തിരുവനന്തപുരം: കവടിയാറിൽ വാഹനങ്ങൾ കൂട്ടിയിടിച്ചുണ്ടായ അപകടത്തിൽ ഒരാൾക്ക് ദാരുണാന്ത്യം. നാല് കാറും രണ്ട് ബൈക്കുമാണ് കൂട്ടിയിടിച്ചത്. അപകടത്തിൽ പാലക്കാട് സ്വദേശി നൗഷിജ (24)യാണ് മരിച്ചത്. നിരവധി പേർക്ക് പരുക്കേറ്റിട്ടുണ്ട്.          

നൗഷിജ, ഭർത്താവ് ആഷിക്, അലി അക്ബർ എന്നിവർ ഫുട്പാത്തിലൂടെ നടന്നുവരുമ്പോഴാണ് അപകടത്തിൽപെട്ടത്. ഫാഷൻ ഡിസൈനിംഗ് ഹാൻഡ് വർക്കർ ആണ് അലി അക്ബർ.

ALSO READ: വി.ഡി.സതീശനായി തെരുവില്‍ പ്രതിഷേധം; നടുറോഡില്‍ പെട്രോളൊഴിച്ച് ലൈറ്ററുമായി കോണ്‍ഗ്രസ് പ്രവര്‍ത്തകന്‍

കാറിന്റെ അമിതവേ​ഗതയാണ് അപകടത്തിന് കാരണമെന്ന് നാട്ടുകാർ പറയുന്നു. നിയന്ത്രണം തെറ്റിയ കാര്‍ ആദ്യം ഫുട്പാത്തിലേക്ക് കയറി, പിന്നീട് മറ്റ് വാഹനങ്ങളിൽ ഇടിച്ചു, ഒടുവിൽ നിതീഷ് എന്നയാളുടെ കാറിലിടിച്ചാണ് അപകടമുണ്ടാക്കിയ കാര്‍ നിന്നത് ദൃക്സാക്ഷികള്‍ പറയുന്നു. 

അപകടത്തിൽ പരുക്കേറ്റ കാർ ഡ്രൈവർ ഉൾപ്പെടെയുള്ളവർ നിലവിൽ ആശുപത്രിയിലാണ്. ഇവര്‍ക്ക് ഗുരുതരമായി പരുക്ക് പറ്റിയിട്ടുണ്ടെന്ന് നാട്ടുകാര്‍ പറയുന്നു. അതേസമയം, അപകടത്തിൽ ബംഗാള്‍ സ്വദേശിയായ ഒരാള്‍ക്കും പരുക്കേറ്റിട്ടുണ്ടെന്നാണ് വിവരം.