മലപ്പുറം: ഉത്രടപ്പാച്ചിലില്‍ അവസാനഘട്ട ഒരുക്കങ്ങളും പൂര്‍ത്തിയാക്കി പൂവിളികളോടെ ഇന്നു തിരുവോണം. പെരുന്നാളും ഓണവും ഒന്നിച്ചെത്തിയതിന്റെ എല്ലാ പ്രതീതിയും നിറഞ്ഞു നില്‍ക്കുന്നതായിരുന്നു ഇന്നലെ നിരത്തുകള്‍.
പെരുന്നാള്‍ ദിവസം അടഞ്ഞുകിടന്ന ജില്ലയിലെ മിക്ക കച്ചവട സ്ഥാപനങ്ങളും ഓണക്കച്ചവടം ലാക്കാക്കി ഇന്നലെ തുറന്നു പ്രവര്‍ത്തിച്ചു. അതേസമയം ജില്ലയിലെ ചുരുക്കം ചില ഭക്ഷണശാലകള്‍ മാത്രമാണ് ഇന്നലെ പ്രവര്‍ത്തിച്ചത്. പെരുന്നാള്‍ പ്രമാണിച്ച് കച്ചവട സ്ഥാപനങ്ങള്‍ അവധിയിലാകുമെന്ന് കരുതി വസ്ത്രങ്ങളും മറ്റു അവശ്യവസ്ഥുക്കളും ആളുകള്‍ മുന്‍കൂട്ടി സംഭരിച്ചിരുന്നു. ഇതു വിപണിയിലെ തിരക്കു കുറച്ചു. എങ്കിലും വസ്ത്ര വിപണിയിലും പച്ചക്കറി, പൂ വിപണിയിലും തിരക്കനുഭവപ്പെട്ടു.
പച്ചക്കറി വില വര്‍ധന വിപണിയെ സാരമായി ബാധിച്ചെന്നു കച്ചവടക്കാര്‍ പറയുന്നു. സദ്യയ്ക്ക് ഒഴിച്ചുകൂടാനാകാത്ത കാബേജ്, പടവലം, ചേന എന്നിവയുടെ വിലയാണ് കൂടിയിരിക്കുന്നത്. ജൈവ പച്ചക്കറികള്‍ക്കാണ് വിപണിയില്‍ വന്‍ ഡിമാന്റ്.