കൊച്ചി: എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ സൗത്ത് കേരള ഡെലിഗേറ്റ്‌സ് കോണ്‍ഫറന്‍സ് നാളെ തൊടുപുഴയില്‍ നടക്കും.
എറണാകുളം മുതല്‍ തിരുവനന്തപുരം വരെയുള്ള ജില്ലകളില്‍ നിന്ന് ശാഖാതലത്തില്‍ തിരഞ്ഞെടുക്കപ്പെടുന്ന അഞ്ചുവീതം പ്രധാന പ്രവര്‍ത്തകര്‍, ക്ലസ്റ്റര്‍, മേഖല, ജില്ലാ ഭാരവാഹികള്‍, വിവിധ വിങുകളുടെ ചെയര്‍മാന്‍മാര്‍, കണ്‍വീനര്‍മാര്‍ എന്നിവരാണ് കോണ്‍ഫറന്‍സില്‍ പങ്കെടുക്കുക. ഉച്ചയ്ക്ക് രണ്ടിന് അല്‍ അസ്ഹര്‍ ഓഡിറ്റോറിയത്തില്‍ സമസ്ത കേന്ദ്ര മുശാവറ അംഗം ഇ.എസ് ഹസന്‍ ഫൈസി ഉദ്ഘാടനം ചെയ്യും. സയ്യിദ് അബ്ദുല്ല തങ്ങള്‍ അല്‍ ഹൈദ്രോസി അധ്യക്ഷനാകും.
ജോയ്‌സ് ജോര്‍ജ് എം.പി, സയ്യിദ് റാജിഹ് അലി ശിഹാബ് തങ്ങള്‍ എന്നിവര്‍ വിശിഷ്ടാതിഥികളായി പങ്കെടുക്കും. വിവിധ സെഷനുകളിലായി പി.ജെ ജോസഫ് എം.എല്‍.എ, ഹൈദ്രോസ് മുസ്‌ലിയാര്‍ കുന്നം, ഷാഹുല്‍ ഹമീദ് മേല്‍മുറി, ഓണംപിള്ളി മുഹമ്മദ് ഫൈസി, സത്താര്‍ പന്തലൂര്‍, വി.കെ ഹാറൂന്‍ റശീദ് മാസ്റ്റര്‍, അബ്ദുറഹീം ചുഴലി, കെ.എന്‍.എസ് മൗലവി തുടങ്ങിയവര്‍ പങ്കെടുക്കും.
രാവിലെ പത്തിന് ജില്ലാ ഭാരവാഹികള്‍, ജില്ലാ ഉപസമിതി ചെയര്‍മാന്‍മാര്‍, കണ്‍വീനര്‍മാര്‍ എന്നിവര്‍ പങ്കെടുക്കുന്ന ലീഡേഴ്‌സ് പാര്‍ലമെന്റ് നടക്കും.