കോഴിക്കോട്: നിയമസഭാ തെരഞ്ഞെടുപ്പിൽ സമാധാന പൂർണമായ വോട്ടെടുപ്പ് ഉറപ്പാക്കാൻ പൊലിസിന് 12 കോടി രൂപ അനുവദിച്ചു. പൊലിസിന് പുറമേ കേന്ദ്രസേനാംഗങ്ങളും സ്‌പെഷൽ പൊലിസ് ഓഫിസർമാരുമുൾപ്പെടെ  സേനാംഗങ്ങളുടെ താമസം, യാത്രാ, ഭക്ഷണ ചെലവുകൾക്കുൾപ്പെടെയാണ് തെരഞ്ഞെടുപ്പ് കമ്മിഷൻ 12,05,65,000 രൂപ അനുവദിച്ചത്.

140 മണ്ഡലങ്ങളിലും ക്രമസമാധാന പ്രശ്‌നങ്ങളില്ലാത്ത വിധത്തിൽ പോളിങ് ഉറപ്പാക്കുന്നതിനായി കർശനസുരക്ഷാ ക്രമീകരണങ്ങളുമാണ് പൊലിസ് ഒരുക്കിയത്. അതത് ലോക്കൽ പൊലിസ് സ്‌റ്റേഷൻ പരിധിയിലുള്ള പോളിങ് സ്‌റ്റേഷനിൽ വേണ്ട സൗകര്യങ്ങളെല്ലാം പൊലിസ് ഇതിനകം വിലയിരുത്തിയിട്ടുണ്ട്.  
പൊലിസുകാരുൾപ്പെടെയുള്ള സേനാംഗങ്ങളുടെ യാത്രാ ചെലവിനായി 1,95,77,000 രൂപയാണ് തെരഞ്ഞെടുപ്പ് കമ്മിഷൻ അനുവദിച്ചത്. ആശയവിനിമയം കാര്യക്ഷമമാക്കുന്നതിനുള്ള ടെലികമ്മ്യൂണിക്കേഷനുമായി ബന്ധപ്പെട്ട് 34,37,000 രൂപയും അനുവദിച്ചിട്ടുണ്ട്. തെരഞ്ഞെടുപ്പിന് മുന്നോടിയായി പൊലിസിനും മറ്റു സേനാവിഭാഗത്തിനും സുരക്ഷയുമായി ബന്ധപ്പെട്ട സാധനങ്ങൾ വാങ്ങുന്നതിനും മറ്റും 70,44,000 രൂപയും വാഹനങ്ങളുടെ അറ്റകുറ്റപ്പണിയ്ക്കായി 67,76,000 രൂപയുമാണ് അനുവദിച്ചത്. 

ALSO READ: എസ്.ഡി.പി.ഐ ബന്ധം മുതൽ വ്യാജ ആധാർ വരെ; വാദപ്രതിവാദങ്ങൾക്കിടെ ഇന്ന് കൊട്ടിക്കലാശം

ഭക്ഷണ ചെലവുമായി ബന്ധപ്പെട്ട് 4,38,63,000 രൂപയും അനുവദിച്ചിട്ടുണ്ട്. പട്രോളിങ് ഉൾപ്പെടെയുള്ള ആവശ്യത്തിനായി  ഇന്ധന ചെലവിനത്തിൽ 2,11,69,000 രൂപയും വാടകയ്ക്ക് വാഹനങ്ങൾ എടുക്കുന്നതിന് 1,86,99,000 രൂപയുമാണ് അനുവദിച്ചത്. 

സംസ്ഥാനത്ത് 2,040പ്രശ്‌നബാധിത ബൂത്തുകളാണുള്ളത്. രഹസ്യാന്വേഷണ വിഭാഗത്തിന്റെ റിപ്പോർട്ടുകളുടെ അടിസ്ഥാനത്തിലും മുൻ തെരഞ്ഞെടുപ്പുകളിലെ സാഹചര്യങ്ങൾ അടിസ്ഥാനമാക്കിയുമാണ് പ്രശ്‌നബാധിത ബൂത്തുകളെ പ്രത്യേകമായി തരംതിരിച്ചത്. 

ഇവിടങ്ങളിൽ സി.സി ടി.വി, കേന്ദ്രസുരക്ഷാസേന, വീഡിയോ കവറേജ്, നിരീക്ഷകരുടെ സാന്നിധ്യം, പൊലിസ് സുരക്ഷ എന്നിവ ഏർപ്പെടുത്തിയിട്ടുണ്ട്. ആകെ 30,471പോളിങ് സ്റ്റേഷനുകളാണുള്ളത്. 145കമ്പനി കേന്ദ്രസേനയെയാണ് തെരഞ്ഞെടുപ്പ് കമ്മിഷൻ ആവശ്യപ്പെട്ടത്. സംഘർഷസാധ്യതകൾ നിലനിൽക്കുന്നുണ്ടോയെന്ന് ജില്ലാ-സംസ്ഥാന രഹസ്യാന്വേഷന വിഭാഗങ്ങൾ നിരീക്ഷിച്ചുവരികയാണ്.

To ensure smooth and peaceful voting during the assembly elections, the Election Commission has sanctioned over ₹12 crore for security arrangements. The fund will cover accommodation, travel, and food expenses for police personnel, central forces, and special police officers deployed across the state, reinforcing efforts to maintain law and order during polling.