അബൂദബി: യു.എ.ഇയിൽ വരും ദിവസങ്ങളിൽ താപനില ക്രമാനുഗതമായി വർധിക്കുമെന്നും ചൊവ്വാഴ്ചയോടെ രാജ്യത്തെ ചില തീരപ്രദേശങ്ങളിലും ദ്വീപുകളിലും നേരിയ മഴയ്ക്ക് സാധ്യതയുണ്ടെന്നും ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. 

ഇന്നും നാളെയും രാജ്യത്ത് പൊതുവെ തെളിഞ്ഞ കാലാവസ്ഥയായിരിക്കും. എന്നാൽ, രാത്രിയിലും ഞായറാഴ്ച പുലർച്ചെയും ചില തീരപ്രദേശങ്ങളിൽ അന്തരീക്ഷ ഈർപ്പം വർധിക്കാൻ സാധ്യതയുണ്ട്. ഇക്കാലയളവിൽ കാറ്റ് മിതമായ നിലയിലായിരിക്കുമെന്നും അറേബ്യൻ ഗൾഫിലും ഒമാൻ കടലിലും തിരമാലകൾ ശാന്തമായിരിക്കുമെന്നും കാലാവസ്ഥാ വകുപ്പ് വ്യക്തമാക്കി.

തിങ്കളാഴ്ചയോടെ ദ്വീപുകൾ ഉൾപ്പെടെയുള്ള പ്രദേശങ്ങളിൽ ഭാഗികമായി മേഘാവൃതമായ കാലാവസ്ഥ അനുഭവപ്പെടും. കാറ്റ് ശക്തിപ്രാപിക്കാൻ ഇടയുള്ളതിനാൽ അറേബ്യൻ ഗൾഫിൽ കടൽ നേരിയ തോതിൽ പ്രക്ഷുബ്ധമാകാൻ സാധ്യതയുണ്ട്. 

ചൊവ്വാഴ്ചയോടെ ചില തീരപ്രദേശങ്ങളിലും ദ്വീപുകളിലും നേരിയ മഴ ലഭിച്ചേക്കും. ഇടവിട്ട് കാറ്റ് ശക്തമാകാൻ സാധ്യതയുള്ളതിനാൽ ചിലയിടങ്ങളിൽ പൊടിക്കാറ്റിനും സാധ്യതയുണ്ട്. കിഴക്ക് നിന്നുള്ള ഉപരിതല ന്യൂനമർദവും പടിഞ്ഞാറ് നിന്നുള്ള ഉച്ചമർദവുമാണ് യു.എ.ഇയിലെ കാലാവസ്ഥാ മാറ്റങ്ങൾക്ക് കാരണം. ചൊവ്വാഴ്ച പടിഞ്ഞാറൻ അറേബ്യൻ ഗൾഫിൽ കടൽ പ്രക്ഷുബ്ധമാകാൻ സാധ്യതയുണ്ടെന്നും കാലാവസ്ഥാ കേന്ദ്രം മുന്നറിയിപ്പ് നൽകി.

English summary : Light rain is expected over some coastal areas and islands on Tuesday, as weather conditions across the UAE are influenced by a surface low-pressure system from the east and a high-pressure system from the west, the National Centre of Meteorology said.