ദുബൈ : യുഎഇയിൽ വരുംദിവസങ്ങളിൽ ശക്തമായ ചൂടും പൊടിക്കാറ്റും തുടരുമെന്ന് ദേശീയ കാലാവസ്ഥാ കേന്ദ്രം (NCM). ഉൾപ്രദേശങ്ങളിൽ താപനില 47 ഡിഗ്രി സെൽഷ്യസ് വരെ ഉയർന്നേക്കാം. മണിക്കൂറിൽ 40 കിലോമീറ്റർ വേഗതയിൽ വരെ വീശിയടിച്ചേക്കാവുന്ന കാറ്റ് ചിലയിടങ്ങളിൽ കാഴ്ചപരിധി കുറയ്ക്കാൻ ഇടയാക്കുമെന്നും മുന്നറിയിപ്പുണ്ട്.

രാജ്യത്തിന്റെ ഭൂരിഭാഗം പ്രദേശങ്ങളിലും പൊതുവെ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ മേഖലകളിൽ നേരിയ മേഘാവൃതമായ അന്തരീക്ഷത്തിന് സാധ്യതയുണ്ട്. തെക്ക്-പടിഞ്ഞാറൻ, വടക്ക്-പടിഞ്ഞാറൻ ദിശകളിൽ നിന്ന് വീശുന്ന കാറ്റ് ഉച്ചയോടെ ശക്തമാകുന്നതിനെ തുടർന്ന് അറേബ്യൻ ഗൾഫ് പ്രക്ഷുബ്ധമാകാൻ സാധ്യതയുണ്ട്. ഒമാൻ കടൽ പൊതുവെ ശാന്തമായിരിക്കും.

വിവിധ പ്രദേശങ്ങളിലെ പ്രതീക്ഷിക്കുന്ന ഉയർന്ന താപനില 

* ഉൾപ്രദേശങ്ങൾ: 42°C മുതൽ 47°C വരെ

* തീരദേശങ്ങളും ദ്വീപുകളും: 36°C മുതൽ 42°C വരെ

* മലയോര മേഖലകൾ: 32°C മുതൽ 38°C വരെ

വരുന്ന വെള്ളിയാഴ്ച വരെ സമാനമായ കാലാവസ്ഥ തുടരുമെന്നാണ് പ്രവചനം. കാറ്റിന്റെ വേഗത മണിക്കൂറിൽ 10 മുതൽ 25 കിലോമീറ്റർ വരെയായിരിക്കുമെങ്കിലും, ചില സമയങ്ങളിൽ ഇത് 40 കിലോമീറ്റർ വരെ ഉയർന്നേക്കാം. കാറ്റ് ശക്തമാകുന്നതോടെ പൊടിയും മണലും ഉയരുന്നത് റോഡ് യാത്രക്കാർ ഉൾപ്പെടെയുള്ളവർ ജാഗ്രത പാലിക്കേണ്ടതുണ്ടെന്ന് അധികൃതർ ഓർമ്മിപ്പിച്ചു. 

English summary : The UAE will experience generally fair but hot and dusty weather over the coming days, with inland temperatures reaching up to 47°C and winds of up to 40 km/h, the National Centre of Meteorology (NCM) said on Monday.