മാഞ്ചസ്റ്റർ: ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയുടെ അച്ചടക്കത്തെയും കായികക്ഷമതയെയും കുറിച്ച് വാചാലനായി മുൻ മാഞ്ചസ്റ്റർ യുണൈറ്റഡ് താരം ആന്റണി. യുണൈറ്റഡിൽ റൊണാൾഡോയുടെ രണ്ടാം വരവിൽ ആറ് മാസത്തോളം ഇരുവരും സഹതാരങ്ങളായിരുന്നു. അക്കാലത്ത് സൗനയിൽ (Sauna) വെച്ച് നടന്ന ഒരു സംഭവമാണ് ആന്റണി ഇപ്പോൾ വെളിപ്പെടുത്തിയിരിക്കുന്നത്.

40-ലും 23-ന്റെ കരുത്ത്

സൗനയിൽ ഇരിക്കുമ്പോൾ റൊണാൾഡോ തന്റെ ശാരീരികക്ഷമതയെക്കുറിച്ച് ആന്റണിയോട് തമാശയായി സംസാരിച്ചതാണ് താരം ഓർത്തെടുത്തത്.

"സൗനയിൽ വെച്ച് അദ്ദേഹം ഒരിക്കൽ എന്നോട് തമാശ പറഞ്ഞു. തന്റെ ശരീരം കാണിച്ചു തന്നിട്ട്, എനിക്ക് 23 വയസ്സ് തോന്നുന്നുണ്ടോ എന്ന് അദ്ദേഹം ചോദിച്ചു. ആ സമയത്ത് അദ്ദേഹത്തിന് 40 വയസ്സിനോട് അടുത്ത് പ്രായമുണ്ട്. തന്റെ ശരീരത്തിന് നൽകുന്ന സംരക്ഷണവും കരുത്തും കണ്ടപ്പോൾ എനിക്ക് നാണക്കേട് തോന്നി. എല്ലാവർക്കും മാതൃകയാക്കാവുന്ന വ്യക്തിത്വമാണ് അദ്ദേഹത്തിന്റേതെെന്ന്."  ആന്റണി

ഫുട്ബോളിനപ്പുറമുള്ള സൗഹൃദം

റൊണാൾഡോ ഒരു കഠിനഹൃദയനാണെന്ന പൊതുധാരണ തെറ്റാണെന്നും ആന്റണി പറഞ്ഞു.ദൈനംദിന ജീവിതത്തിൽ റൊണാൾഡോ വളരെ തമാശപ്രിയനാണ്.പലപ്പോഴും 'ഇന്ന് ഫുട്ബോളിനെക്കുറിച്ച് സംസാരിക്കില്ല' എന്ന് അദ്ദേഹം പറയുമായിരുന്നു. ജീവിതം, പുസ്തകങ്ങൾ തുടങ്ങി ഫുട്ബോളിന് പുറത്തുള്ള നിരവധി കാര്യങ്ങളെക്കുറിച്ച് അദ്ദേഹം സംസാരിക്കുമായിരുന്നു. അദ്ദേഹത്തിൽ നിന്ന് ഒരുപാട് കാര്യങ്ങൾ പഠിക്കാൻ കഴിഞ്ഞതായും ആന്റണി കൂട്ടിച്ചേർത്തു.

യുണൈറ്റഡിലെ പരാജയവും ബെറ്റിസിലെ ഉയർച്ചയും

86 മില്യൺ പൗണ്ടിന് മാഞ്ചസ്റ്റർ യുണൈറ്റഡിലെത്തിയ ആന്റണിക്ക് പ്രീമിയർ ലീഗിൽ പ്രതീക്ഷിച്ച പ്രകടനം പുറത്തെടുക്കാൻ കഴിഞ്ഞിരുന്നില്ല. യുണൈറ്റഡിനായി 96 മത്സരങ്ങളിൽ നിന്ന് വെറും 12 ഗോളുകൾ മാത്രമാണ് താരം നേടിയത്. എന്നാൽ സ്പാനിഷ് ക്ലബ്ബ് റയൽ ബെറ്റിസിലേക്ക് മാറിയതോടെ ആന്റണിയുടെ കരിയർ മാറിമറിഞ്ഞു. ബെറ്റിസിനായി 67 മത്സരങ്ങളിൽ നിന്ന് 22 ഗോളുകൾ നേടി താരം തന്റെ മികവ് വീണ്ടെടുത്തിരിക്കുകയാണ്.

യുണൈറ്റഡിൽ റൊണാൾഡോയും ആന്റണിയും ഏഴ് തവണ മാത്രമാണ് ഒന്നിച്ച് കളിക്കളത്തിൽ ഇറങ്ങിയത്. എങ്കിലും ആ കുറഞ്ഞ കാലയളവ് തന്റെ ജീവിതത്തിൽ വലിയ സ്വാധീനം ചെലുത്തിയതായി ആന്റണി സാക്ഷ്യപ്പെടുത്തുന്നു.