ഷാർജ: ഇമാറാത്തിലെ വ്യാവസായിക മേഖലയിലേക്ക് കൂടുതൽ നിക്ഷേപകരെയും സംരംഭകരെയും ആകർഷിക്കുന്നതിനായി വൻ ഇളവുകളുമായി ഷാർജ സാമ്പത്തിക വികസന വകുപ്പ്. വെറും 1,000 ദിർഹത്തിന് വ്യാവസായിക ലൈസൻസ് (Instant Industrial License) നൽകുന്ന പുതിയ പദ്ധതിക്ക് ഷാർജ തുടക്കം കുറിച്ചു. പുതിയ നിക്ഷേപകർക്ക് കുറഞ്ഞ ചിലവിൽ വേഗത്തിൽ ബിസിനസ് ആരംഭിക്കാൻ ഈ നീക്കം സഹായിക്കും.

അബുദബി ADNEC സെന്ററിൽ മെയ് 4 മുതൽ 7 വരെ നടക്കാനിരിക്കുന്ന 'മെയ്ക്ക് ഇറ്റ് ഇൻ ദി എമിറേറ്റ്സ്' ഫോറത്തിൽ വെച്ച് പദ്ധതി ഔദ്യോഗികമായി ഉദ്ഘാടനം ചെയ്യും. ഷാർജയിലെ ചെറുകിട-ഇടത്തരം സംരംഭങ്ങളെ പിന്തുണയ്ക്കുന്ന 'റുവാദ്' (Ruwad) ഫൗണ്ടേഷനുമായി സഹകരിച്ചാണ് പദ്ധതി നടപ്പിലാക്കുന്നത്.

പദ്ധതിയുടെ പ്രധാന സവിശേഷതകൾ

• മിതമായ ചിലവ്: ലൈസൻസ് നടപടികൾക്കായി വെറും 1,000 ദിർഹം മാത്രം.
• തൽക്ഷണ അനുമതി: നൂലാമാലകളില്ലാതെ വേഗത്തിൽ ലൈസൻസ് സ്വന്തമാക്കാം.
• വിപുലമായ മേഖല: ഷാർജയിൽ അനുവദനീയമായ എല്ലാത്തരം വ്യാവസായിക പ്രവർത്തനങ്ങൾക്കും ഈ ലൈസൻസ് ബാധകമാണ്.
• ലക്ഷ്യം: പ്രാദേശിക, അന്തർദേശീയ തലത്തിലുള്ള കൂടുതൽ സംരംഭകരെ ഷാർജയിലേക്ക് എത്തിക്കുക.

നിക്ഷേപകർക്ക് കരുത്തായി പുതിയ നയം

ദേശീയ സംരംഭങ്ങളുടെ വളർച്ച പ്രോത്സാഹിപ്പിക്കാനും പ്രാദേശിക വ്യവസായങ്ങളുടെ മത്സരശേഷി വർദ്ധിപ്പിക്കാനും ലക്ഷ്യമിട്ടാണ് ഷാർജ സർക്കാർ പദ്ധതി നടപ്പാക്കുന്നത്. നിക്ഷേപകർക്ക് കൂടുതൽ വഴക്കമുള്ള സേവനങ്ങളും ആകർഷകമായ ആനുകൂല്യങ്ങളും നൽകുന്നതിലൂടെ മേഖലയിലെ പ്രധാന വ്യാവസായിക കേന്ദ്രമായി മാറാനുള്ള ഷാർജയുടെ കാഴ്ചപ്പാടാണ് ഇതിലൂടെ വ്യക്തമാകുന്നത്.

പുതിയ നിക്ഷേപകർക്കും സ്റ്റാർട്ടപ്പുകൾക്കും ലൈസൻസ് സംവിധാനം വലിയൊരു മുതൽക്കൂട്ടാകുമെന്നുറപ്പാണ്. ചുരുങ്ങിയ ചിലവിൽ വ്യവസായം തുടങ്ങാൻ ആഗ്രഹിക്കുന്നവർക്ക് ഷാർജയുടെ ഈ ചുവടുവെപ്പ് ഒരു മികച്ച സുവർണ്ണാവസരമാണ് നൽകുന്നത്.

ALSO READ: ദുബൈയിൽ ഇനി 'ഗ്ലൈഡ്‌വേസ്' യുഗം; ഗതാഗതക്കുരുക്ക് അഴിക്കാൻ ഡ്രൈവറില്ലാ പോഡുകൾ എത്തുന്നു

sharjah has made industrial licensing procedures easier, creating fresh opportunities for investors and entrepreneurs. the updated process is expected to attract business owners, boost industrial growth, and strengthen the emirate’s investment-friendly ecosystem.