ഇറാൻ യുദ്ധത്തെത്തുടർന്ന് ഹോർമുസ് കടലിടുക്കിലുണ്ടായ ഗതാഗത തടസ്സം യൂറോപ്യൻ വിമാനക്കമ്പനികളെ ഗുരുതരമായ ഇന്ധനപ്രതിസന്ധിയിലേക്ക് തള്ളിവിടുന്നു. വരും ആഴ്ചകളിൽ വിമാന ഇന്ധനത്തിന് കടുത്ത ക്ഷാമം നേരിടേണ്ടി വരുമെന്നും ഇത് വിമാന സർവിസുകളെ ബാധിക്കുമെന്നും റിപ്പോർട്ടുകൾ സൂചിപ്പിക്കുന്നു.

പ്രതിസന്ധിയിലായി റയൻ എയർ 
യൂറോപ്പിലെ പ്രമുഖ വിമാനക്കമ്പനിയായ റയൻ എയർ (Ryanair) തങ്ങളുടെ ഇന്ധന വിതരണക്കാർ മെയ് മാസം പകുതി വരെ മാത്രമേ ഇന്ധനം ഉറപ്പുനൽകുന്നുള്ളൂ എന്ന് പ്രസ്താവനയിൽ വ്യക്തമാക്കി. ഹോർമുസ് കടലിടുക്കിലൂടെയുള്ള എണ്ണക്കപ്പലുകളുടെ നീക്കം പുനരാരംഭിച്ചില്ലെങ്കിൽ ഇന്ധന ലഭ്യതയിൽ വലിയ കുറവുണ്ടാകുമെന്ന് കമ്പനി മുന്നറിയിപ്പ് നൽകുന്നു. മെയ് അല്ലെങ്കിൽ ജൂൺ മാസം വരെ ഈ സാഹചര്യം തുടരുകയാണെങ്കിൽ യൂറോപ്പിലെ പല വിമാനത്താവളങ്ങളിലും സർവിസുകൾ വെട്ടിക്കുറയ്‌ക്കേണ്ടി വരുമെന്ന് കമ്പനി വക്താവ് അറിയിച്ചു.

ALSO READ: ഡല്‍ഹി വിമാനത്താവളത്തില്‍ വിമാനങ്ങള്‍ കൂട്ടിയിടിച്ചു, കേടുപാടുകള്‍ സംഭവിച്ചതായി റിപ്പോര്‍ട്ട്; പൈലറ്റുമാര്‍ക്ക് സസ്‌പെന്‍ഷന്‍

യൂറോപ്പിന്റെ ഇന്ധന ആശ്രിതത്വം
യൂറോപ്പിലെ പല എണ്ണശുദ്ധീകരണ ശാലകളും കഴിഞ്ഞ ദശകങ്ങളിൽ അടച്ചുപൂട്ടിയതിനാൽ ഇറക്കുമതി ചെയ്യുന്ന ഇന്ധനത്തെയാണ് യൂറോപ്പ് പ്രധാനമായും ആശ്രയിക്കുന്നത്. ബ്രിട്ടനിൽ 1970-കളിൽ 18 എണ്ണശുദ്ധീകരണ ശാലകൾ ഉണ്ടായിരുന്നത് ഇപ്പോൾ നാലായി ചുരുങ്ങിയിട്ടുണ്ട്. യൂറോപ്പിലേക്ക് ഇറക്കുമതി ചെയ്യുന്ന വിമാന ഇന്ധനത്തിന്റെ 41 ശതമാനവും ഹോർമുസ് കടലിടുക്കിലൂടെയാണ് വരുന്നത്. ആഫ്രിക്കൻ രാജ്യങ്ങളുടെ 36 ശതമാനം ഇന്ധനവും ഈ വഴിയാണ് എത്തുന്നത്.

ഉപരോധവും ആഗോള പ്രത്യാഘാതവും
ഇറാനിലെ യുദ്ധം ആരംഭിച്ചതോടെ ഹോർമുസ് കടലിടുക്കിലൂടെയുള്ള ഇന്ധനനീക്കം ഇറാൻ തടഞ്ഞിരുന്നു. സമാധാന ചർച്ചകൾ പരാജയപ്പെട്ടതിനെതുടർന്ന് അമേരിക്കയും ഇറാനെതിരേ നാവിക ഉപരോധം ഏർപ്പെടുത്തിയിട്ടുണ്ട്. ഇതോടെ ലോകത്തെ ഏറ്റവും പ്രധാനപ്പെട്ട ഊർജ്ജ വിതരണ പാതകളിലൊന്ന് തടസ്സപ്പെട്ടു. യൂറോപ്പിന്റെ പക്കൽ ഇനി ഏകദേശം ആറ് ആഴ്ചത്തേക്കുള്ള ഇന്ധനം മാത്രമേ അവശേഷിക്കുന്നുള്ളൂ എന്ന് ഇന്റർനാഷനൽ എനർജി ഏജൻസി (IEA) മേധാവി ഫാത്തി ബിറോൾ മുന്നറിയിപ്പ് നൽകി.
ഇന്ധനക്ഷാമം പരിഹരിക്കാൻ അമേരിക്കൻ ശുദ്ധീകരണ ശാലകൾ ഇന്ധനം കയറ്റി അയക്കുന്നുണ്ടെങ്കിലും യൂറോപ്പിന് ആവശ്യമായതിന്റെ പകുതി പോലും നികത്താൻ ഇത് പര്യാപ്തമല്ല. പ്രതിസന്ധി നീളുകയാണെങ്കിൽ ടിക്കറ്റ് നിരക്ക് കുത്തനെ ഉയരാനും വിമാന സർവിസുകൾ റദ്ദാക്കപ്പെടാനും സാധ്യതയുണ്ട്.

The disruption of traffic in the Strait of Hormuz due to the conflict in Iran is pushing European airlines into a severe fuel crisis. Reports indicate that an acute shortage of aviation fuel is expected in the coming weeks, which is likely to significantly impact flight operations across the continent.