‌സ് അപ്പിലൂടെയും മൊബൈലിലും അശ്ലീലസന്ദേശം അയയ്ക്കുകയും ചെയ്തു. എസ്.ഐയുടെ ശല്യം വര്‍ധിച്ചപ്പോള്‍ അധ്യാപിക കുടുംബസമേതം മറ്റൊരു സ്ഥലത്തേക്കു മാറി താമസിച്ചു. എന്നിട്ടും ശല്യം വര്‍ധിക്കുകയായിരുന്നു. ഇതേ തുടര്‍ന്നാണ് ജില്ലാ പോലീസ മേധാവിക്കു പരാതി നല്‍കിയത്. അധ്യാപികയുടെ പരാതി അന്വേഷിക്കാന്‍ ഇടുക്കി വനിത സെല്‍ സി.ഐയോടു എസ്.പി ആവശ്യപ്പെട്ടു.