തിരുച്ചിറപ്പള്ളി: ഒരു വിമാനത്തിലെ യാത്രക്കാരില്‍ ഭൂരിഭാഗവും വോട്ട് ചെയ്യാനായി നാട്ടിലേക്ക് വരുന്നവര്‍. പൈലറ്റിനെ അതിശയിപ്പിച്ചു ഇത്. യാത്രക്കാരെ അഭിനന്ദിക്കാതിരിക്കാന്‍ ആവില്ലായിരുന്നു അദ്ദേഹത്തിന്. സിംഗപ്പൂരില്‍ നിന്ന് തിരുച്ചിറപ്പള്ളിയിലേക്കുള്ള ഇന്‍ഡിഗോ വിമാനത്തില്‍ വോട്ട് ചെയ്യാനെത്തിയവരുമായി പൈലറ്റ് സംസാരിക്കുന്ന വിഡിയോ  സോഷ്യല്‍മീഡിയയില്‍ വൈറലായിരിക്കുകയാണ്.

തമിഴ്‌നാട്ടിലെ 234 നിയമസഭാ മണ്ഡലങ്ങളിലേക്ക് നടന്ന തെരഞ്ഞെടുപ്പില്‍ 85.03 ശതമാനം പോളിങ്ങാണ് രേഖപ്പെടുത്തിയത്. ഏകദേശം 4.7 കോടി വോട്ടര്‍മാര്‍ ആണ് സമ്മതിദാനവകാശം വിനിയോഗിച്ചതെന്നാണ് കണക്കുകള്‍ പറയുന്നത്. പ്രവാസികളടക്കമുള്ളവര്‍ വോട്ട് ചെയ്യാനായി കൂട്ടത്തോടെ സ്വന്തം നാട്ടിലേക്ക് തിരിച്ചെത്തിയതായും റിപ്പോര്‍ട്ടുകള്‍ വ്യക്തമാക്കുന്നു.

ALSO READ: ഇന്ത്യയുൾപ്പെടെയുള്ള രാജ്യങ്ങൾക്കെതിരെ ട്രംപിന്റെ 'നരകക്കുഴി' പ്രയോഗം: അമേരിക്കൻ പ്രസിഡന്റിനെതിരെ ആഞ്ഞടിച്ച് ഇന്ത്യ; ഉഭയകക്ഷി ബന്ധത്തിന് നിരക്കാത്തതെന്ന് വിമർശനം

വിമാനത്തിന്റെ പൈലറ്റ് ക്യാപ്റ്റന്‍ പ്രദീപ് കൃഷ്ണന്‍ യാത്രക്കാരുമായി സംസാരിക്കുന്നതാണ് വീഡിയോ. വോട്ട് ചെയ്യാന്‍ നാട്ടിലേക്ക് പോകുന്നവര്‍ ആരെല്ലാമാണെന്നാണ് അദ്ദേഹം ചോദിക്കുന്നത്.മിക്കവാറും എല്ലാ യാത്രക്കാരും കൈകള്‍ ഉയര്‍ത്തുന്നു.  തുടര്‍ന്ന് തെരഞ്ഞെടുപ്പിന്റെ ഭാഗമാകേണ്ട പ്രാധാന്യത്തെക്കുറിച്ച് അദ്ദേഹം സംസാരിക്കുന്നു.