മലപ്പുറം: ഇബ്‌റാഹീം നബിയുടെ ത്യാഗസ്മരണകളില്‍ അലിഞ്ഞ് ജില്ലയിലുടനീളം പെരുന്നാളാഘോഷം നടത്തി. മക്കയില്‍ ഹാജിമാരുടെ ലബ്ബൈക്ക് വിളികള്‍ക്കൊപ്പം പള്ളി മിനാരങ്ങളിലും വീടുകളിലും തക്ബീര്‍ ഉയര്‍ത്തിയാണ് വിശ്വാസി സമൂഹം പെരുന്നാള്‍ ദിനത്തെ എതിരേറ്റത്.
രാവിലെ ഏഴിനും പത്തിനുമിടയിലായി വിവിധ സമയങ്ങളിലായാണ് പള്ളികളില്‍ പെരുന്നാള്‍ നിസ്‌കാരം നടന്നത്. ത്യാഗസമ്പന്നമായ ഇബ്‌റാഹീം നബിയുടേയും കുടുംബത്തിന്റെയും ജീവിതചര്യ പിന്തുടരണമെന്നു ഖത്വീബുമാര്‍ പള്ളികളില്‍ ഉദ്‌ബോധന പ്രസംഗത്തില്‍ ഓര്‍മിപ്പിച്ചു. പെരുന്നാള്‍ നിസ്‌കാരത്തിനു ശേഷം ആരംഭിച്ച മൃഗബലി പെരുന്നാള്‍ ദിനങ്ങള്‍ അവസാനിക്കുന്ന വ്യാഴായ്ച വരെ തുടരും.
ബന്ധുവീടുകള്‍ സന്ദര്‍ശിക്കുന്നതിനും സൃഹൃബന്ധം പുതുക്കുന്നതിനുമാണ് മിക്കവരും പെരുന്നാള്‍ ദിനങ്ങളില്‍ സമയം കണ്ടെത്തിയത്. ജില്ലയിലെ ഉല്ലാസ കേന്ദ്രങ്ങളിലെല്ലാം വന്‍ ജനത്തിരക്കായിരുന്നു.
കുടുംബ സമേതം ജനങ്ങള്‍ ഒഴുകിയെത്തിയതോടെ ചിലയിടങ്ങളില്‍ ഗതാഗതക്കുരുക്കുണ്ടായി. ഓണം- പെരുന്നാള്‍ ആഘോഷങ്ങളുടെ ഭാഗമായി ജില്ലാ ടൂറിസം പ്രമോഷന്‍ കൗണ്‍സിലും വിവിധ സംഘടനകളും നിരവധി പരിപാടികള്‍ സംഘടിപ്പിച്ചിട്ടുണ്ട്.
ജില്ലയിലെ പ്രധാന വിനോദ സഞ്ചാര കേന്ദ്രങ്ങളിലാണ് ഡി.ടി.പി.സി പരിപാടി സംഘടിപ്പിച്ചിരിക്കുന്നത്.