തെഹ്‌റാന്‍: ഹോര്‍മുസ് കടലിടുക്ക് വീണ്ടും അടച്ചതായി റിപ്പോര്‍ട്ട്. ഹോര്‍മുസ് കടലിടുക്കിന്റെ നിയന്ത്രണം 'പഴയ അവസ്ഥയിലേക്ക് മടങ്ങി'. എന്ന് ഇസ് ലാമിക് റെവല്യൂഷനറി ഗാര്‍ഡ് കോര്‍പ് (ഐ.ആര്‍.ജി.സി) പറഞ്ഞതായി അല്‍ ജസീറ റിപ്പോര്‍ട്ട് ചെയ്യുന്നു. ഇറാനിയന്‍ കപ്പലുകള്‍ക്കെതിരായ ഉപരോധം യു.എസ് തുടര്‍ന്നതിനാലാണ് നീക്കമെന്നാണ് റിപ്പോര്‍ട്ട് പറയുന്നത്. 

ഉപരോധം എന്നതിന്റെ മറവില്‍ യുഎസ് 'കടല്‍ക്കൊള്ളയും കടല്‍ മോഷണവും തുടരുകയാണ്' എന്ന് ഐ.ആര്‍.ജി.സിയുടെ സംയുക്ത സൈനിക കമാന്‍ഡ് പറഞ്ഞു.

ALSO READ: നാവിക ഉപരോധം തുടര്‍ന്നാല്‍ ഹോര്‍മുസ് കടലിടുക്ക് അടച്ചു പൂട്ടും; യു.എസിന് ഇറാന്റെ മുന്നറിയിപ്പ് 

'ഇക്കാരണത്താല്‍, ഹോര്‍മുസ് കടലിടുക്കിന്റെ നിയന്ത്രണം അതിന്റെ പഴയ അവസ്ഥയിലേക്ക് മടങ്ങി. ഈ തന്ത്രപ്രധാനമായ ജലപാത ഇപ്പോള്‍ സായുധ സേനയുടെ കര്‍ശനമായ നിയന്ത്രണത്തിന് കീഴിലാണ്,' ഐ.ആര്‍.ജി.സിയെ ഉദ്ധരിച്ചുള്ള ഇറാനിയന്‍ ബ്രോഡ്കാസ്റ്ററിന്റെ പ്രസ്താവനയില്‍ പറയുന്നു.

'ഇറാനില്‍ നിന്ന് അവരുടെ ലക്ഷ്യസ്ഥാനങ്ങളിലേക്കും തിരിച്ചും സഞ്ചരിക്കുന്ന കപ്പലുകള്‍ക്ക് പൂര്‍ണ്ണ നാവിഗേഷന്‍ സ്വാതന്ത്ര്യം അമേരിക്ക പുനഃസ്ഥാപിക്കുന്നതുവരെ ഹോര്‍മുസ് കടലിടുക്കിന്റെ നില കര്‍ശനമായി നിയന്ത്രിക്കപ്പെടുകയും പഴയ അവസ്ഥയില്‍ തുടരുകയും ചെയ്യും,' അത് മുന്നറിയിപ്പ് നല്‍കുന്നു. 

'മുന്‍ ചര്‍ച്ചകള്‍ പ്രകാരം എത്തിച്ചേര്‍ന്ന കരാറുകള്‍ അനുസരിച്ച് ഇസ്‌ലാമിക് റിപ്പബ്ലിക് ഓഫ് ഇറാന്‍, ഹോര്‍മുസ് കടലിടുക്ക് വഴി പരിമിതമായ എണ്ണം എണ്ണ ടാങ്കറുകളും വാണിജ്യ കപ്പലുകളും നിയന്ത്രിതമായി കടത്തിവിടാന്‍ സമ്മതിച്ചു. എന്നാല്‍ നിര്‍ഭാഗ്യവശാല്‍, ആവര്‍ത്തിച്ചുള്ള വാഗ്ദാന ലംഘനങ്ങളുടെ ചരിത്രമുള്ള അമേരിക്കക്കാര്‍, ഉപരോധത്തിന്റെ മറവില്‍ കൊള്ളയിലും കടല്‍ക്കൊള്ളയിലും ഏര്‍പ്പെടുന്നത് തുടരുന്നു.'ഖതം അല്‍-അന്‍ബിയ സെന്‍ട്രല്‍ ഹെഡ്ക്വാര്‍ട്ടേഴ്‌സിന്റെ വക്താവ് ലെഫ്റ്റനന്റ് കേണല്‍ ഇബ്രാഹിം സോള്‍ഫാകാരി ചൂണ്ടിക്കാട്ടി.

ALSO READ: യുഎസ്-ഇറാൻ നിർണ്ണായക ചർച്ചകൾക്ക് വീണ്ടും പാകിസ്താൻ വേദിയാകുന്നു; ഉറ്റുനോക്കി ലോകം

'അതിനാല്‍, തന്ത്രപ്രധാനമായ ഹോര്‍മുസ് കടലിടുക്ക് ഇറാന്റെ സായുധ സേനയുടെ കര്‍ശനമായ മാനേജ്‌മെന്റിനും നിയന്ത്രണത്തിനും കീഴിലാണ്.'

 'ഇറാന്‍ കപ്പലുകള്‍ക്ക് പൂര്‍ണ്ണമായ നാവിഗേഷന്‍ സ്വാതന്ത്ര്യം അമേരിക്ക അംഗീകരിക്കുന്നില്ലെങ്കില്‍, ഹോര്‍മുസ് കടലിടുക്കിലെ സ്ഥിതി കര്‍ശനമായി നിയന്ത്രിക്കപ്പെടുകയും അതിന്റെ മുന്‍ അവസ്ഥയില്‍ തന്നെ തുടരുകയും ചെയ്യും.- അദ്ദേഹം വ്യക്തമാക്കി.

ഇറാന് മേലുള്ള നാവിക ഉപരോധം തുടരാനാണ് തീരുമാനമെങ്കില്‍ ഹോര്‍മുസ് കടലിടുക്ക് അടച്ചുപൂട്ടുമെന്ന് ഇറാന്റെ പാര്‍ലമെന്റ് സ്പീക്കര്‍ മുഹമ്മദ് ബാഖര്‍ ഖാലിബാഫ് മുന്നറിയിപ്പ് നല്‍കിയിരുന്നു. ഹോര്‍മുസ് തുറക്കാന്‍ തീരുമാനിച്ചെങ്കിലും ഉപരോധം ശക്തമായി തുടരുമെന്ന യുഎസ് പ്രസിഡന്റ് ഡോണള്‍ഡ് ട്രംപിന്റെ പ്രസ്താവനക്ക് പിന്നാലെയാണ് ഇറാന്‍ കടുത്ത മുന്നറിയിപ്പ് നല്‍കിയത്. 

ഇറാന്റെ അനുമതിയോടെയും നിശ്ചയിക്കപ്പെട്ട പാതയിലൂടെയും മാത്രമേ  ഹോര്‍മുസ് കടലിടുക്കിലൂടെയുള്ള ഗതാഗതം അനുവദിക്കൂ എന്നും ഖാലിബാഫ് തന്റെ എക്സ് പോസ്റ്റില്‍ വ്യക്തമാക്കിയിരുന്നു. ഇനി ഉപരോധം തുടരാന്‍ തന്നെയാണ് തീരുമാനമെങ്കില്‍ കടലിടുക്ക് തുറന്നിടില്ലെന്നും അദ്ദേഹം അറിയിച്ചിരുന്നു.

ഹോര്‍മുസ് കടലിടുക്ക് തുറക്കുമെന്ന് ഇറാന്‍ പ്രഖ്യാപിച്ചെങ്കിലും യു.എസ് ഏര്‍പ്പെടുത്തിയ നാവിക ഉപരോധം തുടരുമെന്നാണ് കഴിഞ്ഞ ദിവസം ട്രംപ് പ്രഖ്യാപിച്ചിരുന്നു.  ഇറാനുമായി സമാധാന കരാറിലെത്തുംവരെ ഉപരോധം തുടരുമെന്നാണ് അമേരിക്കയുടെ നയം. ഇറാന്റെ സമ്പുഷ്ടീകരിച്ച യുറേനിയം അമേരിക്കക്ക് ലഭിക്കുമെന്നും, മിക്ക കാര്യങ്ങളിലും ധാരണയിലെത്തിയതിനാല്‍ കുറഞ്ഞ സമയം മാത്രമേ ഉപരോധം നിലനില്‍ക്കൂ എന്നുമാണ് ട്രംപ് പ്രതികരിച്ചത്. 

iranian media reports claim the strait of hormuz has been closed again after continued us sanctions, with irgc stating control of the vital waterway has returned to previous status.