തിരുവനന്തപുരം: സി.എം.ആര്‍.എല്‍- എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട് വീണ ടിയുടെ ബാങ്ക് ലോക്കര്‍ തുറന്നു പരിശോധിക്കുന്നു. തിരുവനന്തപുരം എം.ജി റോഡിലുള്ള എച്ച്.ഡി.എഫ്.സി ബാങ്കിലെ ലോക്കറാണ് ഇ.ഡി ഉദ്യോഗസ്ഥര്‍ തുറന്നു പരിശോധിക്കുന്നത്. ബാങ്കിന് പുറത്ത് വന്‍ സുരക്ഷയാണ് ഏര്‍പ്പെടുത്തിയിരിക്കുന്നത്.

കേസുമായി ബന്ധപ്പെട്ട് വീണയുടെ ബാങ്ക് അക്കൗണ്ട് നേരത്തെഇ.ഡി മരവിപ്പിച്ചിരുന്നു.കേസില്‍ വീണയെ എന്‍ഫോഴ്‌സ്‌മെന്റ് ഡയരക്ടറേറ്റ് (ഇ.ഡി) നേരത്തെ ചോദ്യം ചെയ്തിരുന്നു. ഇ.ഡി കൊച്ചി ഓഫിസില്‍ എട്ടര മണിക്കൂറോളം ചോദ്യം ചെയ്തതിനു ശേഷമാണ് വീണയെ വിട്ടയച്ചത്. ഇ.ഡി. ഡെപ്യൂട്ടി ഡയരക്ടറുടെ നേതൃത്വത്തില്‍ മുതിര്‍ന്ന ഉദ്യോഗസ്ഥരാണ് വീണയെ ചോദ്യം ചെയ്തത്. വീണയുടെ കമ്പനിയായ എക്‌സാലോജിക് കരിമണല്‍ കമ്പനിയായ സി.എം.ആര്‍.എലില്‍നിന്ന് 2.78 കോടി രൂപ സേവനം നല്‍കാതെ കൈപറ്റിയതിനെപ്പറ്റിയാണ് ഇ.ഡി മുഖ്യമായും ചോദിച്ചറിഞ്ഞത്. വിദ്യാഭ്യാസത്തിനും മറ്റും ഐ.ടി സേവനങ്ങള്‍ നല്‍കുന്ന എക്‌സാലോജിക് കമ്പനി എന്ത് സേവനമാണ് സി.എം.ആര്‍.എലിന് നല്‍കിയതെന്ന് ഇ.ഡി വീണയോട് ചോദിച്ചു. പണം കൈപ്പറ്റിയതിന്റെ രേഖകളുടെയും പിണറായി വിജയന്റെ വീട്ടില്‍നിന്നുള്‍പ്പെടെ നടത്തിയ റെയ്ഡുകള്ളില്‍നിന്ന് ലഭിച്ച രേഖകളുടെയും അടിസ്ഥാനത്തിലായിരുന്നു ചോദ്യംചെയ്യല്‍.

സി.എം.ആര്‍.എലിന്റെ സഹോദര സ്ഥാപനത്തില്‍നിന്ന് 50 ലക്ഷം രൂപ വായ്പയെടുത്തതിനെപ്പറ്റിയും ചോദ്യമുണ്ടായി. കഴിഞ്ഞ ദിവസങ്ങളില്‍ സി.എം.ആര്‍.എല്‍ എം.ഡിയുടെ ഭാര്യയെയും മക്കളെയും ഇ.ഡി ചോദ്യംചെയ്തിരുന്നു. ഇവരില്‍നിന്ന് ലഭിച്ച വിവരങ്ങളുടെ അടിസ്ഥാനത്തിലും മറ്റും തയാറാക്കിയ പ്രത്യേക ചോദ്യാവലി അടിസ്ഥാനമാക്കിയായിരുന്നു ചോദ്യങ്ങള്‍.

സേവനമൊന്നും നല്‍കാതെ സി.എം.ആര്‍.എല്‍ 2.78 കോടി വീണയുടെ അക്കൗണ്ടിലേക്ക് നല്‍കിയെന്ന് എസ്.എഫ്.ഐ.ഒയും ഇ.ഡിയും കണ്ടെത്തിയിരുന്നു. എസ്.എഫ്.ഐ.ഒ ശേഖരിച്ച വീണയ്‌ക്കെതിരേയുള്ള തെളിവുകളും കോടതി നിര്‍ദേശപ്രകാരം ഇ.ഡിക്ക് കൈമാറിയിട്ടുണ്ട്. ഇതേപറ്റിയും വീണയോട് ഇ.ഡി ചോദ്യങ്ങള്‍ ആരാഞ്ഞു. വീണയുടെ മറുപടികള്‍ വിശദമായി പരിശോധിച്ച ശേഷമായിരിക്കും വീണ്ടും ചോദ്യംചെയ്യാന്‍ വിളിപ്പിക്കുക. സി.എം.ആര്‍.എലില്‍നിന്ന് ലഭിച്ച പണം സാമ്പത്തിക കുറ്റകൃത്യത്തിന് ഉപയോഗിച്ചോ എന്നും ഇ.ഡി പരിശോധിക്കുന്നുണ്ട്. വീണയ്ക്ക് മാസപ്പടിയായി ലഭിച്ച 2.78 കോടി ഉപയോഗിച്ച് നടത്തിയ സാമ്പത്തിക ഇടപാടുകളും ഇ.ഡി പരിശോധിക്കുന്നുണ്ട്.

The Enforcement Directorate (ED) has intensified its investigation into the alleged Masappadi case by conducting an inspection of a bank locker linked to T. Veena. The move is part of the agency’s ongoing efforts to gather evidence and verify financial transactions connected to the case.