അന്റാലിയ: മേഖലയിലെ മാറിക്കൊണ്ടിരിക്കുന്ന രാഷ്ട്രീയ സാഹചര്യങ്ങൾക്കിടയിൽ ഇറാനുമായുള്ള ബന്ധം പഴയ നിലയിലേക്ക് മടങ്ങുന്നത് അസാധ്യമാണെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് അൻവർ ഗർഗാഷ്. തുർക്കിയിൽ നടന്ന അന്റാലിയ ഡിപ്ലോമസി ഫോറത്തിൽ സംസാരിക്കുകയായിരുന്നു അദ്ദേഹം. ഭീഷണികളും ആക്രമണങ്ങളും ഒരു പുതിയ യാഥാർത്ഥ്യമായി അംഗീകരിച്ച് മുന്നോട്ട് പോകാൻ യുഎഇക്ക് കഴിയില്ലെന്ന് അദ്ദേഹം തറപ്പിച്ചു പറഞ്ഞു.

വിശ്വാസ്യതയും പ്രവൃത്തിയും പ്രധാനം

വാക്കുകളിലൂടെയല്ല, മറിച്ച് പ്രവൃത്തികളിലൂടെയായിരിക്കും ഇനി ഇറാനെ വിലയിരുത്തുകയെന്ന് ഗർഗാഷ് ഓർമ്മിപ്പിച്ചു. കൃത്യമായ സത്യസന്ധതയും ഉറപ്പുകളും ഇല്ലാതെ ബന്ധം പുനഃസ്ഥാപിക്കാനാവില്ലെന്നും ഗൾഫ് രാജ്യങ്ങൾക്ക് നേരെ ഇറാൻ നടത്തിയ ആക്രമണങ്ങളുടെ മുറിവുകൾ ഇപ്പോഴും തങ്ങൾ അനുഭവിക്കുകയാണെന്നും അദ്ദേഹം കൂട്ടിച്ചേർത്തു.

യുഎഇ നയതന്ത്ര ചർച്ചകൾക്കുള്ള വാതിൽ പൂർണ്ണമായും അടയ്ക്കുന്നില്ലെങ്കിലും പ്രകോപനങ്ങൾ അവസാനിപ്പിക്കാതെ വിട്ടുവീഴ്ചയുണ്ടാവില്ലെന്ന് അദ്ദേഹം സൂചിപ്പിച്ചു.

ALSO READ: അബുദബി മുസഫയിൽ പെയ്ഡ് പാർക്കിംഗ് നിലവിൽ വന്നു; പുതിയ അഞ്ച് സെക്ടറുകളിൽ കൂടി 'മവാഖിഫ്' സംവിധാനം

പ്രതിരോധ കരുത്ത് തെളിയിച്ചു

യുദ്ധകാലയളവിൽ ഇസ്റാഈലിനേക്കാൾ കൂടുതൽ ഇറാനിയൻ മിസൈൽ-ഡ്രോൺ ആക്രമണങ്ങൾക്ക് ഇരയായത് യുഎഇയാണെന്നും അദ്ദേഹം വെളിപ്പെടുത്തി. ഏകദേശം 2,800-ലധികം മിസൈലുകളും ഡ്രോണുകളുമാണ് യുഎഇയെ ലക്ഷ്യമാക്കി എത്തിയത്. എന്നാൽ ഇതിൽ 96 ശതമാനവും വിജയകരമായി പ്രതിരോധിക്കാൻ യുഎഇ സേനയ്ക്ക് കഴിഞ്ഞു. ഇത് രാജ്യത്തിന്റെ പ്രതിരോധ സന്നദ്ധതയുടെയും ഇറാൻ നടത്തിയ തെറ്റായ കണക്കുകൂട്ടലുകളുടെയും തെളിവായി അദ്ദേഹം ചൂണ്ടിക്കാട്ടി.

അതേസമയം, ആക്രമണങ്ങൾ മൂലമുണ്ടായ നാശനഷ്ടങ്ങൾക്ക് ഇറാൻ പൂർണ്ണമായ നഷ്ടപരിഹാരം നൽകണമെന്ന് ബഹ്‌റൈൻ ഐക്യരാഷ്ട്രസഭയോട് ആവശ്യപ്പെട്ടിട്ടുണ്ട്. യുഎഇ, സഊദി അറേബ്യ ഉൾപ്പെടെയുള്ള ഗൾഫ് രാജ്യങ്ങൾ ഇറാന്റെ ആക്രമണങ്ങളെ അപലപിച്ച് നേരത്തെ സംയുക്ത പ്രസ്താവന പുറപ്പെടുവിച്ചിരുന്നു.

uae diplomatic advisor anwar gargash declares no return to previous iran relations without firm guarantees and reassessment following iranian aggression, signaling a tough new stance on regional security and trust.