തിരുവനന്തപുരം: തിരുവനന്തപുരത്ത് സുഹൃത്തിനെ മാരകമായി കുത്തിപ്പരുക്കേൽപ്പിച്ച കേസിൽ യുവാവിനെ നേമം പൊലിസ് അറസ്റ്റ് ചെയ്തു. നേമം ചുമട്ടുതാങ്ങിവിള സ്വദേശി രഞ്ജിത്ത് (29) ആണ് പിടിയിലായത്. തർക്കത്തിനിടെ തന്റെ പക്ഷം ചേർന്ന് സംസാരിക്കാതിരുന്നതാണ് അക്രമത്തിന് പിന്നിലെന്ന് പൊലിസ് വ്യക്തമാക്കി.

ആക്രമണത്തിന് പ്രകോപനം പഴയ തർക്കം

ഏതാനും ദിവസങ്ങൾക്ക് മുൻപ് രഞ്ജിത്ത് റോഡിൽ വെച്ച് മറ്റൊരാളുമായി തർക്കത്തിൽ ഏർപ്പെട്ടിരുന്നു. ഈ സമയത്ത് കൂടെയുണ്ടായിരുന്ന സുഹൃത്ത് രഞ്ജിത്തിനെ പിന്തുണച്ച് സംസാരിക്കുകയോ സഹായിക്കാൻ തയ്യാറാവുകയോ  ചെയ്തില്ല. ഇതിലുള്ള കടുത്ത പകയാണ് മർദ്ദനത്തിലേക്കും കത്തിക്കുത്തിലും കലാശിച്ചത്.

സംഭവം ഇങ്ങനെ:

ചൊവ്വാഴ്ച രാത്രി 10.30-ഓടെ ഇരുവരും ഒരുമിച്ച് പിക്കപ്പ് വാനിൽ യാത്ര ചെയ്യുമ്പോൾ പഴയ സംഭവം പറഞ്ഞ് രഞ്ജിത്ത് സുഹൃത്തിനെ അസഭ്യം പറയുകയും ക്രൂരമായി മർദ്ദിക്കുകയും ചെയ്തു.തുടർന്ന് പ്രതി തന്റെ കൈവശമുണ്ടായിരുന്ന കത്തി ഉപയോഗിച്ച് സുഹൃത്തിന്റെ ചെവിക്ക് മുകളിലായി കുത്തി പരിക്കേൽപ്പിച്ചു.

സംഭവത്തിന് പിന്നാലെ പരിക്കേറ്റ യുവാവ് നൽകിയ പരാതിയുടെ അടിസ്ഥാനത്തിൽ നേമം പൊലിസ് സ്ഥലത്തെത്തി രഞ്ജിത്തിനെ കസ്റ്റഡിയിലെടുത്തു. വധശ്രമം ഉൾപ്പെടെയുള്ള വകുപ്പുകൾ ചുമത്തി അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.