ന്യൂഡൽഹി: വിവാദ പരാമർശങ്ങളിലൂടെയും 'ഹിന്ദു രാഷ്ട്ര' വാദത്തിലൂടെയും ശ്രദ്ധേയനായ മധ്യപ്രദേശിലെ സ്വയം പ്രഖ്യാപിത ആൾദൈവം ധീരേന്ദ്ര കൃഷ്ണ ശാസ്ത്രിയുടെ സംഘടനയ്ക്ക് വിദേശ സംഭാവനകൾ സ്വീകരിക്കാൻ കേന്ദ്ര ആഭ്യന്തര മന്ത്രാലയത്തിന്റെ അനുമതി. ശാസ്ത്രിയുടെ ഔദ്യോഗിക സാമ്പത്തിക വിഭാഗമായ ഛത്തർപൂരിലെ ’ശ്രീ ബാഗേശ്വർ ജൻ സേവാ സമിതി ഗധ’യ്ക്കാണ് വിദേശ സംഭാവന നിയന്ത്രണ നിയമ (എഫ്.സി.ആർ.എ) പ്രകാരമുള്ള രജിസ്ട്രേഷൻ ലഭിച്ചത്.

സാംസ്കാരികം, സാമ്പത്തികം, വിദ്യാഭ്യാസം, സാമൂഹികം എന്നിവയ്ക്ക് പുറമെ 'മതപരം (ഹിന്ദു)' എന്ന പ്രാഥമിക വിഭാഗത്തിലാണ് സംഘടനയെ ഉൾപ്പെടുത്തിയിരിക്കുന്നത്. അഞ്ച് വർഷത്തേക്കാണ് പ്രവർത്തനാനുമതി നൽകിയിരിക്കുന്നത്.

ഏപ്രിൽ 15 വരെ രാജ്യത്ത് പുതുതായി 38 എൻ.ജി.ഒകൾക്കാണ് എഫ്.സി.ആർ.എ രജിസ്ട്രേഷൻ അനുവദിച്ചത്. ഇതിൽ ആറ് സംഘടനകൾ ഹിന്ദു മതവിഭാഗത്തിൽ നിന്നുള്ളതാണ്. രാമകൃഷ്ണ മിഷൻ (ബംഗാൾ, ബിഹാർ ശാഖകൾ), ദിവ്യജ്യോതി ജാഗൃതി സൻസ്ഥാൻ (ഡൽഹി), രാധാസ്വാമി സത്സംഗ് (യു.പി) എന്നിവ ഇതിൽ ഉൾപ്പെടുന്നു.

നിയമലംഘനം നടത്തിയതിന്റെയും കൃത്യസമയത്ത് പുതുക്കാത്തതിന്റെയും പേരിൽ 2026 മാർച്ച് മാസത്തോടെ 21,933 എൻ.ജി.ഒകളുടെ ലൈസൻസാണ് കേന്ദ്ര സർക്കാർ റദ്ദാക്കിയത്. നിലവിൽ രാജ്യത്ത് 14,538 സംഘടനകൾക്ക് മാത്രമാണ് വിദേശഫണ്ട് സ്വീകരിക്കാൻ അനുമതിയുള്ളത്.

എഫ്.സി.ആർ.എ നിയമം (2010) ഭേദഗതി ചെയ്യാനുള്ള ബിൽ കഴിഞ്ഞ ബജറ്റ് സമ്മേളനത്തിൽ സർക്കാർ അവതരിപ്പിച്ചിരുന്നു. ലൈസൻസ് റദ്ദാക്കപ്പെടുന്ന സംഘടനകളുടെ ആസ്തികൾ ആഭ്യന്തര മന്ത്രാലയത്തിന് ഏറ്റെടുക്കാൻ അധികാരം നൽകുന്നതാണ് പുതിയ ഭേദഗതി. എന്നാൽ, കേരളം, തമിഴ്‌നാട് മുഖ്യമന്ത്രിമാരും പ്രതിപക്ഷ പാർട്ടികളും ഇതിനെതിരെ ശക്തമായ പ്രതിഷേധം ഉയർത്തിയതിനെത്തുടർന്ന് ബിൽ പാസാക്കുന്നത് മാറ്റിവെച്ചു.

രാഷ്ട്രീയ പിന്തുണയോടെ പ്രകോപനപരമായ പ്രസ്താവനകൾ നടത്തുന്ന ധീരേന്ദ്ര ശാസ്ത്രിയുടെ സംഘടനയ്ക്ക് വിദേശഫണ്ട് അനുവദിച്ച നടപടി ഇതിനോടകം തന്നെ പുതിയ രാഷ്ട്രീയ വിവാദങ്ങൾക്ക് തിരികൊളുത്തിയിട്ടുണ്ട്.

The Indian government has granted Foreign Contribution Regulation Act (FCRA) registration to the organization led by self-styled godman Dhirendra Shastri, often referred to as Bageshwar Dham Sarkar. This approval allows the foundation to legally receive and utilize foreign donations for its activities.