തൃശ്ശൂര്‍: സംസ്ഥാനത്തെ ജനവാസമേഖലകളില്‍ നിന്ന് കഴിഞ്ഞ അഞ്ചു വര്‍ഷത്തിനിടയില്‍ 77,000 പാമ്പുകളെ വനംവകുപ്പിന്റെ സര്‍പ്പ (SARPA) വൊളന്റിയര്‍മാര്‍ പിടികൂടി. പാമ്പുകളെ ശാസ്ത്രീയമായി രക്ഷപ്പെടുത്തി വനത്തിലേക്ക് തുറന്നുവിടുന്നതിനും പാമ്പുകടി മൂലമുള്ള അപകടങ്ങള്‍ കുറയ്ക്കുന്നതിനുമായി സജ്ജമാക്കിയ 'സര്‍പ്പ' ആപ്പ് വഴിയുള്ള കണക്കുകളാണിത്. 2021 മുതല്‍ 2026 വരെയുള്ള കാലയളവിലെ വിവരങ്ങള്‍ പ്രകാരം ഏറ്റവും കൂടുതല്‍ പിടികൂടിയത് മൂര്‍ഖന്‍ പാമ്പുകളെയാണ് (28,000).

മറ്റു കണക്കുകള്‍- പെരുമ്പാമ്പ്: 19,000, ചേര: 13,000, അണലി: 4,000, വെള്ളിക്കെട്ടന്‍: 1,000, മറ്റുള്ളവ: 12,000

2020ല്‍ പ്രവര്‍ത്തനമാരംഭിച്ച സര്‍പ്പ ആപ്പ്, 2024 മുതലാണ് പൊതുജനങ്ങള്‍ക്കിടയില്‍ വ്യാപകമായി ഉപയോഗിക്കപ്പെട്ടത്. നിലവില്‍ ഡോക്ടര്‍മാര്‍ മുതല്‍ സാധാരണ തൊഴിലാളികള്‍ വരെയുള്ള 3,600 പരിശീലനം ലഭിച്ച സന്നദ്ധപ്രവര്‍ത്തകര്‍ ഈ ശൃംഖലയുടെ ഭാഗമാണ്. 24 മണിക്കൂറും സൗജന്യമായി സേവനം നല്‍കുന്ന ഈ വിഭാഗം, സോഷ്യല്‍ ഫോറസ്ട്രി റേഞ്ച് ഓഫിസര്‍മാരുടെ മേല്‍നോട്ടത്തിലാണ് പ്രവര്‍ത്തിക്കുന്നത്.

 ശ്രദ്ധിക്കുക
വേനല്‍ക്കാലത്തിന് പുറമെ ഏപ്രില്‍, മെയ് മാസങ്ങള്‍ പാമ്പുകളുടെ പ്രജനന സമയം കൂടിയായതിനാല്‍ ജനങ്ങള്‍ കൂടുതല്‍ ജാഗ്രത പാലിക്കണമെന്ന് വിദഗ്ധര്‍ നിര്‍ദേശിക്കുന്നു. വീടും പരിസരവും വൃത്തിയായി സൂക്ഷിക്കുക, രാത്രിയില്‍ ടോര്‍ച്ച് ഉപയോഗിക്കുക, കുട്ടികളുടെ കളിയോടൊപ്പം മുതിര്‍ന്നവരുടെ ശ്രദ്ധ ഉറപ്പാക്കുക എന്നിവ പാമ്പുകടി ഒഴിവാക്കാന്‍ അനിവാര്യമാണ്.

Over the last five years, Kerala's SARPA volunteers have rescued and relocated 77,000 snakes from residential areas to forests to ensure public safety and wildlife conservation.